Per bon, for real 3 – Dal vostro inviato triestin a New York, Ricky Russo

New York City Bay Ridge Brooklyn USA, giugno 2013.

La prima volta qua xe stada la scoperta de La Merica. Come un Riccardoforo Colombo che basa per tera al JFK e che se confronta con sta popolazion locale che comunica in una lingua incomprensibile, magna robe sconosciute e no sa niente de Trieste.
La seconda volta qua xe ‘sai diversa perché desso conosso un po’ sto Novo Mondo. Ieri, ad esempio, scarpinavo spavaldo e co’ la testa tra le nuvole sulla Broadway, quando ad un certo punto, due indigeni a caval de una bici me taca a far segnali de fumo.
E mi digo “Speremo no i voli el mio scalpo, che gnanche lo go”. Poi vedo però che no i xe minacciosi e i sa el mio nome: “Ricky, Ricky…”. E allora penso: “Ecco che anche a New York i me riconossi, Ricky Russo the famous writer…”. Ah no, po’ ciò!
Ma dopo, cuco meio. E che mona che son! Iera i miei amici italo mericani Giulio Serafini e Michele Palazzo!

Qua xe LA MERICA. El sogno. American Dream. El mito. Yes We Can. La ricerca dell’oro. El novo mondo. La terra delle grandi opportunità. Ecc. Però scordeve che i ve regali qualcossa. Niente. Zero. Un klinz. Te pol esser Obama, Cristoincrose o l’ultimo dei mona, no gifts. No sisti. Niente regali. Nianche na pissada. Da Pret A Manger sulla Broadway, dopo gaver bevù un caffè, per andar in bagno go dovudo chiederghe la combinazion da digitar su una tastiera messa sulla porta del restroom: 7123. Giuro. Go pissado dentro a una fottuta cassaforte.

Sotto al Flatiron Building un barbon chiedi moneda intonando “Like a Virgin” de Madonna. Quando te ghe passi davanti el smetti de cantichiar e el te disi: “Mr Rockefeller gimme some change!”. Homeless with best Swag.

El mio bieto da visita con la faceta sorridente sui gratacei de New York e la scritta “the most enthusiastic man in new york” sta fazendo successo (grazie Giada!). Tonite ghe ne go lassadi un paio e ricevudi in cambio altrettanti. Pierrrraggio. Tutto ok. Ad un certo punto però me go incasinà: in scarsela go missiado i miei bieti con quei dei altri e penso de gaverli anche dadi a qualchedun, convinto che fossi i miei. Insomma fazo girar i contatti. Nevermind se xe miei o no. L’importante che circoli el bon karma del smart people connector.

Al concerto figggon degli Oblivians, al Pier 17 sotto un tendon mentre fora rivava seciade de acqua, gavevo vicin de mi tra el pubblico, nientemeno che Jon Spencer. Volevo proporme per la Blues Explosion, o prestarghe la mia ombrela visto che el iera col giubotin de jeans tuto inzupado de piova… ma dopo me go ricordado che i rocker veri odia le ombrele. Uh! E quindi go subito butado in mar anche la mia de umbrella.

Ascolti consigliati:
MADONNA “Like A Virgin”
OBLIVIANS “I’ll Be Gone”