{"id":66129,"date":"2013-12-05T06:10:33","date_gmt":"2013-12-05T05:10:33","guid":{"rendered":"https:\/\/bora.la\/?p=66129"},"modified":"2017-01-20T11:18:20","modified_gmt":"2017-01-20T10:18:20","slug":"trieste-kotor-in-bici-atto-quarto-el-filtro-antisfiga-deloportunita","status":"publish","type":"post","link":"https:\/\/bora.la\/2013\/12\/05\/trieste-kotor-in-bici-atto-quarto-el-filtro-antisfiga-deloportunita\/","title":{"rendered":"Trieste-Kotor in bici atto quarto: el filtro antisfiga del’oportunit\u00e0"},"content":{"rendered":"

Qua le puntate precedenti<\/a><\/p>\n

\"\"<\/a>Se ierimo lassai che ierimo imbustizai sui nostri belissimi materassi pergolosi. La roba che no gavevimo calcol\u00e0 la sera prima per\u00f2 xe che s\u00ec, de note te dormi anche ben soto le stele, ma el sol in agosto xe ‘bastanza matiniero e anche un poco fastidioso. El mato ga el cinciut. El riva l\u00e0, l’impiza la luce senza gnanche domandar e el te tira ste s’ciafoni de caldo che met\u00e0 basta. Morale: dopo un poco xe impossibile dormir. Ma forsi xe meo cuss\u00ec, visto che dovemo rimeter tuti i materassi a posto senza farse becar.
\nAnche qua la colazion no xe compresa, e dovemo sbecolar robe trovade in supermarket. Tipicamente yoghurt, biscoti e brioches. E ciculata. E el baratolon de Nutela, quel no manca mai. La roba comoda xe che con sto caldo no te ga de far ‘ssai fadiga per spalmarla. Te giri el vaso e la vien zo sola, praticamente te se la versi sul panin.
\nTrovemo el reparto che fa per noi. Quel dele pistole ad aqua. Dei, dovemo ciorle. Dei. Pensa che figada: le tegnimo in sconton e dopo se sparemo pedalando. O ghe sparemo ai altri ciclisti co li sorpassemo. O ai auti che ne supera. Dei. Dei. Ala fine, no le ciolemo. Ne pareva l’enesimo peso inutile, za gavemo la boza de amaro Montenegro de portarse fin la fine. Incomincemo a capir che xe stada una pessima idea. Tra l’altro, a nissun de noi ghe piasi el Montenegro. Benon. E chi se lo bever\u00e0 in Montenegro? Bu, penseremo.
\nMauro xe preocup\u00e0. El disi che dovemo assolutamente cior aqua, perch\u00e8 no troveremo una fontana che sia una. Ghe disemo che comprar aqua va contro el secondo principio d’istrianit\u00e0 come el Titanic contro l’iceberg. El fa el suponente. No el vedi l’ora che morimo de sede per poderne dir \u201cve gavevo dito mi!\u201d. Nel fratempo, ghe casca per tera la bici. El ne devi una bira.
\nVardemo la cartina. Ou, perch\u00e8 qua la strada xe cuss\u00ec arzigogolada? No i podeva farla drita? Cossa xe, i zogava a Snake? Tornanti. Ahia. La tapa de ogi xe bela ripida. Dovemo farse el passo Vratnik, a 700 metri de altitudine. 15 chilometri de salita. Ma, poco prima de rivar in zima, trovemo la sorpresa. Quel che nissun se spetava. Anzi, quel che Mauro no se spetava. Tranquila, serena, materna, trovemo la fontana fata costruir de Ferdinando d’Asburgo nel 1837, de cui vien zo l’aqua del Velebit. Femo scorte, e Mauro ne devi un’altra bira.<\/p>\n

\"\"<\/a><\/p>\n

Proseguimo. \"\"<\/a>Le strade no xe tanto traficade, ma ogni tanto passa un camion a incoconarte de spuza proprio sul pi\u00f9 bel dela salita, co te son a pieni polmoni.
\nIncomincia finalmente la discesa, e incomincia anche le nostre solite pausete radler. Mauro per ben do volte procrastina la bira che el ga de ofrirne. E el dio dele pausete radler lo punissi. No rivemo far gnanche zinque chilometri che el sbusa.
\nAdesso, picio test. Xe zinque muli in bici. Tuti ga le riode a sgancio rapido. Tuti meno che un, che ciameremo Quel, per la privacy. El mulo Quel ga una rioda a sgancio rapido e una rioda a sgancio checoionico, de quele che te servi la ciave inglese e tuti i ordegni per cavarla. Quindi in pratica nela clapa dei zinque muli ghe xe una rioda a sgancio checoionico su diese riode totali presenti.
\nProblema: quale dele diese riode se sbuser\u00e0?
\nSvolgimento: in base al noto principio enunciato per la prima volta dal’ilustre matematico Codroipo, oviamente l’unica a sgancio checoionico. Eco. Apunto. Quel, che poi saria Mauro, sbusa propio la rioda de drio, a sgancio checoionico.
\n\"\"<\/a>Ema xe l’unica anima pia che ghe da una man. Mi, Guy e Italo preferimo seguir la dotrina filosofica dei veci col capel. Sentai, o in pie, man in scarsela, o nela sacra posizion classica, quela cole man drio la schena, fatalismo nosepolista carocogoico, legera venatura de sarcasmo ranzido. Ci\u00f2 come xe, tre ore per cambiar una rioda? Vara che no se fa cuss\u00ec. Vara che te ga de doprar la ciave de 11. Cossa, quela de 12 entra giusta? \"\"<\/a>No ga importanza, se dopra la 11, se ga sempre fato cuss\u00ec. Ara che quei tocheti giali te rester\u00e0 in man. No sta fracar tropo. No gaver furia. Ma cossa ancora l\u00e0 te son? Ndemo dei! Se iero mi a sta ora gavevo za fin\u00ec.
\nRipartimo. \"\"<\/a>La discesa se trasforma in saliscendi, passemo per Otocac. Se zerchemo un poco, e no passa tanto tempo che restemo senza aqua. La nefasta profezia de Mauro se sta averando. Ma pedalemo. De fontane gnanche l’ombra. E gnanche case dove domandar. Se incomincemo a preocupar un poco. Finch\u00e8 no vedemo un campegio. Deserto. Entremo, vedemo una spina. No xe nissun a cui domandar el permesso per\u00f2. Eh bon dei, aqua no ghe se nega a nissun, bevemo e se impignimo le borace. Riva un omo. Bastanza longo, el ne domanda se volemo campegiar. No, semo qua solo per l’aqua, grazie. El ne domanda de dove che rivemo, el xe curioso. El xe un alenador de basket. Eco spiegada l’alteza. El ne valuta. Mi, Italo e Ema passemo l’esame. Guy ga de dimagrir diese chili. Mauro venti. Per fortuna, el programa de alenamenti no incomincia subito. Ghe disemo che doman riveremo in Bosnia, passando soto Plitvice. El ne disi che no, che la strada che passa in mezo al parco se pol far benissimo in bici, nema problema, xe verta. Figada. El ne ga da una grande informazion, domani pedalar a Plitvice sar\u00e0 un spetacolo.
\n\"\"<\/a>Decidemo che questo incontro val la pena de esser festegi\u00e0 con un regalo: una fiasca de Montenegro. Italo se sburta, xe lui el prescelto, tuto contento de gaver un chilo de meno in borsa. Ma el ga fato i conti senza l’oste. L’omo contracambia con una fiasca de Slivovic. Un poco pi\u00f9 picia del Montenegro, Italo ghe ga comunque guadagn\u00e0 in peso. Poi, con un soriso e una strenta de man, se saludemo, e el ne augura bona fortuna per el nostro viagio.
\nTante volte, le sfighe se trasforma in oportunit\u00e0, basta ricordarse de vardarle col filtro antinegativit\u00e0. Cuss\u00ec, se no gavevimo la sfiga de restar senza aqua (sfiga o monagine? Dubio amletico), no gavessimo mai fato sto incontro e chiss\u00e0, magari doman gavessimo deciso de far la statale invece che passar in mezo al parco. No xe vero in fondo che una sfiga tira l’altra. Ogni sfiga, semplicemente, tira qualcossa, come un poco tuto. Almeno, questo val finch\u00e8 el radicio te lo magni e no te lo sburti. Se dopo per\u00f2 ti te entri nel stato d’animo de negativit\u00e0, alora de quel qualcossa te veder\u00e0 solo che le sfighe, che xe sempre, ma che magari normalmente no te vedi perch\u00e8 impegn\u00e0 a vardar altro. Eco, se invece te se focalizi su quel’altro, alora te veder\u00e0 che ogni sfiga tira solo che nove oportunit\u00e0. Impreviste e diverse de quele programade, ma pur sempre oportunit\u00e0, basta saverle ciapar e no lassarse butar zo. El positivo no xe quel che ne capita, ma quel che ne capita pol esser visto positivamente sempre, basta no amplificar el negativo de quel che, inegabilmente, gavemo comunque perso. Daghe. Tira pi\u00f9 un pel de sfiga che un caro de buoi.
\nIncomincemo a incontrar diversi cani che bagola liberi. Xe tuti tranquili. Nissun che ghe cori drio ai ciclisti per rosigarghe i calcagni. Nissun che ga un paron. Libero canide in libero marciapie. O qua i fa una selezion, e quei che ga el cinciut fa una bruta fine, opur i cani ga impar\u00e0 che xe pi\u00f9 vantagioso gaver un poco de quel che se ciama. \"\"<\/a>Un can se afeziona a Guy, el ghe cori un poco drio, ma dopo el fa amicizia con Italo. El se distira e el se ciapa le cocole sula panza tuto contento. Mi studio el comportamento. Valuto l’etologia dei due mamiferi. Voio provar l’aplicazion interspecifica del principio dele cocole sula panza mamifera. Eco l\u00e0 un gato. Gato xe mamifero. Elaboro. Can : omo = omo : gato. S\u00ec, podessi funzionar. Provemo. \"\"<\/a>Me distiro a panza in su vizin el gato. Nema. No riva cocole sula panza. Potenti aparati tradutori de pensieri felini me rivela che el felide sta pensando: \u201cma cossa fa sto mona?\u201d. Mission falida. La giusta proporzion xe: gato sta a can come gato sta a omo, cio\u00e8 no el ga pel cul entrambi.
\nLe ombre pian pianin se slonga, se sta fazendo sera. Xe de incominciar a cercar dove dormir. Trovemo un picio residence con intorno adiritura un boscheto ricostru\u00ec. Lusso. Ma no entremo, sar\u00e0 decisamente over budget. Trovemo un altro posto a quatro stele. Novo. Col ping pong. Col calceto. Se inamoremo. Xe tuto spalanc\u00e0, ma no xe nissun. Dopo una mez’oreta, andemo vanti. A Babin Potok trovemo una caseta int’el verde con una stela sola. Una stela? Esisti stanze a una stela? Semo ‘ssai curiosi. \"\"<\/a>I mati xe tipo figli dei fiori un poco apassidi ma cocoli. La casa gaver\u00e0 una stela sola ma xe normalissima. Anzi, ghe xe adiritura el wifi, coss’te vol de pi\u00f9? Lighemo le bici ai alberi int’el pr\u00e0 e andemo su. I ga a disposizion tre stanze pi\u00f9 el bagno, noi ocupemo due. Ma semo solo noi in tuta la casa. Bagolemo in mudande pel coridoio, tanto, chi te vol che ne vedi. Eco, apunto. Al’enesimo mudanda tour, bechemo i paroni che ghe sta mostrando la stanza libera ad altri potenziali ospiti. Ops. Sorry. Se scondemo ridendo. I novi potenziali ospiti ghe disi che la casa xe ‘ssai bela, ma che i preferissi andar avanti. Esteti, no i gaver\u00e0 aprez\u00e0 le mudande coi orseti de Mauro (advisory: questo dettaglio potrebbe non corrispondere alla realt\u00e0 \ud83d\ude1b ).
\nZenemo e notemo un tavolo de caciatori enormi. Questi la guera se la ga fata sicuro. Chiss\u00e0 che storie che i ga drio, chiss\u00e0 quante robe i gavessi de contar. Lungo la strada, no gavemo ancora incontr\u00e0 ferite particolari. Forsi qua le se ga bastanza cicatriz\u00e0. A ocio, comunque, xe el caso de lassar che i caciatori magni in pase.
\nRientremo, ma prima de dormir se distiremo sule panche per vardar le stele cadenti. Ecola. Mi no la go vista, maledeti. Eco un’altra. No, quel xe un satelite, te vedi che el va pian? E quel? Un ufo?
\nL’odor del’erba, l’aria de montagna, l’umidit\u00e0 del bosco intorno, le stele cadenti, la fadiga dela giornata, le sfighe, le oportunit\u00e0 vissude, el filtro antinegativit\u00e0, i incontri, i mamiferi, tuta la vita dela giornata se amalgama nel clima dela serata, e la magia che se respira avolgi in toto la profondit\u00e0 dei nostri discorsi. Guy disi che in montagna se scoresa de pi\u00f9. Xe cuss\u00ec, per l’altitudine. Scusa, l’aqua no boi prima? E l’aqua che boi cossa xe, se no tante pice scoresete idrauliche? Ga senso. S\u00ec.
\nA luned\u00ec, che se riva in Bosnia!<\/p>\n