18 Marzo 2012

Pdl Trieste: no xe più i manifesti de una volta

Fin dai tempi de…del’ano scorso, bon, no ‘ssai in là insoma, i manifesti del Pdl-Trieste xe diventai la mia passion. Gavè poco cossa rider. Chi de voi se ricorda come iera i manifesti de Cosolini? Nissun, ecolo. Invece tuti se ricorda del 23A2 che ga fato la storia, o del “tutto normale?”. Quindi xe poco cossa far, quei manifesti xe stado un grande esempio de viral guerrilla war street branding metropolitan uacciuaring marketing, senza rivali.
Ma ripercoremo la storia con ordine.
In principio ci fu lui:

che xe tipo el precursore de tuto, el primo motore immobile, colui dal quale tutto nasce e nulla si distrugge. Colui il quale è ancora oggetto di dibattito in note università antropolosociocriptologiche de tuto el mondo. No so, forsi la Canakademi de filosofia in triestin ghe dedicherà una puntata. We love it.
Dopo xe vegnù fora un altro grande successo, questo:

Stesso stile, stessi colori, fa la comparsa un elemento enigmatico quale el punto de domanda e una specie de logheto del candidato. Figon. Evolution 2.0. Promosso a pieni voti.
E poi xe rivado questo, forsi el climax artistico:

Confermato el punto de domanda e el logheto, compari un novo color, el rosso. Compari una domanda direta: “tuto normale?”, che fa parte del manuale dela vera nagana triestina assieme a “te zerchi longhi?”, “te ga problemi?” e “te vol biava?”. Ancora un evoluzion, ancora un miglioramento, ancora un grandissimo successo.

Poi i ga candidà Antonione, e le robe ga perso un poco el morbin dei primi tempi. Xe vegnudo fora questo:

Compari colori de sfondo, scrite no più nel genere vincente de un tempo…però i contenuti mantien ancora quela vivacità che te meti alegria, perchè i scrivi che Antonione iera candidato ala Provincia invece che al Comun. Insoma, ghe xe un bel viz drento, fa rider e lo promuovemo anche questo.
Poi, poco prima dele elezioni, vien fora questo:

De novo la grafica no xe più quela bela che ne gaveva emozionà, ma anca qua i contenuti mantien quel velo de misterioso che tanto ga fato sucesso. L’unico Pdl, orca, ma quanti iera? No iera un solo? Bu, no me ricordo.
Bon, promosso però con riserva.
E poi più il nulla.
Da buon fan, aspetavo con ansia che un novo manifesto vegnissi fora, ma niente. Quando…eco che finalmente, andando in giro con l’auto, compari LUI! El xe! Xe lui! Sììììììì! La grafica xe inconfondibile. I xe tornai a sfondo uniforme, scrite nere e rosse un poco in maiuscolo un poco in minuscolo. Grandi. Inciodo. Ris’cio de far el tiro. Ma devo vederlo, devo! Chissà che verta el contenuto, chissà cossa xe scrito! Xe una data: 4 MARZO. 4 MARZO!!!!!!!!!! Xe el mio compleanno el 4 Marzo!!!!!!!! Oddio!!! Xe destin. Questo me lo taco in camera. I ga fato un manifesto col 4 marzo. Tropo figo. Son come un picio davanti i regali de nadal. 4 Marzo! Xe praticamente el regalo del mio compleanno.
Ecolo:

DOMENICA 4 MARZO
Stazione Marittima -10.30
sala Oceania
CONGRESSO PROVINCIALE PDL – TRIESTE
elezione coordinamento provinciale PDL Trieste
Presiede: Prof. Sen. G. QUAGLIARIELLO
e logheto.

Bon. E ‘lora? Dove xe el viz? El toco criptico? El morbin? Ou! Come xe ciò? Go spetà un anno per sta roba?
No so, i podeva almeno far finta de sconfonderse col mato dela juve e scriver Prof. Baloner F. QUAGLIARELLA. Minimo propio, ma me aspetavo sicuro de più dei.
Insoma. Ogi son ‘ssai zo de bala, me sento tradì.
No so se me ga deluso più sto manifesto del Pdl o l’ultimo cd dei Strokes. Semo là. Pdl-Trieste come i Strokes.

Hai scritto qualcosa (o fatto foto, o video, o pupoli…) di divertente/ironico/satirico su Trieste, Gorizia e dintorni? Mandacelo al Quel dela Quela! Scrivi a manna@bora.la

Tag: , .

26 commenti a Pdl Trieste: no xe più i manifesti de una volta

  1. aldo ha detto:

    Come diseva quela vecia boba de Hegel: la totalità xe più dela somma dele sue parti…

    …e in sto caso vien fora un gigantesco Diego Manna: me xe vegnude zo le lagrime dal rider…

  2. aldo ha detto:

    Secondo mi andasi fato un concorso del manifesto mejo tra i vari concorenti:

    el manifesto numerologo

    el manifesto lavorator vs spuzafadighe

    el manifesto nagana

    el manifesto che sbaia ente

    el manifesto del compleano de manna

  3. aldo ha detto:

    iera tanti, me son dimenticà de un concorente:

    el manifesto de l’unico pdl(e il 730 dove se fa?)

  4. Fiora ha detto:

    ah! dovemo renderse conto che quei manifesti de rider ” tuto normale”- numerici modelo Enaloto, che zogà el ambo 23 e dò gavemo…quasi perso el (art) 18, gaveva un Ispirator un Regista O-cul-to quand’anche involontario, un Comico Barzeletier capace de farghe cucù a una autorevolissima Chiapputa teutonica sbucando drio i penoni de Piaza Granda…
    ‘ndà via Lu’, ai comandi xè restà un tipo serioso che la sola roba de rider che gà xè quel nome de cratura… Angelino.
    Cussì el new deal del partito xè incupì per far pendant col stile dei tecnichi.
    No se scherza più…cribbio! e del ancien regime dei nani bufoni e balerine ghe xè restà solo un cribio ma per sconfesar tute le monade de prima.

  5. ufo ha detto:

    Diego, te son diventà famoso a furia de scriver mononade (o mannade?)- i fa diritura un convenio per celebrar l’aniversario dela nascita. Xe riscio che te i te fazi santo subito? O anca ti te toca far la trafila, prima democristian, poi beato e dopo pena santo?

    Però no se pol no dirlo: quei manifesti i fa tristeza. I xe el specio esato del involuzion cultural de che chi ga avù el coragio de ordinarli cussì. Mi me sarìa vergoniado.

  6. effebi ha detto:

    dovemo rassegnarse… el berlusca xe scomparso anche dal simbolo del PDL…
    el tetro governo dei tecnici sta preparando un progeto de lege per standardizar i manifesti eletorali…

    per diego manna un futuro incerto…

  7. vidocq ha detto:

    MI ME PAR CHE I FA DE TUTO PER INSEMPIAR LA GENTE. PENSEGHE BEB PRIMA DE VOTAR. BYBY

  8. Fiora ha detto:

    @6 cossa, effebi ??? !!! “standardizar i manifesti eletorali” un, nissun, zentomila… 🙁 fussi l’aberazion de l’omologazion.
    eh,eh sta pensada implica paura dei grigi che no i savessi tirar fora nè slogan celoduro,ne menomale chemarioc’è, perché xè stà za dito…a parte i numeri del spred e del articolo disdoto le do’ lagrimete dela Fornero lori sula creatività i se arena…
    Anzi ‘desso che me vien in amente vardela pei telegiornali, sta Fornero ‘desso ridi a cotimo, a proposito e a sproposito, che la par la iena ridens come per far creder che quele lagrime xè stà un atimo de defaians dela Iron Maiden dei tecnichi.
    Insoma se i standardiza e omologa i manifesti eletorai xè per paura che i contabili sia batui dei creativi del pane amore e fantasia.. . Ve lo ricordé, no? el partito del amore, che po’ el pensava de far anca forza gnocca?!
    Te ga voia sti altri…gnanca vizin no i ghe ‘ndassi

  9. Fiora ha detto:

    ‘LU ‘desso el dovessi tirarse sù per amor dei sui e intanto meterse co’ Apicela a scriver un ino meio del novo che no resta impresso, po’ testi sgai pei manifesti..coragio che xè ‘ncora tempo.
    po’ ‘ndar pei loghi a contarghe barzelete vece come el cuco,ma insoma iuteria el carisma de l’omo dela providenza…mancata, …insoma dirse Silvio no fa’el mona de inofenderte, o la vitima mi sono fato da parte per il bene del Paese…ste robe no fa de rider dei! ‘ncora meno dei witz veci come el cuco… ciapite sù sona el piano e cantuza come de mulo co’ te sonavi a bordo dele navi e daghe una man a Angelino che sarìa el tuo Trota solo ch’el xè ‘ssaissimo meio.

  10. ufo ha detto:

    Zerto che se i se presenta usando Forza gnocca come slogan forsi xe meio che i fazi manifesti senza la grafica, opur i se devi inventar manifesti visibili solo dopo le 22.00, per proteger le creature.

  11. Bibliotopa ha detto:

    Ma se i scrivi Forza gnocca qualchedun pensa che sia dei fan dela Merkel

  12. Giampaolo Lonzar ha detto:

    @11 BIBLIOTOPA – Trstpedia disambigua:

    GNOCA – Triestin x Tedesca

    GNOCCA – ‘talian = triestin = MXXX

  13. sfsn ha detto:

    Gnoca o gnocca: bernocolo.

    Forse che soto soto i vol esser bastonai?

  14. Fiora ha detto:

    ma xè ipotesi mie..dubito che torni i “bei tempi” del cucù, del abronzato e del forza gnocca.
    Una stagione finita..oramai ance i imitatori se ga inacorto ce i xè disocupai e mi oramai me fa de rider solo Tonino co’l se ingolfa parlando per Talian come ce i ge ga imparà ale serali col’ studiava per la laurea…

  15. Fiora ha detto:

    @14 ops, VENIA! gnanca mi no scherzo però… “ce” e “ance” tre volte senza “h” ..perseverare diabolicum,

  16. aldo ha detto:

    Ma cossa c’entra Silvio? Perchè darghe a un de Milan el merito de una roba che xe nata qua?

    A parte quel de l’ente sbaià sti manifesti xe una genuina invenzion patoca! Va tutelada con un marchio de teritorialità: tipicamente triestino!

    Xe una colezion che mostra la genialità del suo ispiratore: quando per vinzer se devi perder, no basta star là amorfi a far gnente per vinzer, ma bisogna darse de far per perder…

    …no basta no far gnente per segnar, per eser sicuri de perder bisogna far un pochi de autogol!

  17. Fiora ha detto:

    @Aldo te ga ragion ,ma mi resto del’idea ch’El fussi el mentore dela situazion,anca involontario,anche inconscio per lori i nostri local…propio un spirito de goliardia che partiva de Roma, cola pensada dela nipote de Mubarak, col’igienista ” irresponsabile regionale” cole olgetine, e tute le maldobrie che go ricordà più sora…
    iera sto imprinting sto humus che ga prodoto e promoso i fruti dela comicità eletoral nostrana.
    Mi comunque son sempre per esaltar la nostra inventiva e caldegiasi senz’altro la d.o.P. per le nostre monade su manifesto.
    Ieri,ogi e doman.
    Co’ Lu’ e sensa de Lu’ alo alo PDL Ts! darse de far ch’el sol magna le ore!

  18. giorgio (no events) ha detto:

    @ Diego: demòghe tempo: no xe elezioni ‘sto ano.
    Pò desso xe ‘ssai sobrietà, che equità vignerà dopo, i gà dito.
    Xe de spetàr el 13 (2013) che xe politiche e regionali: sa che ridade!

  19. Fiora ha detto:

    @Diego ” non siamo insensibili al grido di dolore…”
    Come che se ga fato per Cosolini , a sti tapini senza più ispirazion, perchè restai senza il Grando Ispiratore a distanza dele monade, no podessimo imbastirghe qualcheduna noi? no ‘cori farghe su un libro,ma butar qua qualche slogan…cussì fussimo super partes e dela sola parte che a militar paga sempre: EL MORBIN!
    ” Se vinzi el Pidiele, 90,60,90 sarà l’unità de misura per el posto de asesora…”
    ” Se vinzi el Pidiele el Q.I. xè bandì per le done in favor dela DdF*”

    *dote del Friùl, che cussì contentemo anca i cugini.

    Opur cambiar tuto con qualche slogan inedito del prinzipio ala fine…
    “’13 numero fortunato…”
    che i xè ‘ssai pei numeri,…LORI!

  20. aldo ha detto:

    Xe sta bel fin che ga durà, ma el pierino Silvio xe sta meso drio la lavagna e quei che comanda veramente i ghe ga dito che se nol sta bon i ghe porta via anca la merenda.

    Adeso al suo posto xe quei che se senta in primo banco, ciol apunti, bifla tuto el giorno, ciapa 10 in condotta e vien lodai dal preside che, atraverso la BCE, pol far andar zo lo spread se i nostri fa i compiti a casa che ghe vien dadi.

    L’unica roba de morbin che go sentì ultimamente xe la “paccata” de miliardi de cui ga parlà la Fornero, riferendose ai 2 miseri miliarduzi che la pol meter sul tavolo per far un dei compiti a casa.

    Gnente mal la batuda de ciamar “paccata” quei due miseri miliarduzi, quando la BCE va avanti a colpi de centinaia de miliardi al 1% ale banche perchè le compri titoli de stato per sbasar el famoso spread.
    In confronto i 2 miliarduzi dela Fornero par un sacheto de monedine ingrumà in una fontana, altro che “paccata”.

  21. aldo ha detto:

    @20

    Adeso me son acorto: go scrito “la” Fornero. Me xe scampà…no xe politically correct, ciò!

  22. Fiora ha detto:

    @20 Aldo …anca perchè con quella faccia un pò così el “la” anteposto a Fornero più che not politically correct me par… extremely generous! 😉

  23. Fiora ha detto:

    @23 credeva che fosse la ministra e invece…
    http://youtu.be/VM06J-dthGo

  24. Fulvia ha detto:

    Per mi Tononi fa troppi festini!

Lascia un commento

Il tuo indirizzo email non sarà pubblicato. I campi obbligatori sono contrassegnati *