5 Aprile 2013

Riva “Polska… rivemo!”: libro di viaggi, bici, veci, maldobrie e pupoli

Ecoci, pronti per un articolo autoreferenziale 😀
A maggio sarà in libreria “Polska… rivemo!“, prossimo libro mio e de Michele Zazzara. Yeeeee!
Oviamente xe belissimo, super, imperdibile ecc. Bon, in atesa de una recension un poco più imparziale, intanto ve spiego cossa ghe xe dentro:
1. La rumizada de 7 bici verso la Polonia tra s’cioche contro auti, clanfe, dormitori feminili, colori e draculi in mudande;
2. Le maldobrie de 2 veci in osmiza su pirati istriani, guere tra tacomachi e rane, cronache di Garbia, furlani e tornei imperiali de sesa color;
3. I pupoli de 1 cocal e 1 cornachia ala scoperta del mondo (cioè, i pupoli li ga fati Michele, no el cocal e la cornachia).
Tre storie diverse che se alterna e se inverigola lungo un fil condutor unico, quel che ne porterà su do riode de Trieste fin a Cracovia.
Qua la pagina internet dove publicheremo anteprime dele maldobrie, videi, ecc, e dove che desso trovè anche i titoli dei 36 capitoli.
Qua invece la pagina facebook del libro, per restar agiornai su come va avanti.

E desso le domande frequenti:

Per bon xe frequenti ste domande frequenti?
No, ma fa figo, tuti meti sta roba dei.

Ma in pratica el libro xe el seguito de Zinque bici, do veci e una galina con do teste?
Se pol dir de sì, solo con do bici in più, con 400 km in più, con altri do personagi de fantasia in più e con 50 pagine in più.

Grasso el dindio!
No, dindi no xe. I due personagi novi xe un cocal e una cornachia.

E cossa i centra con un viagio in bici de Trieste a Cracovia?
El libro xe diviso in tre sezioni che se alterna. Xe do veci, Ucio e Ciano, za presenti in “Zinque bici, do veci e una galina con do teste”, che xe in osmiza a bever un per de otavi. Per passar el tempo i legi el diario del viagio dei sete ciclisti. Dopo ogni capitolo, che corispondi a una tapa, ghe vien in mente una storiela de contarse, una maldobria, ispirai de quel che ghe nassi ai muli durante el viagio. Dopo de ogni maldobria, ghe xe una striscia comica de pupoli de Robi e Paco, che saria el cocal e la cornachia, che i xe in osmiza anche lori e i scolta Ucio e Ciano zercando de no farse becar intanto che i prova a fregarghe el magnar. Le robe che i scolta de Ucio e Ciano da el via a dialoghi e scenete comiche tra de lori.

Ma no sarà tropo casin tuti sti personagi e ste sezioni alternate?
No, perchè ghe xe un filo condutor che unissi tuto quanto, capitolo dopo capitolo. Yeeee!

Chi xe i autori?
Diego Manna le monade scrite, Michele Zazzara i pupoli pupolai

In che lingua xe scrito?
In triestin. Triestin più giovane per el diario del viagio in prima persona, triestin più vecio per le maldobrie, dove xe i veci che parla fra de lori. Triestin de cocai per i do usei. E poi xe un picio toco in italian, il canto della sirena.

Ghe sarà dele preview?
El diario xe online qua, anche con foto. Ma per el libro xe stado ampliado riveduto e coreto. In più fra poco publicheremo un 3 maldobrie online, stay tuned! 🙂

E quando vien fora el libro?
Lo presentemo probabilmente el 12 magio per le 19:00. Tegnive liberi!!!

E se magna?
Sì, ghe sarà el rebechin finale.

Bon quindi se vegno per le 20 magno e basta?
Sì, ma te se perdi i viz dela presentazion. Te magni ma no te ridi, e la tua vita sarà un poco più triste.

Ma xe vero che anderè a presentarlo anche a Siena al festival dela Viandanza?
Sì ciò, el primo giugno, ci tocherà parlare par taliano che se no i matti non riveranno a capire un’ostia.

Quando vegnirà fora el FRiKo! ?
I lavori al FRiKo! ricomincia subito dopo. Vederemo de farghela per nadal 2013.

Mi no go ancora Zinque bici, do veci e una galina con do teste, nè i 3 Monon Behavior, nè el libreto rosso de Cosolini. Dove posso ciorli?
Come no te ga? orca! e come te ga fato fin desso? te pol rimediar andando nele librerie più bobe del triveneto opur online nela Botega del Litoral.

Sta ultima domanda no la gavevo fata mi. Te la ga zontada ti per farte publicità agratis. Tra l’altro te la ga copiaincolada dale F.A.Q. del’altra volta.
Sì, xe vero 😛
E go copiaincolà anche la risposta 😀

Daghe!

Hai scritto qualcosa (o fatto foto, o video, o pupoli…) di divertente/ironico/satirico su Trieste, Gorizia e dintorni? Mandacelo al Quel dela Quela! Scrivi a [email protected]

Tag: , , , .

Lascia un commento

Il tuo indirizzo email non sarà pubblicato. I campi obbligatori sono contrassegnati *

Questo sito usa Akismet per ridurre lo spam. Scopri come i tuoi dati vengono elaborati.