8 Novembre 2022

Aperipupkin, la nuova formula del Pupkin Kabarett

el sunto Ieri xe iniziada la nova stagion del Pupkin Kabarett, in formato aperipupkin con novi orari veci-friendly

Ieri son andado a veder el Pupkin Kabarett. Iero ‘sai incuriosido dala nova formula, che recita: Aperipupkin, basta con le ideologie, è l’ora dell’aperitivo. Che a Trieste xe un claim vincente.

E infati ga vinto.

Tuto partiva ale 18.31 precise, per cui per sicureza e paura de perder el posto in prima fila al’aperitivo, son rivà ale 18.15. El bar verzi comunque ale 18.31, no se scampa. Comunque, intanto che Laura Bussani meti musica, se pol ciorse un bicer, sbecolar dal bufèt messo a disposizion e ciacolar coi protagonisti de quel che vegnirà dopo. El spetacolo vero e propio comincia ale 19.21 precise circa e dura un’oreta e meza circa. Senza la pausa però. Ma diria meo cussì. El Pupkin ga una storia de 20 ani e ghe vol sai ben al suo publico, cressudo (qualche malizioso diria “inveciado”) con lui. Cussì desso orari de un tempo (21.21) no gavessi più ‘sai senso e l’orario aperitivo xe l’ideale. Almeno, mi go ‘sai aprezado. E quindi forsi son vecio, chi pol dir. O forsi semplicemente xe cambiade le abitudini dele persone e l’oferta dei locai in cità. Bu. Comunque la vera svolta saria propio seguir el spetacolo col bicer e el stuzighez in man, come nei veri cabarett che se vedi nei film, ma me sa che el teatro no ghe vegnissi fora incolume.

Comunque el spetacolo me ga piasso. Oltre ale robe storiche come la vecia Nives che no pol far altro che organizar rave party al’Itis (spoiler: el dj Italo1922 ala fine tira i crachi!) o i sogni distopici de Mizzi o el requiem dela sinistra de Donge ghe iera dele novità: un video de “interviste periferiche” de Matteo “La Vecia” Verdiani, in cui el ghe spara tre domande a sorpresa a tre persone in un rion (sto giro Barbacan, el video xe vegnudo sai ben anche grazie ala simpatia dei protagonisti); due partecipanti a spritz factor aspiranti suicidi triestin e furlan (quanti ingredienti!); el mulo Gianfranco Berardi che ga anticipado el spetacolo del 10 e 11 novembre, I figli della frettolosa. E la niente band, ‘bastanza ben invece.

Ben bon, i prossimi apuntamenti xe el 21 novembre, con la stessa formula, e dopo invece de domenica: 4 e 18 dicembre, con spetacolo ale 18.01 e dopo l’aperitivo (forsi meo ancora come scelta de orario).

Tag: .

Lascia un commento

Il tuo indirizzo email non sarà pubblicato. I campi obbligatori sono contrassegnati *