Il GTD (Getting things done) triestino

Alora ogi femo un servizio de utilità sociale. Tuti qualche giorno se gaverà trovà altamente incasinai, con una marea de robe de far. De solito in sti casi se disi “ciò, son cussì ulmo de robe che no so gnanca de dove incominciar”.
Alora par che un mato american, David Allen, gabi studià un modo per risolver sto problema, che se ciama apunto “Getting things done”, o GTD pei amici. El metodo parti propio del presuposto che le persone ga necessità de liberar la testa del’ansia de ricodarse cossa che xe de far.
El schema che el ga elaborà xe questo:

Sicome el Monon Behavior Research Department sa benissimo che nissun triestin gaverà frescheza de leger tuto quel schemin, alora lo gavemo rielaborà e semplificà, in modo che anche noi rivemo a far le robe come dio comanda.

Eco el GTD senape e kren (che ciameremo SPRITZ: Saria Premura Risolver Imediatamente Tante Zizagne)

1. “go una marea de robe de far, speta che le scrivo su un foieto, se no me le dimentico”
2. “otimo, desso le xe scrite, posso smemorizarle del zervel”
3. SMEMORIZARLE
4. “dove cachio go messo el foieto???????”
5. “e bon ah. buta un spritz.”

Inutile che ve digo che la parte fondamentale xe la 3.
Bon, lieto de esserve stado utile, desso metè tuto in pratica e se vedemo tuti in osmiza 😀
P.S. Grazie a Marco Pilia che me ga fato scoprir sta roba del GTD (ovio che no iera credibile che la gavessi scoperta solo 😛 )

Hai scritto qualcosa (o fatto foto, o video, o pupoli…) di divertente/ironico/satirico su Trieste, Gorizia e dintorni? Mandacelo al Quel dela Quela! Scrivi a manna@bora.la