31 Luglio 2012

Quinta Olimpiade dele Clanfe, la videocronaca

Bon, finalmente agiorno la pagina 😀
Alora sabato iera la mitica Olimpiade dele Clanfe, finalmente dirè voi, dopo 1 mese che ve fazevimo una testa compagna!
Sveglia per la clapa ale 7.30, perchè dovevimo farse la foto tuti insieme soto el manifesto de via Giulia, che xe un poco el nostro grande vanto de sta edizion.

Foto di Guendal Cecovini Amigoni

Poi via in sede Spiz a cior le robe in furgon e tuti al’Ausonia per i ultimi preparativi. Ombreloni, podio, casse, musica, va su in teraza a preparar la bandiera per la cerimonia de apertura olimpica, bevi un spritz, sistema i pachi gara e i premi, prepara el boteghin, la postazion dela giuria e dei videi. Per le 13 xe tuto pronto, e la fila fora del’Ausonia xe lunghissima. Ale 14, col’alzabandiera e l’ino dele Clanfe, quel che ne ga fato Maxino con tanto amor, incomincia uficialmente la Quinta Olimpiade.
Dopo gaver visto i videi de Chuketti, se domandemo quanti sarà stai fermai dala Porfirio & friends…

El presidente Mauro Vascotto taca banda con la cronaca, se parti subito con dei bei tufi.
Xe chi che zerca de schizar tuto el publico con un kami…

un giovanissimo arlecchin con una clanfa 360…

intanto in giuria se la ridemo. Con mi sula tola xe anche Michele Zazzara, giurato del morbin, Andrea Pecile, Fabry Marcon, Alberto Krebel, Barbara Gorla e le mule che ne dà una man a trascriver i punti Cristina Bonazza e Manuela Travan. Sul trampolin riva i primi supereroi. Eco Capitan America Simone Iesu…

e dopo riva l’eroe del movimento sifonela dele culate, Tiziano Stocca.

riva anche el primo serio tentativo de coruzion: ne riva dei biceri de spritz bei pieni.

El clima diventa più hot e riva sti tre muli, Stefano Di Luciano, Mario Tutone e Daniel Zotti, che conquista el podio dela categoria.

El caldo se fa sentir e incomincemo a perder colpi. I lavori in giuria no xe semplicissimi, dovemo dar un voto da 0 a 5 per el stile, uno da 0 a 5 per el schizo, poi a questi se somma el voto da 0 a 5 del giudice del morbin e el coeficiente de dificoltà de esecuzion. Ogni giurato, dopo gaver votà, devi trascriver sul registro el propio voto, che pol servir in caso de incerteze sui contegi. Contando che qualche clanfador no se ga butà, sul registro resta qualche riga svoda e se pol far facilmente confusion. La pausa clanfin xe obligada.
Tornemo ai nostri posti e riva Balotelli e la Fico, Armando e Alexia Otti…

e poi forsi i muleti più geniali in assoluto, che mima una scena de Star Wars..

un taiaerba in acapatoio riva corendo corendo…

e xe anche chi sfida le legi dela clanfa fazendo harakiri. Eco el tuffo sazio de Matteo Starri.

…continua i travestimenti…riva Aigor

e poi riva el kamikaze sardon impanà Sandro Capilla, che vinzi giustamente el premio morbin

Chi ga vinto ala fine? Eco la bomba americana de Pietro Poropat, el tedoforo, re dele clanfe 2012

El video dela giovanissima regina, Alice Tognetti, 11 anni, no lo gavemo ancora. Ma el riverà, li gavemo fati tuti 🙂

Qua la classifica completa
.

Foto di Piera Angius

E desso una bela ciolta pel fioco. Chi xe la clanfa de legno 2012? El nostro Paolo Stanese, con ben 2,10 punti! 😀
Ben bon. Giustamente sto anno in chiusura se ga butà anche tuti i componenti dela giuria, cussì, per ciapar la giusta quantità de pernacchie dopo gaver spartì piconi tuto el pomerigio 😉
Sì, sì, gaveremo anche quei videi prima o poi, no li tegnimo nascosti 😉
Insoma un bel pomerigio, finì con l’estrazion dela loteria, le premiazioni, le foto de grupo, e l’arivederci al 23 setembre ala scalata santa e al 27 luglio 2013 ala sesta olimpiade dele clanfe. Segneve la data e prepareve!
P.S. Cossa xe la scalata santa?
Eh eh…ve dago qualche indizio: Scala Santa, bici, in salita. Only the brave!

Agiorno: eco el video cole clanfe dela giuria dopo 4 ore de spritzeti:

E desso deghe zo! 😀
Però xe de dir che Alberto, el presidente dela giuria non a caso, se partecipava con quel dopio taconeti e se inventava qualcossa per ciapar 5 in morbin a sta ora el iera el Re dele clanfe 2012.

Hai scritto qualcosa (o fatto foto, o video, o pupoli…) di divertente/ironico/satirico su Trieste, Gorizia e dintorni? Mandacelo al Quel dela Quela! Scrivi a manna@bora.la

Quel dela Quela on Facebook
Tag: , .

28 commenti a Quinta Olimpiade dele Clanfe, la videocronaca

    Lascia un commento

    Il tuo indirizzo email non sarà pubblicato. I campi obbligatori sono contrassegnati *

    Questo sito usa Akismet per ridurre lo spam. Scopri come i tuoi dati vengono elaborati.