TUTI INSIEME
Cacao le sete in punto, a l’una pranzo
el tè a le zinque a le oto e meza zena,
no se sgarava gnanca de un minuto,
più una caserma iera che una casa.
Ogi el quartièr, però, xe diventado
come el buffet de la Staziòn Centrale.
Contati umani? Sì, nel sbater contro
tra quei che ariva e quei che cori fora.
Ghe xe, deograzia, qualche punto fermo
per ritrovarse unidi in armonia:
Nadàl, se no xe neve, Capodano,
se se sta mal e Pasqua più de rado,
i compleani, fin che i fioi xe pici,
el Santo, se no ‘l xe defenestrado,
qualche batizo, se no i xe sta’ atenti,
e per fortuna, sempre i funerai.
Laura Borghi Mestroni
EL GIARDIN INCANTA’
Serà de un muro de vece piere
che fazeva panza
el giardin sburtava su la strada
rami folti de foie, o suti,
secondo la stagion.
Un portonzin de fero ruzinido,
sempre sprangado,
taiava fora de la vita
la vita che iera dentro
e me sfidava
a scoverzer l’incanto.
Ancora, co passo de quela parte,
me par che, se volessi,
trovaria là dentro el Paradiso.
Tiro de longo e vado,
xe meio no scherzar
co le ilusioni.
Graziella Semacchi Gliubich
Ultimi commenti
Un blog dedicato ai rifiuti per raccogliere le opinioni dei cittadini
Iera una volta… le s’cinche
Scampoli di storia: Due grandi alpinisti triestini scomparsi: Enzo Cozzolino e Tiziana Weiss
Orando – Un bicchiere di spritz
Be Hive! Un gioco alla scoperta del mondo delle api