4 Giugno 2012

Le terme del Castel de Gyula: la prima anteprima de “Zinque bici, do veci e una galina con do teste”, el novo libro del Monon Behavior

Ucio e Ciano. Pupolo de Michele Zazzara

Eco come promesso la prima anteprima assoluta de una dele storiele del novo libro mio e de Michele Zazzara, che se intitola Zinque bici, do veci e una galina con do teste, per i amici 5-2-1-2. Questa xe una dele storiele che Ucio e Ciano se conta in osmiza, e le xe scrite tute soto forma de dialogo, insoma volendo se podessi dir quasi che le xe dele “maldobrie dei nostri giorni”. A Ucio e Ciano le ghe vien in mente via via che i legi el nostro diario de viagio in bici de Trieste a Budapest. In particolare, questa storiela segui el capitolo in cui se semo lanciai int’ele terme de Ptuj. E i do veci finissi parlando de cani e gati perchè, nel capitolo dopo, incontreremo i ferocissimi cani ungheresi. Insoma xe tuto tacà dei in qualche maniera.
Bon, ricordeve che el libro se trova za nele librerie più bobe de Trieste.
Opur se no gavè voia de caminar, podè comprarlo online qua.
Qua xe la pagina facebook.
Ah, la presentazion sarà mercoledì 13 giugno alle ore 18.00 al zircolo Officina in via Manzoni 9 🙂

In Osmiza: le terme del Castel de Gyula

– De balin ale terme i se ga butà, te ga capì, miga moni!
– “Miga mone” se disi, moni no esisti.
– Bon, indiferente, miga mone! Ti te son mai andà ale terme?
– Ah no po’. Mi pena che riva un poca de zima coro de boto in qualche terma, a butarme un fià in smoio. Anca a Ptuj iero, me ricordo sì de tuta quela muleria che sbrissava zo pe’l scivolo, un remitur che no te digo.
– Eh, anca mi me piasi ‘ssai le terme. Sa cossa? Desso che i ga dito che riva bora scura la prossima setimana, noi se ciapemo e andemo ale terme, coss’te disi?
– Sì, sì, ‘ndemo, mi za desso go zima. Vara, go ciolto sti novi guanti, ma li go doprai un zinque volte e desso go za fredo de novo. No so mi, cossa i ga, la data de scadenza anca lori? Te li pol doprar solo un diese volte e dopo no i funzia più?
– Ma no, no dir monade, xe propio una roba fisiologica del tuo corpo, che dopo un poco el se abitua, no? Scusa, pensa al vin. Al’inizio te se imbriaghi con un bicer, dopo però el corpo se abitua, e te servi do biceri per impetessarte, e dopo tre, quatro…ma no xe miga che te disi che el vin no funzia più. Sempre quel xe el vin, solo che ti te se ga abituà e te devi bever de più. E istesso xe coi guanti. Sempre guanti xe lori po’, solo che ti te se ga abituà e desso te senti zima come prima. Alora te ga de meterte un altro per de sora, tuto qua.
– Orco tocio quante che te sa, ciò. Alora anderò comprarme un secondo per de meter de sora. Però dopo andemo ale terme. Con do per de guanti.
– Fata la xe. Ciò, me vien in amente la storia dele terme del Castel de Gyula, in Ungheria. Te le conossi?
– Che castel? No, no conosso, contime.
– Eh, xe belissime quele terme, gaver un poche de fliche per l’aparechio saria ‘ssai bel andar propio là. Tanti ani fa però le iera diverse, co ghe iera andai Furio Garbaucich e Duilio Ioza…

Duilio Ioza e Furio Garbaucich. Pupolo de Michele Zazzara

– Ioza el se ciamava?
– No, lo ciamavimo noi cussì perché el iera un che ogni volta che ghe iera un poca de zima ghe iozava drio man la napa, povero mulo. Lui odiava la zima con tute le forze, difati dopo el xe andà a star in Brasil, che là xe più caldo.
– Ah che bel el Brasil. Me gavessi ‘ssai piasso andarghe co se iera putei…
– No ga importanza. Scolta questa che merita. Insoma te parlo de una quarantina de ani fa, co ghe iera stà quel’inverno teribile, no so se te se ricordi, che de novembre fin squasi aprile se bateva broche ogni giorno.
– Ostia se no me ricordo! E anca bora iera drio man, robe de mati. Quela sì che iera una siora bora! No come desso, che qua me par che tuti se caghi sempre int’ele braghe per un poca de bavisela.
– Ma se sa che no xe più la bora de una volta, po’. Anca le corde per tegnirse i meteva una volta, e desso no i meti più.
– Chi questi?
– Cossa so mi, lori po’, sempre lori dei. Comunque, te contavo, quel’inverno iera cussì zima che gnanca el cudic’ gavessi rivà a impizar un fogo.
– Te sa sì, me ricordo che co se basavimo co’le putele iera cussì zima che ogni tanto te restava le lingue tacade, per via che le se iazava, ecolo.
– Sta qua me par un poco una monada. Però me ricordo benissimo che iera tute le gatare disperade perché i gati co che miagolava no se sentiva gnente, ma vegniva fora tocheti de iazo dela boca.
– Iazo dela boca?
– Sì, iera i miagolii po’, che iera cussì fredo che i se iazava anca quei. E le gatare, no sentindo quel che miagolava sti gati, no le capiva coss’che i voleva. Solo dopo bastanza tempo una de lore ga capì che bastava meter quei tocheti de iazo sul fogo e co i se squaiava se sentiva el miagolio, e cussì le podeva capir coss’che i voleva.
– E cossa i voleva?
– Che le ghe dassi de magnar.
– Ah, che strano ara, no gavessi mai dito. Comunque scusime, ma anca sta storia qua me par bastanza una monada, a mi no te me la conti. Pitosto me sovien che co se andava in molo San Carlo, a far le gare de chi che pissa più lontan, no iera più bisogno de contrastar su chi che gavessi vinto, perché se iazava tuto e restava là, come testimonianza propio.
– Sì, sì, xe vero, me torna in amente anca a mi questa. Tanto che verso la fine del’inverno iera ormai pien de pissade iazade su tuti i fianchi del molo, che pareva squasi le costole dela balena de Pinochio, ciò.
– Ah ah ah, e el molo iera la spina dorsale, te sa sì. E anca el mar iazà, quando mai se ga più visto?
– Eh, ma quel me ricordo che gavevo leto su segnalazioni una letera de siora Jole Zlatorog, che gaveva dito che iera colpa del comun, che el se gaveva dismentigà de butar el sal int’el mar, aciò che no el iazi.
– Giusto po’, se no te meti sal me par poco ma sicuro che dopo se iaza tuto, ah.
– Un sior inverno quel. Che po’ iera l’ano in cui iera ‘ssai pupoli in giro pe’l mondo, che pareva che scominzi la terza guera mondiale un giorno sì e un anca. Ma a Trieste no, a Trieste se parlava solo che dela zima e dela bora. Sa come che xe i triestini co che xe bora…pol vegnir anca i estraterestri a conquistar el mondo che lori comunque no i gaverà pe’l cul e i continuerà a parlar de coss’che no sufia la bora. E se un estraterestre vegnissi romperghe le bale, sicuro i ghe disessi: “Ma no desso dei, remengo tuo. Pitosto, te ga visto che bora ah?”
– Eh sì, xe vero, xe propio cussì!
– Bon, insoma, te ga capì de che inverno che parlemo, dei. Alora Furio Garbaucich e Duilio Ioza quela volta i passava una sera sì e una anca in qualche betola no, per risparmiar sul riscaldamento de casa. E per beverse un goto in compagnia.
– Un poco come noi, dei.
– Un poco come noi, sì. Fato sta che una de quele sere ghe ga tacà boton un foresto, che no i ga rivà a capir de indove che’l iera. E de cossa el ga tacà parlarghe po’, oviamente dela bora. El ghe fa: “Ciò, coss’che sufia el vento qua, robe de mati! Ma come fe a viver cussì?”
– In triestin el ghe ga dito?
– Ma no, el iera foresto, el ghe parlava par talian ma con acento de fora. Co i ga inteso sta domanda, Furio e Duilio i se ga vardà int’ei oci e i ga tacà a rider come mati. Te sa come che i iera fati, che i remenava un poco tuti, e cussì i ga scominzià a far un poco le bobane anca col foresto. I ghe ga dito: “Ti pare forte sto vento? Arda che questo no è gnente, speta di vedere co che sufia la bora vera!”. Al che quel’altro xe rimasto come un pampel, e lori i se la rideva tuti contenti.
– Ah, i lo cioleva pe’l fioco. Me ricordo sì che i iera dele remenele numero uno.
– E no i ga miga finì cussì. Visto che el mato el iera veramente un poco tandul e el ghe credeva a tuto, i ga tacà a contarghe che la bora la fa ‘ssai ben per la respirazion e pei polmoni, che la ga un efeto medico, come, più meio ancora che el kren.
– E el mato ghe credeva?
– Ostia se no el ghe credeva. A un certo punto el ga anca tirà fora un blocheto e el ga scominzià a ciorse nota de tute le monade che lori ghe contava.
– Un giornalista iera?
– No ga importanza. Ma te pol imaginar che co Furio e Duilio ga visto che el se cioleva diritura nota, i se ga imborezà ancora de più. I ghe ga contà che i triestini, per mantignirse cussì bei giovini come che semo tuti, i speta la bora, ma quela forte, quela a dozento chilometri al’ora, per andar a Barcola, spoiarse nudi e meterse un’oreta al giorno cussì, a far ginastica contro vento. Che te iuta la circolazion, la pele e i muscoli. E che te servi anca per viver de più, difati xe una roba squasi compagna del’ibernazion po’, che con quela te podessi viver diritura per sempre. E dopo i ghe ga contà che una volta, se parla de secoli fa, ghe iera stada una bora diritura a trezento chilometri al’ora, e che quei che quel giorno i gaveva rivà a andar a Barcola a farse i “bagni de bora”, i iera ancora là vivi che i contava sta storia.
– Cussì i ghe diseva? E el mato ghe credeva?
– El mato scriveva come un mato, drio man. E quei altri do se la rideva sempre de più e i zontava monade sempre più fora coi copi. Che iera de imparar a star su a gamba fasul, che cussì te fazevi esercizio anca per l’equilibrio…
– Sempre nudi a Barcola questo?
– Sicuro, e che dopo se te volevi veramente ma veramente copar tuti i microbi te dovevi tirar una bela clanfa int’el’aqua iazada.
– Ma se la iera iazada come te fazevi scusa? No el sarà miga stado cussì tananai de crederghe anca a questa!
– I muli lo ga inzinganà per ben. I ghe ga dito che el vero triestin con una clanfa taconeti el xe bon anca de spacar el iazo. E che sta roba fa ‘ssai ben per le articolazioni. Insoma, i xe andai avanti a remenarlo cussì tuta la sera, fin tanto che no xe vegnuda ora de tornar casa. E te vol saver la bela? El mato iera cussì ciapà de tute le monade che i ghe gaveva contà, che el ghe ga pagado lui tuto el bever.
– Orco tron ciò! Dovemo trovar anca noi un foresto! Con tute le monade che contemo, te se imagini quante impetessade agratis che se femo!
– Te sa sì, ciò! Insoma dele some, passa un per de mesi e la zima no da nissun segno de voler andar a remengo. Alora Furio e Duilio i decidi una bona volta de andar a ciaparse sta bela smoiada ale terme, e i va in sto Castel de Gyula, che xe in Ungheria, vizin el confin cola Romania.
– Ustia, e i ga trovado Dracula che ghe ga ciucià el sangue?
– No sta dir monade, Dracula no esisti. Alora, i entra drento tuti contenti e i scominzia a vardar che programi speciali che ghe xe, perché te sa che te pol far anca robe tipo massagi, bagni con spuze frodisiache, ontolarte de inguenti strambi, robe cussì insoma.
– Sì, mi me ricordo che una volta in sauna i me gaveva spalmà tuto de cicolata e dopo…
– Ara, no voio gnanca saver, che ancora dopo no me insogno de ti tuto ontolà de cicolata. Insoma, butando un cuc de qua e de là, i se inacorzi de un cartel, scrito propio bel in grando, che el disi che quel giorno iera ‘ssai fortunà, perché i verzeva un novo programa speciale e che solo per quela volta el saria stado a gratis. El programa “benessere e immortalità” el se ciamava. Furio e Duilio, caìe come che i iera, no i ga perso l’ocasion e i se ga subito imbusà int’el grupo che andava a far sta roba. E co i riva là, chi i te se trova visavì?
– Dracula! Te gavevo dito mi!
– Ma va a remengo ti e Dracula! No, i se trova davanti el foresto, quel dela betola, quel che i gaveva remenà mesi prima. E sto altro, pena che li ga riconossudi, el se ga subito impizà pien de contenteza e squasi comozion, come, e li ga ciolti fora del grupo e el ghe ga dito che quel per lori iera el giorno de gloria, perché lui gaveva inventà quel programa propio drio de tuto quel che lori ghe gaveva imparà quela sera. E che quindi i gaverà l’onor de far tuto per primi.
– E lori, cossa i ga dito?
– Indiferente cossa che i ghe ga dito, el mato iera cussì in piena che no li ga gnanca scoltai, el ghe ga dito de spoiarse in svelto, che el programa andava fato tuti nudi, li ga sburtai subito int’ela saleta e li ga serai drento. Una zima che no te conto ghe iera, sicuro soto zero, e i ga tacà a bater broche come danai. E po’ el mato ga strucà el boton.
– E xe saltà el macaco?
– Saria morto de zima el macaco là. No, se ga impizà un sventolin de aparechio grando più dele bale che me fa vegnir mia suocera co la vien trovar mia molie. E ga tacà sufiar un vento robe de mati, che i fazeva fadiga a star in pie. E el mato tuto contento el ghe rideva, el ghe rideva lui, e el ghe diseva: “Alo alo, meteve a gamba fasul che fa ben per l’equilibrio! Feghe veder qua de che raza che xe fati i triestini! Go fato tuto bel eh, vardè che l’aparechio sufia de est-nord-est a dozento al’ora! Xe bora!”
– Diritura la bora el gaveva fato! Orco tocio!
– Sì, sì. Te pol imaginar quei do poveri muli, li gaveva anca ciapai int’el orgoglio triestin, no i podeva miga far la figura dei cagainbraghe. Alora i ga resistì vanti cussì per una mez’ora bona, fin tanto che el mato ghe ga dito che desso iera l’ora de copar tuti i microbi tirando una bela clanfa int’ela vasca che i gaveva davanti.
– Anca la clanfa el ghe ga fato far? Int’el iazo?
– Eh sì ah, fazeva parte del programa, po’. E lori i ga fato. E sicome che comunque i iera putei bastanza robusti, i ga anca spacà el iazo fazendo la taconeti, propio come che i ghe gaveva spiegà, e el mato iera sempre più imborezà e el ghe diseva ai altri che i vardi che omini che xe sti triestini, che forti, che stagni, che bobe, che quel e che quel’altro.
– E i altri cossa diseva?
– I altri iera za scampai tuti, ma el mato iera cussì ciapà che no el se gaveva gnanca inacorto. Insoma, co che Duilio e Furio xe vegnudi fora del’aqua, el foresto li ga acolti con un grando bater de man e el ghe ga dito, solene: “E desso, in segno de eterna stima, ve farò dono del’imortalità”, e el ga girà la maniza dela bora fin ai trezento chilometri al’ora.
– Uremenghis!
– Duilio e Furio, che iera ancora tuti slavazai dela clanfa, i xe diventai tut’int’un do tochi de iazo, e la bora li ga smacai contro el muro più forte che un s’ciopo, una s’cioca che no te pol gnanca imaginarte e un mucion de tocheti de iazo pertuto.
– Orco tron! Dopo i xe andai a ingrumar i do muli col cuciarin?
– No, no, per fortuna lori iera ancora tuti intieri. Incocalidi più che dopo un’impetessada de teran ranzido, ma intieri. Anca se Furio de quela volta el disi che secondo lui ghe xe partì anca un toco de bimbin, perché ghe par de gaverlo un poco più picio. Insoma, cussì ga finì la storia, col foresto che no ga più trovà nissun che volessi far quel programa e con Duilio e Furio che, tornai a casa, i ga passà tuta la primavera e l’istà soto le coverte cola broncopolmonite, la faringite, la tracheite e tuto quel che finissi in ite, e i xe vegnui fora solo in dicembre, co ga inizià de novo la zima.
– Poveri muli ara, gnanca l’istà i se ga godù. Per lori do ani de fila de fredo can. Chissà po’ perché se disi fredo can e no fredo gato. Mah, misteri. Mi me piasi de più i gati.
– Ma cossa dei, solo ai fioi ghe piasi i gati, meio i cani! Bon, cossa te disi, legemo vanti?

Per i curiosi, questi xe i capitoli (quei che incomincia con “In osmiza” xe le storiele de Ucio e Ciano):
In Osmiza: Ucio, Ciano e el cotecio remengo
1. Leaving Trieste
In Osmiza: i spagnoleti de Caio Fumera
2. Ogni centimetro in bici diventa ani luce
In Osmiza: i krapfen de Trojane
3. Yeah! Galina con do teste per tuti, brother!
In Osmiza: el boscarin de Bobici
4. Sè de Trieste? Bevè pian che xe fredo!
In Osmiza: le terme del castel de Gyula
5. El cinciut dei cani ungheresi
In Osmiza: el canton dela letura
6. El lago Clanfaton
In Osmiza: l’olimpiade dele clanfe
7. Pici passi
In Osmiza: i furlani e le besteme
8. L’altra testa dela galina
In Osmiza: la scoperta mondiale dei Coriachi
9. La festa de S. Stefano, el tokaji e el treno aumma aumma
In Osmiza: odissea ferroviaria
10. I’m on a train, I can’t complain
In Osmiza: de doman in bici

Hai scritto qualcosa (o fatto foto, o video, o pupoli…) di divertente/ironico/satirico su Trieste, Gorizia e dintorni? Mandacelo al Quel dela Quela! Scrivi a manna@bora.la

Quel dela Quela on Facebook
Tag: , , , , , .

Un commento a Le terme del Castel de Gyula: la prima anteprima de “Zinque bici, do veci e una galina con do teste”, el novo libro del Monon Behavior

  1. Fiora ha detto:

    come se disi? piato rico mi ci fico, ciò! 😉

Lascia un commento

Il tuo indirizzo email non sarà pubblicato. I campi obbligatori sono contrassegnati *