GNOCHI DE PAN A LA VECIA
Avanti tuta coi gnochi! E tanto per restar coi piati de mia nona – perché, ve confesso, anca le none de ogi le ga avù le none, e sicome butar via la roba vecia, co la xe bona, fa sempre un fià pecà – ogi andemo ‘vanti per la nostra strada a far i gnochi de pan a la vecia magnera.
Cossa se dopra
20 DECA DE MOLENA DE PAN (saria come a dir la molena de zinque panini);
3 OVI
10 DECA DE PARSUTO
5 DECA DE BUTIRO
UN QUARTO DE LATE
FARINA, SAL E PANGRATÀ QUANTO BASTA.
Come se fa
Missiè la molena de pan coi ovi, un poco de butiro, el persuto taiado a tocheti, el late, la farina e un fiatin de sal.
Lavorè tuto ben, ben e preparè col paston, che ve sarà vegnudo fora, una struza che meterè in un tovaiol longo, dove la dovè serar ben streta.
Metè el paston nel tovaiol in una pignata piena de aqua boiente salada, lassando boir pian per zirca vinti minuti.
Dopo gaver tirado fora el tovaiol de la pignata e la struza del tovaiol, la taierè a fete né ssai sutili, né ssai grosse, ma giuste! Le meterè int’ei piati e le condirè col pangratà rosolado int’el butiro. Un piato de lecarse i bafi!
Ma se, per combinazion, ve xe vanzà del sugo de rosto de la domenica drio, beh… butè al porco el pangratà e ‘l butiro, doprè el sugo de rosto e conosserè quel che xe el vero, unico e solo savor del magnar a la vecia!
E che basi, bori e buzolai no i ve manchi in piato mai!
Gnam che bontà! ma anche dei gnochi de pan mi go un diverso ricordo infantil ‘ssai minimalista.
Questo xe genuin e gustoso magnar ala vecia. quei gnochi de pan monacali dela mia infanzia iera fati col pan ,chissà se un ovo tanto per guantarli insieme, me ricordo persemolo e forsi do scorze de panzeta duuuuura taiada e missiada drento e farina a biondo dio. Le monighe inveze de un bigolo taià le fazeva bale , circa triple dei gnochi de patate e dopo boide cussì le ne le presentava con un bicc de butiro cussì che no le ne se incugnassi ntel gargato.
Co’ son cressuda, anche mi me son cimentadaa far gnochi de pan con tuti i crismi e i carismi, come che ga spiegà la docente. col sugo de rosto. la fin del mondo!
Panada e gnochi de pan …per mi come la madeleine per Proust !