Cani e gatti, dualismo a quattro zampe

In ocasion dela festa dei gati (sì, esisti, go scoperto qualche giorno fa), eco in regalo un studio de etologia comparata tra cani e gati. La festa dei felini iera el 17 febraio in realtà, ma la puntualità no xe de casa 😛
El testo xe parte del belissimissimissimo libro Zinque bici, do veci e una galina con do teste (publicità oculta spudorata 😀 ), de cui gli autori sta lavorando al seguito, previsto per aprile/magio. Magio femo dei.

Cani vs gati. Xe el più classico dei dualismi, insieme forsi a Union vs Laško. I cani te scolta, i gati no te ga pe’l cul. I cani xe tui amici, i gati no te ga pe’l cul. I cani speta che te ghe disi ti cossa far, i gati no te ga pe’l cul. I cani te vol ben, i gati no te ga pe’l cul. Tipiche argomentazioni antropomorfetologiche. Mi go sempre tifà pei gati: autonomi, autopulinti, no i sporca, no i frizi, no i inquina, no i xe castroni, i zoga e i fa le fusa che te rilassa e te concilia el sono. Dopo, visto che no i xe computeri, tanto dipendi del caratere individuale. Se te capita el gato che no te ga pe’l cul, xe poco cossa far, no el te gaverà pe’l cul. Ma pol anca capitarte el can che te rosiga el popoci a tradimento. Quando vado in giro in bici, le mie simpatie le sburta ancora de più in direzion dei gati. I gati no te ga pe’l cul, ben dito. Te ghe passi vizin e lori i xe là, ciapai int’el far le propie robe. Dormir, zogar con un sorzo, meditar sul’infinito leopardiano (ai oci de un gato, un leopardo pol per bon sembrar quasi infinito). Ti te fa parte del contesto, te passi, lori te varda, magari i se fa un do ridade drio de ti, i filosofegia sul significato recondito del tuo passagio in questi zinque secondi dela loro vita, ma i resta fermi a far avanti le robe che i stava fazendo e no i te ga pe’l cul. I cani no. I cani vivi int’un continuo stato de ansia e cinciut. Ciò xe de far qualcossa. Ciò riva ciclisti. Ciò el mio paron cossa faria. Ciò el mio paron cossa volessi che fazo. Ciò no so, no el me sta dando nissun ordine. Ciò alora forsi no va ben quel che fazo. Ciò alora cossa go de far. No so. Orca. Ciò. Bu, de solito abaio. Bon provemo. Bau. Nissuna reazion del paron. Ciò alora forsi son nel giusto. Bau bau. Orca el me ga zigà, forsi devo star zito. Ciò mi però sti mati in bici no li go mai visti ciò. Sa cossa, nel dubio abaio e rugno cussì movimentemo un poco la giornada, no come quei mone de gati che sta distirai a filosofegiar sui misteri del’universo. ‘Ssai pochi misteri xe: qua xe casa nostra, quei xe ciclisti che mi no go mai visto e che xe vizin de casa nostra. Nissun mistero, no xe ‘ssai de pensar, xe tuto ciarissimo. Quindi bau! Anzi, bau bau bau! Son in piena! Bau bau sbarabau bau bau!
Eccheccoioni!

All’attento osservatore non sfuggirà la differente predisposizione caratteriale del canide e del felide ritratti nella figura sovrastante. Notasi come l’individuo a sinistra sia concentrato e pronto all’azione al minimo cenno del padrone, mentre l’individuo a destra… no ga pe’l cul. Sguardo verso l’infinito leopardiano ah. Ma ghe volemo ben cussì.

Hai scritto qualcosa (o fatto foto, o video, o pupoli…) di divertente/ironico/satirico su Trieste, Gorizia e dintorni? Mandacelo al Quel dela Quela! Scrivi a manna@bora.la