Anca la storia de San Nicolò la ga bastanza ani

La storia de sior Intento la dura de tanto tempo e anche quela de San Nicolo’ la ga bastanza ani.

Me ricordo co’ iero muleta che andavo in asilo in manicomio, no perche’ gavessi problemi (anche se…oddio…qualchedun podessi obietar)…

Disevo, andavo in asilo a S.Giovanni e l’asilo, belissimo, iera dentro al manicomio e me ricordo che el 6 dicembre vigniva sempre un San Nicolo’, co’ un ocio celeste e uno maron, come David Bowie che el ne portava un sacheto coi mandarini, le nosi, i fighi sechi e un regaleto.

E noi ghe cantavimo:

“San Nicolo’de Bari
La festa dei scolari
Scolari no ga festa
Ghe taieremo la testa”

Che povero, mi el me fazeva anche un poco passion che i lo dovessi decapitar per colpa del Provedditorato che no ghe dava giorno de ferie.

Ad ogni modo, quando son emigrada all’estero 4 anni fa, insieme al cotto caldo col kren, le osmize e i concerti dei Happy Days a la sagra de Trebiciano, sentivo ‘ssai anche la mancanza de S.Nicolo’.
Dei piati posai su la tavola la sera del 5.
De la fiera in Viale (o in Acquedoto, come che disi ancora mio nono), co’ le calze de spugna e i salami de cinghiale umbri.
De el carbon al gusto menta.

Per cui me se ga verto el cuor quando son rivada in Olanda e go scoperto che anche qua i ga S.Nicolo’, solo che inveze i lo ciama Sinterklaas.
Oltre al nome anche la storia xe’ un poco diversa pero’.
Sinterklaas (una fusion de Sint e Nicolaas) riva a metá novembre co’una nave a vapor che se ciama Spanje (Spagna). El ga un caval bianco con cui el galoppa sui teti delle case. El xe’ vestido de vescovo, come el nostro S.Nicolo’, co’ el baston, la mitra e tutti i vari ammenicoli.

Solo che a differenza del nostro S.Nicolo’, che xe’un poco un lupo solitario, el Sinterklaas olandese viaggia co’una scorta de un 20 Zwarte Piet, che saria Piero el Nero, che i ghe fa de aiutanti. Zwarte Piet xe’normalmente un bianco pittura’ de nero, coi labbri rossi (tipo la pubblicita’ della caramella Tabu) e vestido de paggio col cappel co’ la piuma.

Ovviamente, dato che anche le tradizioni, come el senso de l’umorismo, sta soccombendo alla melassa del politically correct, da un po’de anni, verso la fine de ottobre se scatena le polemiche sulla reale origine de Piero el Nero: schiavo moresco (che no se pol dir) o spazzacamino italiano sporco de zenere (che comunque va meio perché xe’comunitario)?
Ai posteri l’ardua sentenza.

Essendo poi un paese con un’economia che tira, qua se comincia a far regali za a meta’ novembre.

Ogni sera i fioi metti una scarpetta davanti al camin (in mancanza de un camin vero, fa fede anche el calorifero) con dentro una carota per el caval e un biscoto per Sinterklaas. In teoria, la matina, la carota e el biscoto xe’scomparsi e in cambio xe’un regaleto. Ovviamente, a mama e papa’ ghe toca magnar carote in salata per 15 giorni.

Sinterklaas e Zwarte Piet, durante sti giorni, te li incontri dappertutto. In ufficio, al super, per strada, in coriera. A mi, che internamente go 5 anni, me fa ‘ssai rider e me piasessi poderghe creder ancora. In fondo creder a S.Nicolo’ te allena a diventar amante delle teorie del complotto.

Poi la sera del 5, mentre i fioi xe’ a zena, in cameretta, o dove che xe’, riva Sinterklaas e ghe lassa i regali. E una nova montagna de plastica, scovazze e zoghi che dopo un mese vegnera’ dimenticadi se riversa nelle, za’ picole, case olandesi.

Bon S.Nicolo’ a tuti!