Peter Pan in triestin. Andè veder che merita

Peter Pan, una dele mie fiabe preferite, se non la preferita in assoluto. Ma penso che sia la storia preferita de gran parte dei triestini, visto che semo tuti “muleti inside”. Però recità e cantà in triestin. Ecolo. Bastassi ste due robe per convincerme a andar a vederlo. Zontemo che a farlo xe quele mace del PAT teatro, quei che za gaveva triestinizado “Grease” con un sucesso clamoroso.
Insoma se no i fa robe epiche no i xe contenti.
E alora son andà a vederlo, sabato. E merita per bon, andè vederlo tuti se rivè. E se no rivè, fè una petizion popolare, scriveghe al sindaco o a segnalazioni perciò che i meti in cartelon altre repliche.
Go conossù el PAT teatro (PAT stà per Palcoscenico Amatoriale Triestino) dale parole de un mio amico, che me ga dito “ciò, ma come no te li conossi, i fa i spetacoli a San Giovanni, xe de rider fin le lagrime dal’inizio ala fine!”. Ed efetivamente, su tre spetacoli de lori che go visto, iera un meo del’altro. Ma bon, parlemo de Peter Pan.
I muli e le mule se ga dà veramente de far ala grande. I costumi xe belissimi, la scenografia no stemo parlar. Mi no savessi gnanca de dove cominciar, mentre lori ga fato tuto da luglio, in 3 mesi, i me ga dito. Co’ la scena se verzi sula barca dei pirati, xe veramente un capolavoro. E anche el resto, la foresta, i indiani, i Bimbi Sperduti, insoma grandi atmosfere. Le canzoni de Bennato riadatade in dialeto poi fa el resto, e oltre a rider te rivi adiritura a comuoverte.
Ma la roba più esilarante in assoluto xe sicuramente sentir i protagonisti dele storie dela tua infanzia parlar in triestin, usando le espressioni che usemo tuti ogni giorno. Za Wendy che disi “ma mi no so svolar!” fa rider. E ve lasso imaginar i Bimbi Sperduti che improvisa un baleto zigando “ciò coss’te ga? Ciò coss’te vol?”. O le sirene che tira longhi che par de esser a Barcola in pineta.
Oltre a far divertir el publico, se vedi che anche lori se diverti ‘ssai in scena. E chissà quanto che i se diverti co’ i le pensa e co’ i prepara el tuto. Xe proprio un bel clima.
I interpreti xe tuti ben azecai, da Peter Pan fin a Spugna, che xe veramente un grande. Capitan Uncino xe un imperdibile Lorenzo Braida. Mi sto mulo me fa rider solo a vederlo (in senso bon eh!). Se tipo un ve chiedi “cossa xe una legera?”, portelo in teatro e mostreghelo, perché lui xe el perfeto rapresentante dela categoria.
Insoma, complimenti al PAT teatro, bravi e belle.
Ala fine Peter Pan e Capitan Uncino resta anche sul palco a disposizion dei muleti (e dei diversamente muleti) che vol farse la foto con lori.
Desso però dopo tante lodi una bela remenada ghe stà. Me ga ‘ssai piasso come i presenta el spetacolo sul volantin: “Finalmente a Trieste la commedia musicale in ‘triestin’ ‘Peter Pan’”. Ma perché, prima i lo fazeva in giro pe’l mondo senza dirne niente? 😀
(desso oviamente me dirè: ara che si, pampel! :P)
Per finir in beleza, se volè podemo disquisir sule modalità migliori per salvaguardar la tradizion del’uso del dialeto nele nuove generazioni, cussì, giusto per far un pochi de pupoli e far arabiar i furlani perché noi ne vien ‘ssai facile e lori no. Mi digo che el nostro punto de forza xe semplicemente che ste robe le femo spontaneamente perché le ne fa rider, le ne piasi e le amemo, e no perché sentimo el bisogno de salvaguardarle. In fondo xe la lingua che usemo ogni giorno. Quindi ga tuta una naturalità che se andassi persa no funzionassi cussì ben e saria forsi destinada a sparir. Ma finchè se divertimo, semo tranquili. Bela muli!

La muleria xe:
Peter Pan: David Briscek
Capitan Uncino: Lorenzo Braida
Wendy: Sara Dolce
Spugna: Franco Moro
Gianni: Emmanuele Buzzanca
Michele: Giada Clicech
Agenore Darling: Gino Tomsich
Mary Darling: Eleonora Gabrieli
E dopo xe: Sergio Pierazzi, Fabiana Pecchiari, Eleonora Buzzanca, Diego Puissa, Sonja Janjusevic, Alice Ferrarese, Marco Volo, Deborah Giacomini, Mauro Piccolo, Francesco Bertolino, Raffaella Sauro, Maurizio Gec.

Prossimi spettacoli:
Teatro di San Giovanni
San Cilino, 99/1 (vicino al capolinea delle linee 6 e 9)
martedì 1 novembre ore 17.00
sabato 5 novembre ore 20.30
domenica 6 novembre ore 17.00
Opur per tegnirve agiornai chiedeghe l’amicizia su facebook che fe prima: Pat Teatro.

Hai scritto qualcosa (o fatto foto, o video, o pupoli…) di divertente/ironico/satirico su Trieste, Gorizia e dintorni? Mandacelo al Quel dela Quela! Scrivi a manna@bora.la