Forsi più de qualchidun se ga perso questo intervento de ufo tra i comenti de qualche setimana fa, in cui el proponi l’istituzion de una gara uficiale de quela istituzion che xe le gare che se fa dal Molo San Carlo. Chi che no sa, che vardi sto link. Alora lo RIESUMEMO, che xe sempre pecà perder tochi cussì.
A gentile richiesta gavemo de organizar una gara. No xe giusto che in tuti sti secoli metà dela popolazion ghe xe stà impedido de praticar un dei sport più popolari! Semi miga sauditi – queste robe le xe intolerabili! Inutile star a spetar che el progreso caschi zo del pero, se volemo far finir sto afronto medieval ala pari dignità de chi frequenta le Rive dovemo darse de far noialtri, e desso subito – no xe el momento de pindolarse, le siore de Trst zà le sburta el porton per iscriverse.
Pasemo al progeto esecutivo:
– Soldi. Servi, come no. Tachemo con una coleta per le prime spese e le marche da bolo, in cambio 20×20 de spazio réclame sul tabelon dei risultati; una volta che gavemo un nome altisonante e una data podemo far un asta su ebay per venderghe ai media l’esclusiva dele riprese e dele imagini. Più vanti penseremo al merchandising, xe tempo.
– Premi. Per chi vinzi, per chi riva dal secondo al ventesimo posto, per categorie, per juniores, per chi riva de più lontan, per el grupo più numeroso, e el premio special dela giuria e el premio ala cariera (no coriera) e el premio simpatia. Co xe risolto el punto 1 (schei) se fa subito. Andemo dei cinesi e compremo le straze più asurde che i ga in catalogo. Se va ben per le loterie de capodano anderà ben anca per noi. Se volemo esagerar femo etichete finte con fotosiop e le tachemo col vinavil, cussì sembra robe costose. Primo premio una tenda canadese, premio simpatia mi gavessi un dindio vestì de pavon, usado pochissimo.
– Location. No xe cossa, molo San Carlo. Nianca discuter, tradizion xe tradizion. Far de un altra parte saria come far el Palio de Siena a Venezia in piaza San Marco. Te se magini i cavai che per sicureza i cori col salvagente a forma de papero? Questo vol dir che dovemo rampigarse prima sula prefetura e far foto del molo, cussì per la gara le tachemo davanti a Telecamera amica e nissun se corzi de niente, altrimenti pol eser pupoli.
– Data. Otobre no più, xe tardi, dovevimo sveiarse prima. Dicembre xe trope altre robe, perdemo de riconoscibilità. In mezo ghe saria un zerto Novembre. Se pol far, basta voler.
– Concorenti. Facile, sto qua. Basta pensarghe prima a livel de marchetting. e presentarlo ben come un ocasion de rivalsa sociale, de progresso, de uguai diriti, de qualcossa insoma. Se quela boiada del Grande fradel riva gaver zente in fila per far i paiazi figurite una roba seria come questa – ne tocherà limitar le iscrizioni ale prime dozento concorenti.
– Giuria. No so perché, ma penso che podessi esserghe più volontari che per el lavor organizativo. Un giurato un voto, palette con numeri come per patinagio. El più zovine scrivi el verbal.
– Ordegni e atrezatura. Careghe de legno, pieghevoli, tipo osmiza – per la giuria. Publico sta in pie. Un par de careghe de scorta per i ospiti. Carta e pena per chi scrivi verbal, e un toco de tavoleta de meter soto la carta. Per misurar, che xe importante, me iero maginado robe complicade con metri a nastro e galegianti de pesca e altre komplikacije, poi un amico piastrelista me ga fato veder l’ordegno a laser che el usa per misurar le stanze. Sta in una man, e funzia anca per sbiego. Perfeto. Afar fato: el ne lo presta in cambio de un posto in giuria. Tabelon troveremo, se no proietor e un linziol bianco sul Ursus, ma questo vol dir portarse drio un generator.
– Nome. E qua te voio. No te son nisun senza un nome, zorno de ogi. Servi sì. Fioi e putele de bora.la, questa xe la vostra ocasion: dichiaro verto el concorso de idee per trovarghe un bel nome a sto evento sportivo-culturale. Ga de eser simpatico, original, meio se patoco, comunque curto che staghi sule maiete ricordo – e me racomando che se posi nominar sui midia, se no no servi niente, quindi no sporchezi.
Siore concorenti, se visade – cominzè alenarve. Organizacija fornisci Radenska in quantità prima dela gara (va ben, anca dopo!), se el biznis del merchandising va in porto ghe sarà anca bira Dreher original per tuti (se intendi concorenti e giuria).
Hai scritto qualcosa (o fatto foto, o video, o pupoli…) di divertente/ironico/satirico su Trieste, Gorizia e dintorni? Mandacelo al Quel dela Quela! Scrivi a manna@bora.la
Za vedo che sta storia la va a finir mal, col istigator e mandante morale segnado col dedo e portado via in manete. Inquinamento, oltraggio ala morale e concorso esterno, che ghe sta ben sempre comunque, più le agravanti del caso. Meio che preparo subito pigiama e spazolin per quando i me vien cior, ma prima go de far un altra roba. No ste spaventarve se vede fumo, son solo mi che bruso le carte vecie in grilia…
” a egregie cose il forte animo intendono….” Entusiasta fin del primo aparir dela proposta, no zà in nuce ,ma completamente svilupada da quel leader stratega de Ufo, gavevo obietà e ri-obieto.
PERO’! cussì circostanzià ‘ntel resto,Te nomini “le siore” e pò te glissi, tipo patinar sul iazzo ‘vanti el Verdi ( anzi chissà se sto ano Cosolini lasserà o lo reputerà spetacolo no ala alteza, bolandolo con un niet no se pol…)
UFO, COS TE VOL DE NOIALTRE???? che le quote rosa se meti a pissar là sul molo s.Carlo, coram populo …patòco’ ?! 🙁
Opur te ga in mente ruoli più defiladi ‘ntela susistenza o ‘ntela Croce Rossa? cola divisa de crocerosina tipo adio ale armi…mmmh, fussi ben petada! fussi una figada eh?!
Ma… l’ordinanza? Cosolini no la gà scancelada ancora?
@3 Capitano, co’ la pissada se trasforma in specialità sportiva…vojo vederlo el Sindaco a meschinamente sanzionarghe el glorioso … 😉 percorso !
considerando l’età media dei triestini e dele triestine, anderà a finir che la gara sarà sì de pissade, ma vinzerà chi che lancerà el panolon più lontan!
grande Fiora….specialità sportiva….aahhhaahh
gavemo anche trova’ el sponsor:
http://www.go-girl.com/
chinaski iera anche su un numero de Cuore! Alla rubrica ‘mai più senza’. Des vedo se lo trovo.
capitano, infati zercavo quel, ma no go riva’ a trovar.
Voio el “dindio vestì de pavon”. Pecà che no poderò partecipar…
Chinaski, IMPUNITO! 😀 😀 😀
eric
eh, no. el dindio, ufo me lo ga za promesso a mi.
@7
culto!!!!!!!
Uff, eccome qua de novo. Scuseme se spuzo de fumo e de brusa – go meso al rogo tute le carte comprometenti savendo che primo o dopo i me sonerà ala porta, e sarà i gendarmi. Go anca stacà i fili del campanel, cussì finche i capissi che non sona poso sortir dela finestra.
Fiora, te confermo: ghe iera tanta richiesta de pari opportunità e quindi se ga dito fèmo e stemo fazendo apunto quel. No se pol e no xe credibile parlar de parità e dopo zogarse cole regole. Lo sport (o diporto, in italico de una volta) xe quel de pissar zo del molo, no chi che buta più lontal el bucàl pien o svodo che sia.
Però no ghe xe problemi, anzi, se qualchiduna dele concorenti iuta l’organizazion quando che no xe de turno in pedana. Mi no go gran pasion per le uniformi, ma son tolerante – xe ammesse e permesse, basta portarsele drio, che noi semo cisti e no podemo fornir. Anca costumi de carneval, chi semo noi per far i dificili, e volendo anca in pedana. Xe compito dela concorente badar al aspeto pratico de come no farsela indoso durante el momento competitivo, anca perché se iera compito dela giuria ne podessi nasser situazije un poco ambigue. No che no me fido dei giudici, ma ghe xe midia presenti e anca robe inocenti pol sembrar chissa cossa, secondo l’angolo de inquadratura.
Maja, el dindio ga la luna ozi. Ghe go dito che el vegni far ciao col’ala, ma xe in quel periodo un poco particolar, poco perché per eser un colibrì bilingue che fa finta de eser un dindio vestì de pavon e anca adolescente el ga qualche problema de identità (ozi la ga con le aquile romane, ieri iera i condor dele Ande, ma la fase de Inti Illimani ga dura poco, tuto el mese scorso el iera un cocàl dalmata – a puntini neri), un poco perché timido e infati el xe un poco sgionfeto e imbranà, dovessi calar, ma insoma el se vergonia e no vol venir dirte ciao. Paserà, demoghe tempo de cresser. No so cora che nome darghe, che prima o poi tocherà. Comunque le piume de pavon le ghe stà de un ben… e me disi che xe quasi pronte le nove satinade e ariciade in ponta. Un splendor.
Desso devo solo che tenirlo lontan dele riviste de cusina, che no me lezi qualche riceta a base de dindio per Nadal, che xe tropo zovine per capir ste robe ancora, ancora un pochetin che el maturi, finissi la scola e dopo poso meterghe un fiocheto de regalo in testa e portartelo solenemente per el ballo dei debutanti e l’ingreso in società. Cos’che costa tirar su un dindio zorno de ogi.
Diego, per un momento gavevo leto mal: go pensà che te gavevi scrito… be, insoma, no go visto la ‘t’, la me iera scampada.
domanda tecnica a l’Ideatore: ‘lora Ufo xè caduta libera,no una tenzone di gittata…perchè te devi convegnir che in sto secondo caso noialtre costole de Adamo fussimo un minimo penalizade…
ufo, pazienterò.
ma che el sia pronto per la majenca, chè xe tanti anni che no vado, ma se te me speti col dindio no posso mancar.
e vegno prima dell’odprtje kioskov, prima che te vegni la malsana idea de butarlo sula girglia.
El dindio-de-Ufo sula griglia?! Jessusmaria gnanca pensar de ipotizar una roba compagna…el xè soto l’alto patronato del queldelaquela ‘ssaissimo più al sicuro del povero colibrì ch’el ga come nome “queldelquelaltro” 😉 e desso che gira el vento el ris’cia grosso…
Flora, lo spirito dela gara sarìa quel olimpico del Citius, Altius, Fortius – oportunamente adatà ale circostanzije. Del più veloce podemo far a men, che no me la vedo come una sfida a chi finissi prima, tropo facile. Più in alto podessi anca no eser el caso, meti che ghe xe un fil de vento e insoma podesi eser come dir meno che sicuro per el publico pagante. Più forte, questo podesi rientrar nei parametri se volemo, ma no va ben nianca questo, perché no gavemo cora trova un modo per misurar. Chissa xe quel GoGirl la de sora i lo ga dotà de manometro digital? Ma fin quando risolvemo ste picoleze probabilmente usando qualche tecnologia aliena – ne resta solo che el più in longo. No gavemo scelta. Più lontan che va, più punti se ciapa, e questa xe metà dela storia – l’altra metà xe come patinagio, ghe vol dar un minimo de importanza e de sodisfazion anca al eleganza del gesto atletico, xe per quel che gavemo i giurati cole palete coi numeri.
Poi ghe go meso un atimin a capir quel dele costole (colpa de maja che subito soto la me parla de grilie, e de mi che no lezo zeri libri che rovina i zovini) ma ghe son rivà a capir che te ga capido mal… I muleti i ga zà ben che sancarlizado l’Adriatico per tuto el ventesimo secolo, ma desso el medioevo xe pasà e xe tempo che i se meti de parte saltando un turno o anca più. Questa gara la xe riservada ale putele dai 15 ai 115 ani, perché xe ciama affirmative action, noi disessimo rivincita o kompenzacija, e xe de moda cussì tra i popoli civili. Cossa ghe centremo noi coi popoli civili no so, ma i ga promesso che dopo i me spiega, intanto femo.
Colgo l’ocasion per informar che el comitato de mati che porta vanti sta idea el se ga za dà de far, che stemo convinzendo l’ASL sul fato che xe tuto natural e che se ga sempre fato senza che se noti niente, e el museo dela pesca ga promeso che ne impresta un giuboto salvagente omologado per chi che ga giramenti de testa o che la pedana la ghe par poco solida. Son drio negoziar co una nipotina per veder se podemo gaver in prestito anca el suo model ciambella con testa de Paperino – le pozicije no le xe tropo distanti, xe più che altro una question de quante caramele in cambio. Ghe gavessi za dito che va ben, ma profito per impararghe i fondamenti del libero mercato, e la ga capido anca tropo ben.
Maja, sto dindio per come che’l xe cresciudo podessi eser lui che me buta mi in grilia in caso de barufa. Te ga razon anca ti, serada in tela tore più alta del castel a spetar che venio mantignir le promese de mariner, ma se portar el dindio in sagra servi a liberarte del incantesimo dela striga Lojzka che te incatena – me presento in sagra con tuto el grege de dindii, mi vestido de costume tradizional de pastor de dindii e el tuo dindio-pavon che marcia fiero e spavaldo in testa al suo grege. No go la più palida idea de come che dovessi verstirse un pastor de dindii, ma xe per quel che esisti internet. Meti caso che vien fora che nissun no sa come che fussì sto costume tanto meio, me meto qualcossa vanzado de carneval e digo tuti che pastor de dindii se vesti cussì, de sempre.
Nissun problema per l’orario, per i amici quele porte le se verzi a tute le ore anca senza dirghe apriti sedano, e pò vanzo anca un pochi de favori la in giro, alora podemo andar sicuri. Che prima che i verzi xe anca meno zente e no cori sburtarse. Entremo per primi, vinimo fora per ultimi e intanto i dindii i se rangia un poco, tanto più che in klinšca no i va.
UFO : l’IMAGINIFICO 2!
bon dei, no sta inc…indignarte ( termine più finoto, più up to date e pò corelà col dindio)
per la mia definizion ‘desso!
Ogni riferimento al Vate xè puramente casuale
😉
El Vate, quel dito anca el Toxic Wa(s)te? O me son perso qualcossa dormindo in clase, o noi do dovessimo ciorse l’interprete… me riferivo al Vecio Testamento, prima puntata. Ma forsi ga razon maja, mi xe fato più per cotolete in grilia e salmoni in savor.
@21 Che interprete mai, Ufo! xè che mi studiando per Sibila … Cubana son sempre un bicc criptica ,tipo “ibis redibis…”
Lora :
1)El biblico ” costole de Adamo” iera un semplice sinonimo de “noi babe” tanto per no doprar l inflazionà ” l’altra metà del cielo”.
2)te go ciamà IMAGINIFICO (una sola “m”, ala latina e ala patòca! 😉 ) come che i usava ciamar Gabriele d’Annunzio ,per i amici ” el Vate”. e iera l’enesimo COMPLIMENTO ala tua creatività.
Go pensà, viste le tue preferenze politiche spero che no te se INDIGNI (fa più figo de “incazz”, ogidì ;-), per el paragon,.
Ah! xè “colpa” tua se te scrivo aulico e complicà. Coi tui interventi,te me stimoli a no esser ovia e terre à terre. E ciapa anca questo come un aprezamento. 😀
ufo
ti ti xe fato ANCHE per la griglia.
un che scrivi da dio, te fa rodolar de rider, alleva dindi e sa far anche la griglia… cosa se pol voler de più?
xè o no xè un “progeto per la salvaguardia di un’ ANTICA TRADIZIONE TRIESTINA”???!!!!
Tasativamente del Molo s.Carlo ‘ntel “mare nostrum patocum”
Che no se sogni i mujesani con Rio Ospo e col molo T. Tipo dele stele ale stale…NO SE POOOOL!
Ah, eco de dove che riva quel Vate(r). Ale costole ghe son rivado, una volta che go deciso che no podeva eser costine griliade perché no xe stagion de sagre, e insoma anca volendo no xe che se se pol salvar dale metafore bibliche per quanto balorde che le sia – ma quel Vate, devo dir che son rimasto là a zercar de dove xe che el xe veniù fora. No savevo del imaginifico, mi iero rimasto al cocotello, che savevo eser creatura sua, ma sto altro me mancava. Mistero risolto.
Pò, no xe che me ofendo per cussì poco. No xe che la go personalmente con l’omo, a parte l’automatico diprezo per tuti quei che ghe prova gusto andar in giro a far del mal al prosimo. Xe un esibizionista come che ghe ne iera tanti prima e dopo, con pretese de eser poeta. Xe quà che zertuni i me dà contro quando che digo quel che xe soto i oci de tuti: che se l’omo viveva al zorno de ogi con quele sue batudine fiape masimo che podeva sperar iera de far el publicitario. Ma no xe che un va ofe… indiniarse solo per sta roba – eser paragonà a un copy, figurite. Ogni mestier gà la sua dignità, e conosso anca publicitari decenti e onesti. Tuti e do.
Ma parlemo de robe serie. Voi che andè in cine, ghe xe una qualche formula magica per far risussitar i morti? Perchè gavessimo bisonio de un bon PR per la robeta che stemo organizando, e i publicitari de ogi i me par tuti quanti fati col stampin de Mulino Bianco. No? Bon, faremo a meno del Vate, ma ne tocherà comunque inventarse qualcossa per tirar atenzion. Un volo su Viena butando volantini? Kommen Sie, antica tradizion miteloiropea a Triest? O forsi femo più caniara (trad.it.: share) se i volantini li scrivemo in iranian e ghe li butemo zirca solo sula sede del Agenzia atomica? Opur femo un volo su Trst butando volantini bilingui (zakaj e marilenghe) e semo sicuri che no se parlerà de altro fin Carneval e anca dopo.
Sì, Carneval. Va bon, mi gavessi scapolà, ma me par che proprio non se pol no parlar del argomento che savè zà tuti. Muja.
Come che gavè sentì, anca oltre Ospo l’idea la ga messo le gambe, e i volessi far qualcossa, e i sta zercando de coromperme per portar la fazenda là de lori, perchè par de capir che organizar ste robe ghe vol profesionisti del ramo come che fussimo noi. No go capì come che son diventa esperto ancora prima de gaver portà in fondo la prima edizion, ma i mati i ga soldi che ghe vanza, e noi inveze gavemo tante ma tante promese, e ghe sto fazendo un pensierin – a farme coromper, cussì salvemo le aparenze che a Trieste le xe tuto. Perchè, savè, dopo che per una vita go fato no-profit a drita e no-profit a manca e no-profit cola gamba destra e no-profit col pie sinistro e scovà el pavimento no ve digo come e con cossa, l’idea de far per una volta qualcossa per profit no xe che la me fà proprio tuto sto schifo… Però ghe xe un altro pensierin che me cuca fora de dove che se scondi i pensieri prima de vignir al mondo come idee, e xe che podessimo cior esempio dei mericani. Me spiego: la de lori una gara la xe una gara, e due gare le xe World Series. Alora noi podessimo ben che ben far la prima edizion al molo dele patatine (stemo tratando sponsorizacija), ciamarla Trofeo Classic, poi ofrir la rivincita a chi che no digo perdi, che xe bruto, ma no riva primi, a primavera in quel de Muja, e lo ciamemo Trofeo International, perchè verzemo le iscrizioni a tuta la Miteoiropa, e cussì con do gare podemo zà ciamarlo Campionato Mondiale, che ai sponsor ghe piasi, e se l’ano dopo ne riva far una terza gara de qualche parte tipo la mlaka de Kontovel xe fata, semo sport olimpico senza nianca corzerse. Pecà per Londra 2012, che no femo in tempo nianca se c…o oro, e saria sta sai bel perchè figurite se lori no ga anca un Saint Charles Wharf, e se no i lo ga ghe disevimo noi de farlo santo subito, ma insoma no ghe xe modo e puntemo sula prosima edizion che no me ricordo dove che la xe. A sì, a Rio. Che no xe proprio Rio Ospo, ma quasi, e con quel nome pareria quasi de zogar in casa. Va ben anca Rio, dove che i sa anca lori come far un Carneval come che se devi. Xe deciso, bisonia andar vanti sempre e la strada per el futuro la pasa per Muja. Anca quela per Koper, ma se lo digo nassi una casin mai visto e lora fè finta che no go dito niente. Rio. Che ben che el sona sto nome… Qualchidun sa se le chebe che i usa in aereo per cani e gati le va ben anca per un dindio? Penserè miga che vado in giro per mondo e lo lasso casa de solo? Co torno no’l me parla più per l’ofesa.
maja, devo confesarte che anca mi go un difeto. Come alevator de dindii son negà. I me vien su bei grandi e tuto, ma ala fine no go coragio de tirarghe el colo. Xe per quel che ne gò tanti, e che in grilia mia se fa de tuto, carne, pesse e divjad, ma no dindio.
Vara Ufo,te ieri salpà meio de quel altro co’l xè ‘ndà a far la Befa de Bucari…tuto pulito …mi me abeveravo del tuo morbin sapiente, finchè…fin a che me trovo una parola, granda come un scoio : MUJA!
Dopo el post 9 de quela muiesana, là del thread de Jaia & Mass…cos te vol che te digo? go sospeso la letura per guasto… ale meningi!
@25 cossa chebe per dindio mai! se lo amaestra,se lo vesti de muleto e se lo fa sentar rente in poltrona. il comandante & il suo equipagio vi dano il benvenuto a bordo, alaciatevi le cinture e pò bon!
..che cola scusa che a Rio o xè i preparativi, o xè le prove, o xè propiamente el Carneval, co’ la hostess carioca vedi sentà rente de ti el dindio vestì de muleto, la pensa che xè un muleto vestì de dindio e ‘ncora la ghe ofri un omogeneizà! … 😀