26 Giugno 2015

Bob Dylan, per sempre muleto

el sunto "Ieri, 25 luglio 2015, dopo 24 ani, semo tornadi a Ljubljana per veder el mito del folkrock Bob Dylan."

Konte Interzona, l’autore delle mitiche lezioni di filosofia in triestino, ci invia questa recensione del concerto di Bob Dylan a Ljubljana.

La ciapo longa, ‘ssai longa: iera el 10 giugno del 1991 e con l’amico Luka semo andadi al nostro primo concerto: Bob Dylan live at Bežigrad. Ancora per pochi giorni Ljubljana saria stada a tuti i efeti Jugo (anche se per la mia generazion de triestini noi continueremo ad andar in Jugo a far benzina…) Ieri, 25 luglio 2015, semo tornadi con Luka a Ljubljana, sempre per veder el mito del folkrock. Xe pasadi 24 anni e, mentre Dylan no sembra sentirli (quela turné, iniziada già nel ’88 in realtà non xe mai finida), mi inveze me son scontrado con una serie de robe che me ga fato pensar che el vecio son propio mi.
Pol darse che semo noi triestini a esser per natura un poco rompicoioni e dovemo sempre trovar qualcosa che non va. Digo questo perché la gran parte del publico (de tute le età, anche se mi jero comunque sora la media e l’unico mona con la maieta onta e sbregada del concerto del 91…) ghe ga ‘ssai piasso l’esibizion, giudicando dei aplausi dopo ogni canzon.
A diferenza del concerto al Bežigrad, stadio al’aperto, qua ierimo nel novo e ultramoderno Arena Stožice. ‘Ssai bel, no digo gnente, ma za se un fuma più dela Feriera come el mio amico Luka xe ‘ssai longhi. Te ghe chiedi a quei cocoloni de muli che fa la security se te pol andar fora un atimo a fumarte un cichin e la risposta xe: “Te son un VIP? Fame veder el biglieto?”. Insoma go scoperto che ogi anche fumarse un cichin xe diventada roba de fighi. Per fortuna se pol ancora ciorse una bira, anche se nel fratempo la Laško xe diventada una bira olandese, ma se la semo bevuda comunque.

Ma rivemo al concerto: Dylan, che, come sempre no ga pel cul nissun, comincia puntuale ale 20.30, mentre più dela metà dela gente xe ancora in fila per entrar (eco questo non xe cambiado nei anni; per gestir le code xe sempre stadi un poco lole i balcanici), ma, da bon triestin penso: “che se ciavi, staremo più comodi”. La prima canzon xe Things Have Changed e za qua Zimmerman meti le mani avanti.

Mi son rimasto ancora al mulon che se piturava de bianco el muso e ghe zigava ai potenti che faremo la rivoluzion e cambieremo el mondo, ma efetivamente qualcossa xe cambiado. In primis Dylan no toca la chitara per tuto el concerto. O canta o al limite sona el piano. Per carità, otimo pianista, ma me ricordo la schitarada de Bežigrad su All along the watchtower e un poco vado in para… Andemo avanti con She Belongs to Me, Beyond Here Lies Nothin’, Workingman’s Blues #2, Duquesne Whistle, Waiting for You e Pay in Blood. Tute bele canzoni, testi figoni e impecabili esecuzioni del’otima banda de Dylan, ma tuto ‘ssai in stile teatro o pianobar.

Non ghe xe el morbin dele canzoni incazade dei sessanta e setanta che me piasi a mi. Ma el publico sembra pensarla diversamente e apreza la scelta de stile de Zimmerman. L’otava canzon xe finalmente una de quele che spetavo: Tangled Up in Blue, ma riarangiada in un modo che me sembra più Michael Bublé che el ribele che ga sconvolto un intiero genere musicale passando dela chitara acustica a quela eletrica. L’ultima canzon dela prima parte del concerto doverà ancora spiegarmela qualchidun; I’m a Fool to Want You, cover de Frank Sinatra!?! Ma perché? Per ‘ssai de meno gavevo mandado a cagar Joan Baez a Udine nel 2000, ma, apparte Luka che continua a zigarghe “Nudo!” a Dylan, el resto del publico sembra aprezar el repertorio e dunque stago zito e vado a beverme un’altra bira olandese al banco.11651207_10207357592522763_1574430097_n
La pausa (tanto per parlar a svodo ben de Trieste volessi ricordar che el Boss, anche lui una vecia ruga, ga cantado ininterotamente per più de tre ore nel mitico concerto al Rocco…) no la finissi più e el mio amico sta scapotando perché non i lo lassa fumar (ma ala fine la spunterà lui!). Mi penso sempre de più de esser un rompibale. Tuti xe ‘ssai contenti e mi no go gavudo gnanche una dele canzoni in cui speravo, ma confido nel “secondo tempo”.

Ricomincemo dove gavevimo lasado: High Water e el novo arangiamento de Simple Twist of Fate. Me meto l’anima in pase capindo che no lo vederò usar una chitara e me consolo con i tochi de armonica. Andemo avanti con una serie de scelte che non me esalta: Early Roman Kings, Forgetful Heart, Spirit on the Water, Scarlet Town, Soon After Midnight, Long and Wasted Years e poi el concerto se concludi con un’altra cover, sto giro de Yves Montand; Autumn Leaves.

Per fortuna sto giro Dylan ne concedi el bis (quel dipendi de come ghe gira quel giorno) e finalmente ne regala el suo gioielin Blowin’ in the Wind sempre nel novo arangiamento più melodico. El concerto se concludi prima dele 23 con Love Sick. Resta un poco de amaro in boca (e non xe la Laško), ma Dylan non se discuti: la sua storia parla per lui e giustamente el fa quel che ga voia de far.

Al publico ghe ga piasso e dunque son mi che ragiono sempre con la filosofia del “iera meio co iera pezo”; me manca la Jugo e la chitara eletrica!

Per concluder con un ragionamento positivo son ‘ssai contento de eser tornado dopo tanti anni con el mio amico a Ljubljana perché ai concerti xe sempre figo andar più per la gente e per el viaggio che per el concerto in sé e in quel senso penso che son restado ancora muleto. Dylan lo ringrazierò sempre per le bele canzoni che ne ga regalado, ma forsi se l’andassi un poco meno in Friul e vegnissi qualche volta a Trieste riciapassi un poco de morbin e, magari dopo un bon sprizeto, ghe tornassi anche la voia de sonar la chitara…
#BobNoAndaraSanDaniele #volemoDylanalSardonDay

Konte Interzona

Tag: , .

Un commento a Bob Dylan, per sempre muleto

  1. Joe Scimmia ha detto:

    L’unico idioma che ga una parola che pol tradur “scimmiosità” xe il triestin: W il morbin!

Lascia un commento

Il tuo indirizzo email non sarà pubblicato. I campi obbligatori sono contrassegnati *