La magnifica cusina triestina

La cusina triestina, ma volè meter? No solo i nostri veci i la ciamava la “magnifica”, ma basta darghe un chibiz, a le zentinera de rizete patoche che gavemo, per capir che, int’una jota o int’una calandraca, ghe xe tuta l’eredità che ne ga lassà i nostri veci nati soto la Defonta.
Propio de quei che, fato el Porto Franco, i se ga visto rivar fra i pìe, un drio l’altro, ciapi de mati de levante e de ponente: tanto che, se‘l Creator, in quel fatidico sesto giorno, el gaveria pensà un momento, sul remitur de raze che podeva vegnir fora de quel prototipo de Adamo, el saria andà a riposarse prima.
Xe logico, che tuto sto zavai de gente, vegnui de chissà ‘n dove, rivando qua i se ga portà drio, no solo le straze ma anche el savor de quel che mama ghe meteva in piato.

E xe cussì che tuti sti piati, i se ga missià fra de lori e fra de noi e, come tante tesserine, i ga fato de la nostra cusina un mosaico, che xe un capolavoro unico, che ne fa capir el punto, andove se trova la vera storia de Trieste e de la sua gente, senza tài, zonte o floce.
Perché, fora de Trieste, in nissun altro logo, se gaveria inestà un albero genealogico che, lassando perder i simioti, ghe ga impicado sora el capel, dai furlani ai eschimesi e dai istriani ai maori, dando a noi triestini un’identità tanto unica al mondo, che podessi esser certificada de l’Unesco: Patrimonio antropologico de l’umanità.

Ma noi savemo ben che a Trieste se trova tuto quel che la dona domanda e l’omo desidera: tratorie, birerie, locande, osterie, tavernete, pasticerie e buffet, dove se magna: luganighe col kren e gulasch e persuto coto in crosta, porzina e capuzi garbi e pan de ségala, salzstangel, kaiserflàiss, crodighin, museto, orece e codin de porco e, per de sora, una montagneta de senape e una stragratada de kren.
Jesus! nel magnar le nostre “delicateze”, cossa volè che ve digo, me vien ‘diritura de pianzer, no… no pel kren, ma per la gioia che Noè, ebreo su ebreo zo, el ga imbarcà su l’Arca anca el porco!

Al giorno de ogi, le robe xe ‘ssai cambiade, ma ai tempi andai, fin a la seconda metà de l’altro secolo, no ghe iera pranzo o zena senza un primo piato de brodo de carne con, risi o gnocheti de gries, o la pasta butada, per no parlar de la pastina de tute le forme, senza contar i “capeli d’angelo”, che i sbrissava dal piato come bisati imbriaghi.
E se no iera de brodo, il primo podeva esser de minestra de orzo e fasoi, o de pasta e fasoi o de pasta e patate, opur de lenti, de verze e patate, de formenton E cussì avanti.
E la pasta, i spagheti?? Quel no, iera roba ‘taliana, quasi esotica, de far cussì per sghiribiz la festa o la domenica. E la piza? Quela po’ gnanche de pensar, finché come la coca cola e ‘l chewing no i la ga portada a a Trieste… i americani dopo la guera nel ’45!
Le minestre le iera el fondamento dei bunigoli dei nostri noni, tanto che i diseva: Sete robe fa la minestra: la cava la fame e la cava la sede; la slarga la panza e la rinforza el dente; la fa ben dormir; la fa digerir; e po’ le ganasse la fa rifiorir!

Ma no bisogna dismenticar, che gavemo anca de le minestrine che, come disi el proverbio: se no xe sopa xe pan bagnà, come la panada, la sopa de bira o de vin.
Sopa, ghe se diseva anca al tocio, che se fa col pan int’el sugheto vanzà int’el piato de bigoli col sugo.Va ben no xe de bon ton, ma de sicuro xe tanto bon!
La sopa nel vin, po’, la ga sete virtù: la fa alti e grossi, la fa bianchi e rossi, la fa digerir, la calma la bile, la fa ben dormir.
Ma ‘l vero tesoro de Trieste, ‘l xe sconto int’un mar che scartazà de onde de Bora e de Garbin, el ne regala pessi Bonissimi.
Tociadi po’ nel Brodeto ala triestina, sti pessi nostrani i componi una musica marinaresca… de lecarse i mustaci!
A primavera po’, ne torna indrio i sardoni barcolani, de un bon che, come ‘l primo baso, propio no se pol dismentigar! Tanto a Trieste no se “fa la “corte” ma per ganzar ‘na mula se “buta sardoni” perché, a dispeto de la sua scontrosa grazia, Trieste te inamora anche con una magnada de bon pesse!