{"id":65967,"date":"2013-11-28T08:23:29","date_gmt":"2013-11-28T07:23:29","guid":{"rendered":"https:\/\/bora.la\/?p=65967"},"modified":"2017-01-20T11:18:23","modified_gmt":"2017-01-20T10:18:23","slug":"trieste-kotor-in-bici-atto-secondo-sud-est-no-vol-dir-discesa","status":"publish","type":"post","link":"https:\/\/bora.la\/2013\/11\/28\/trieste-kotor-in-bici-atto-secondo-sud-est-no-vol-dir-discesa\/","title":{"rendered":"Trieste-Kotor in bici atto secondo: sud-est no vol dir discesa"},"content":{"rendered":"

Qua le puntate precedenti<\/a><\/p>\n

\"\"<\/a>Econe qua, apuntamento ale 9.00 del 4 agosto in Piaza Unit\u00e0, pronti per partir. Come el 4, no iera el 3 agosto la partenza? De sabato, che poi saria pi\u00f9 logico, per ciapar un giorno festivo in pi\u00f9. Eh no, perch\u00e8 el 3 poi gavemo scoperto che qualchidun gaveva un matrimonio (auguri Francesca e Alex). Quindi ne xe sembrado pi\u00f9 furbo partir el giorno dopo. Inutile dir che al sposalizio se semo contradistinti per moderateza per eser freschi come rose la matina…
\nEl bel de esser ormai ala quinta rumizada, dopo Berlino, Monaco, Budapest e Cracovia, xe che tuti se speta che con l’esperienza un sapi tuto quel che xe de far e che ghe vegni in automatico. Invece no, ala fine spesso l’esperienza se trasforma in ecessivo relax, e a prevaler xe quel senso de blandeza che te fa pensar \u201cma bon, se ala fine go za fato altre zinque volte vol dir che xe propio una monada, cossa ocori prepararse, penseremo co sar\u00e0 el momento\u201d. Cuss\u00ec, le borse le go preparade ale 22 dela sera prima, de ritorno del sposalizio (eh bon, tanto sempre quel xe de meter dentro). I copertoni, che ormai xe diventadi slick, no li go cambiai (eh bon, xe agosto, speremo che no piovi, e al limite ander\u00f2 pi\u00f9 pian). No stemo parlar de pulir la bici o simili (eh bon, tanto la ga de sporcarse, no?).
\nItalo me se avicina ala bici e varda la cartina che go sula borsa del manubrio. Ara! Che bravo, te ga stamp\u00e0 la mapa dela prima tapa! Ma speta. Qua sta cartina mostra tuto un poco tropo in zo. E noi no passemo per Buie. E qua xe segn\u00e0 l’arivo a Parenzo. Ma che cartina xe? Eh, de co gavemo fato la Parenzana in marzo 2012. Quindi ancora prima dela rumizada verso Cracovia. Eh bon, xe che la ga bei colori, ara che ben che la sta, la xe in pand\u00e0n cola bici!
\nAd acompagnar la nostra partenza xe vegnui anche in clapa i Bisiachinbici, tuti in maia giala. Zonta Cionn, che ne acompagner\u00e0 el primo giorno, salimo su per Corso Italia in diese, per la gioia dei automobilisti che ga de superarne.
\nI primi scampoli de libert\u00e0 te li assapori a San Giacomo, co te rivi sula ciclabile. Ala fine purtropo xe ‘ssai comun no aprezar mai fin in fondo quel che se ga, ma mi son abastanza convinto che sta ciclabile sia una dele pi\u00f9 bele tra tute quele che go fato fin desso. El panorama xe qualcossa de unico e meraviglioso, la pendenza xe legera e te pol goderte un tramonto spetacolare.
\nRivemo ala salita de Catinara. Mauro punta e supera i bisiachi. \u201cDaghe! A Monfalcon no i ga salite, no i sa come che se fa!\u201d. Poco dopo, Italo afianca e se meti a ciacolar con un sior che se ciama Italo anche lui. I se meraviglia a vicenda, no i ga mai conoss\u00f9 altri Itali. Italo senior nota el coprisela in gel de Guy, e ghe disi che solo i figheti usa quela roba. Sar\u00e0, per\u00f2 co te fa un viagio de 1000 chilometri xe fondamentale. No digo de portarse el cussin del divano, ma mudandoni col panolon e selin morbido e copriselin in gel rendi tuto pi\u00f9 rilassante. Xe diferenze che no te senti subito, ma dopo un do giorno, co no te gaver\u00e0 nissuna voia de alzarte del selin perch\u00e8 za te sa come sar\u00e0 poi risentarte. Come anche la forcela amortizada. Se te la blochi sul’asfalto te par che no cambi ‘ssai. Idem i guantini. Ma dopo qualche giorno anche ste minime diferenze te le senti tute su mani, polsi e brazi. Le nostre bici xe tute mountainbike amortizade davanti. Esclusa quela de Mauro, che per\u00f2 no sembra risentirghene pi\u00f9 de tanto. Come spesso sucedi, ognidun ga quel che se merita e che pi\u00f9 ghe corispondi. Cuss\u00ec la mia bici xe una Giant Rincon, quela de Italo xe una Beone (che evidentemente in inglese se legi Be One \ud83d\ude09 ) e quela de Guy xe una Mazitech (S\u00ec, so, se disi Mathitech, ma Mazitech fa pi\u00f9 rider).
\nA met\u00e0 ciclabile se agrega ala clapa Erich, che far\u00e0 solo el primo giorno, come Cionn. Fa caldon. Le previsioni xe robe sahariane. El termometro dela bici in efeti segna 43\u00b0, ufo. \"\"<\/a>La pausa radler de Mahnic xe obligatoria. Italo, che iera ultimo e anaspava, se sveia de colpo co senti la parola \u201cbira\u201d e tira el fughin. Gavemo trov\u00e0 come recuperarlo. Italo : bira = Popeye : spinaci. Davanti de un panin, el ne spiega la sua teoria dei scambi termici, che bisogna far in continuazion. Caldo in testa \u2013 aqua sula bandana, caldo in cuor \u2013 bira in panza, pie che fuma \u2013 via le calze, per la gioia un poco de tuti.
\nGnanche el tempo de ripartir, e la seconda bira xe servida. Erich monta sula bici e va longo in direta, de fermo. Chi casca buta de bever, xe la dura lege.<\/p>\n

\"\"<\/a><\/p>\n

In Slovenia, le strade xe imerse nel verde e decisamente piacevoli. El trafico xe qualcossa de inesistente, e te se senti bastanza sicuro de poder ciacolar in tranquilit\u00e0. \"\"<\/a>Un stargate ala fine de una dele tante salite te fa vegnir voia de teletrasportarte diretamente a Kotor, ma strinzemo i denti e proseguimo.
\nIncomincemo a risentir de quel che sar\u00e0 un dei grandi problemi del viagio: la cronica mancanza de aqua. Fontane no ghe ne xe e neanche anime vive a cui domandar. Trovemo un campeto de balon. I gaver\u00e0 una spina per l’aqua no? Italo xe sicuro de s\u00ec. Dei, muli, xe un campo de balon. Ci\u00f2, i bagner\u00e0 l’erba con qualcossa no? O i ghe suda sora e basta quel per farla cresser? El ragionamento fila. Controlemo. El campeto xe in cemento. Nema voda. Qualchidun ne risenti pi\u00f9 de altri.<\/p>\n

\"\"<\/a><\/p>\n

Finalmente, in mezo ai fantasmi, trovemo una casa dove par che ghe sia qualchidun. Domandemo se i ga un poca de aqua. I xe gentili, i ciol le borace e i va a riempirle dentro casa. Ora che i finissi tuti i tramachi, se le semo za bevude in un fi\u00e0, e ghe toca far un secondo giro. \"\"<\/a>I ne ofri anche caf\u00e8 e gati.
\nRiva el momento: se separemo de Erich e Cionn, che torna verso Trieste. Noi restemo in zinque, quei che proseguir\u00e0 fin Kotor. Ghe la faremo? Le robe sembra esser pi\u00f9 dure del previsto. No gavevimo fato i conti con tanto caldo, con cuss\u00ec poca aqua e gavevimo anche sotovalut\u00e0 i continui saliscendi. De bon auspicio, rivemo in un cimitero, dove Italo se senti momentaneamente a casa. El par propio cop\u00e0, e no gavemo gnanca una bira de darghe per farlo risuscitar come prima. <\/p>\n

\"\"<\/a><\/p>\n

Dopo una bona mez’ora passada a sburtar el radicio che no xe, rivemo ripartir, col sol che ardi un poco de meno. La meta finale de ogi xe Matulji.
\nA Zejane trovemo gente che sta montando i tavoli per una sagreta. Ormai pedalemo de tante ore, i posti xe diversi, la lingua xe diversa, se sentimo ormai isolai sule nostre bici, pici distorsori spaziotemporali, za lontani de casa. Cuss\u00ec, co dei altoparlanti dela sagra sentimo La mula de Parenzo, Quel mazolin di fiori e Ciribiribin, ne par una roba che ga del’incredibile. Se dimentichemo che in realt\u00e0 i chilometri che ne separa de Trieste xe meno de 100, ben pochi. E co vado a ordinar le bire, el mato me domanda \u201cin boza?\u201d.<\/p>\n