19 Aprile 2012

Un triesticolo al Polo Sud 3: con che coriera se riva?

Qua le puntate precedenti

…sior, sior…la me scusi…cosa ciapo per andar al Polo Sud? …la 1 o la 19?

Ciao a tutti,
sto giro ve volevo contar un poco de come se riva fin quazzò…
Partimo dal fato che per andar al Polo Sud ghe vol esser coivolti in qualche progetto de ricerca oppur far parte del personal che lavora nelle varie basi che xe sparse sul continente de iazo…si, perchè su tutto el territorio antartico xe in vigor un Trattato Internazionale che difendi l’ambiente, la fauna (le bestiuzze), e la flora (le piantine) de tutto l’Antartide…pertanto se pol venir qua solo con uno scopo preciso che xe appunto la ricerca in primis e poi, sopratutto, la logistica che no xe altro che tutto quel grande gruppo de persone specializade che ne permetti a noi scienziati de lavorar senza far danni o farse mal…se sa che noi non semo sai bravi con cazavidi e trapani, no? Meio che ge sia qualchedun a darne un cuk ogni tanto.

Bon, partimo…
per noi che semo qua a Concordia ghe xe due possibilità…rivar fin in Nuova Zelanda e po ciapar o la nave o l’aereo, opur (sopratutto per i muloni e le mulone francesi) rivar in Tasmania e ciapar la nave rompiiazo Astrolabe.
Mi, Roby, Giorgio, Bimbo e Brunone (el nostro meccanico) per esempio semo partidi da Christchurch con un Airbus…si, saria stà più figo un C130 militare (come i veri avventurieri)….ma niache viagiar in prima classe per la prima volta no xe stà sai mal…ve dirò, no se gavemo lamentado de sicuro. Dopo 6 ore de volo verso sud semo rivadi a Mc Murdo, la base-città americana dove praticamente passa tutte le persone che poi se fermerà in Antartide per periodi più o meno lunghi.
Questo xe stado el nostro primo contatto con el iazo perenne, infati la pista de aterragio xe sul iazo…meno mal che gavevimo bone pedule sennò spetar la coincidenza per la base de Baia Terranova sarià stada una vera tortura!!!
Ad ogni modo ne xe andada de lusso perchè dopo un oretta i ne ga carigado sora un Twin Otter (vedi foto) e da Mc Murdo semo partidi subito alla volta della base italiana Mario Zucchelli dove che ne spetava…un altra pista de iazo, un pochi de Skua (Cocai antartici sai sai cativi co i ga i fioi) e ovviamente tutto el personal della base. Semo rimasti la un per de giorni e semo stadi trattadi come papi…sopratutto noi che gavevimo de partir per far l’inverno. Meno mal che gavemo spetà un do giorni…almeno per renderse conto un pochetin de dove che ierimo….capirè…no xe che te rendi conto subito de gaver messo pie in Antartide…ghe vol un minimo de pausa per pensaghe un attimo perchè co te rivi in estate te par de eser…cossa so mi?….vizin la Marmolada….a parte che xe el mar…ma el pack (iazo marin) xe talmente tanto esteso che no te lo rivi nianche a veder…

Twin Otter in sosta sul ghiaccio marino a Mario Zucchelli Station

El viaggio per Dome C lo gavemo fato con un altro Twin Otter e stavolta el ga durado circa 5 ore e dopo aver pasado le montange vizin la costa, semo rivai sul plateau….la calotta polare…per capirse….la crosta de iazo che coverzi tutto el continente (che a Dome C la xe spessa 3500 metri circa…ve immaginè tanto iazo???) niente altro che bianco a perdita de ocio e a 360°….quel che ne gavessi spetado per el prossimo anno.

El resto dei muloni inveze ga fato un giro più tranquilo, partidi da Hobart con la nave i ghe ga meso circa una setimana per rivar alla base francese de Dumont d’Urville,  pertanto i ga avudo la fortuna de veder rivar el iazo pian pianin….marette, qualche iceberg, qualche pinguin e magari qualche balena….dopodichè…rivadi a DDU i ga ciapado un altro Twin Otter e i xe rivadi a dome C dove noi li spetavimo con sai ansia…per veder de novo el gruppo assieme dopo el corso de Parigi.

Però no xe finida qua….pensavi che ve molavo cusì presto ah….

Un pochi de materiali e le persone riva con i aeroplani….e la merce ( magnar, tochi de ricambio e altra stumentazion)?….adesso riva el bel.

La nave Astrolabe dell’IPEV scariga con l’elicottero i materiali vizin a DDU….dopo sto volo le robe vien carigade in dei container che xe pozzai su delle slitte e dei giganteschi bulldozer (trattori per chi che no ga familiarità) traina tutto sto ambardan de roba fin a Dome C con un viaggio che dura 12 giorni, perchè oltre che lungo (1200 km) el viaggio xe anche in salita…dal livel del mar fin a 3200 metri de quota dò che semo noi….insoma viaggiar e portar roba a Dome C non xe proprio una roba cussì facile…ghe vol una machina organizzativa non da poco…

…alla prossima da Concordia Base.

Le attività di ricerca e logistica sono a cura dell’ENEA per la parte italiana e dell’IPEV per la parte francese.

Mattia Bonazza
Base Italo-Francese Concordia,
Plateau antartico orientale,
Antartide.

Tag: , .

3 commenti a Un triesticolo al Polo Sud 3: con che coriera se riva?

  1. Matteo Apollonio ha detto:

    Mc Murdo me ricorda qualcossa….

    http://www.imdb.com/title/tt1093824/

  2. arlon ha detto:

    me piasi sai sta serie, ben fatta! 😀 Ma go fame de ancora più foto..!

  3. paola ha detto:

    Scusa, te ga un compiuter col coretor ortografico pel triestin che te scrivi cussi’ ben?

Lascia un commento

Il tuo indirizzo email non sarà pubblicato. I campi obbligatori sono contrassegnati *