17 Ottobre 2011

Budapest, dove val ancora el moto “L’Austria iera un paese ordinato”

Ospitiamo ben volentieri il contributo di Massimo Barbo, el capobanda del sito tuttotrieste.net.
Che robe che robe, ierimo a Budapest el stesso giorno, e no savevimo. Pecà, perchè se no metevimo le bici int’el pulman e no fazevimo l’odisea feroviaria del ritorno!

BUDAPEST
Legio sempre con passion le aventure de Diego e soci in quela rumizada che li ga portai in tela seconda capitale de l’Impero, primo perché i fa lori proprio passion e secondo perchè anche mi, in quel stesso giorno che i xe rivai lori, ghe son rivado anche mi. Mi però go scelto un metodo sai più comodo e veloce che se ciama pullman! Xe sempre bel veder zità come Budapest o come Vienna, che in tel’architetura ricorda la nostra Trieste. Xe bel veder come anche qua, in quel che una volta con un certo distaco e una certa paura se ciamava Est Europa, regna quel ordine e quela disciplina che ricorda la famosa frase de C.& F. “L’Austria iera un paese ordinato”. Ma mentre a Trieste questo xe solo un moto, a Budapest xe ancora una realtà! Strade nete che ogni sera vien lavade, giardini e alberi per tute le vie con i irigatori automatici che se impiza soli de sera, zente brava e ordinata che no buta carte e ciche pertera. Mia fia, che per compito de le vacanze la gaveva de scriver ogni giorno un pensierin, la ga scrito “A Budapest le automobili rallentano quando viene il giallo mentre a Trieste accelerano”! Sta frase, tanto ingenua quanto vera, me ga fato pensar a come anche mi fazo el furbo co scata el zalo, comportandome più de “talian” che de “austroungarico”! E po no go visto motorini sorpassar a destra ne auti sorpassar con la riga continua, no go visto machine in seconda, no go visto mai le quatro frece lampegiar per dir “desso rivo”. Xe stupendo ma gnanche mi no so come che i fa, perché se go de fermarme un atimo per andar a cior una roba veloce in botega, DEVO lassar un atimo la machina in divieto con le frece impizade!
E po’ caminar sui marciapie e veder i auti che se ferma per lassarte traversar sule striche, tanto che traversavo anche se no dovevo perché me fazeva pecà! E bisogna anche dir che la zente co ga de traversar lo fa sule striche no dove che capita come qua de noi!
Ma oltre a queste che per tanti sembrerà monade, una roba che go scoperto e che Diego e Co. no podeva visto che lori testava le piste ciclabili, xe le autostrade ugheresi. Per doprarle bisogna prima andar sul sito de le autovie magiare, meter el numero de targa e pagar per una o do stimane o quanto che se vol, stamparse la ricevuta de tignir per pura precauzion in auto tanto in autostrada ghe xe le telecamere che te legi la targa e vedi subito se te ga pagà o no! E pensar che noi, in tel’Italia moderna, un paese Occidentale, stemo ore e ore in fila al Lisert e in tuti i casei sparsi pe’l stival. E dir che la stessa tecnologia i la dopra a Padriciano per controlar la velocità, i tutor insoma, ma per el pedagio no, xe meio star in fila, le autostrade ghe guadagna de più che con una vigneta. Come? El Telepass? Ah si con quel no se fa la fila…. ma basta che sia do, tre chilometri de coda al casel per star tuti insieme fermi, sia quei col Telepass che quei senza!
Insoma cossa dir: viva l’A e po bon!…. come sempre!

P.S. Tuttotrieste è anche su facebook 😉

Hai scritto qualcosa (o fatto foto, o video, o pupoli…) di divertente/ironico/satirico su Trieste, Gorizia e dintorni? Mandacelo al Quel dela Quela! Scrivi a manna@bora.la

Quel dela Quela on Facebook
Tag: , , .

20 commenti a Budapest, dove val ancora el moto “L’Austria iera un paese ordinato”

  1. Fiora ha detto:

    … Tuto pulito e in massimo ordine, dei !
    In sto momento de bagarre e de perdita de identità, sta descrizion a mi me fa scatar el mecanismo dela recherche du temps perdu e la voia de ‘ndar a viver là…
    Chissà se in caso de trasferimento, a noialtri suditi de l’Impero ne spetassi la citadinanza in automatico e un sconto per ciorse casa ? 😉

  2. Sandi Stark ha detto:

    No savè 1 parola de ungherese e volè sopravviver a Budapest? Parlè in vecio triestìn:

    gulas, salame, paprike, filèto, articiochi, salata, rigojanci,kipfel, palacinke. Se ordinè zicòria ve riva radicio ma xe sempre verdura, se volè rave ricordeve che in Carso le se ciama rèpa. Mandorle se disi mandule come quasi in furlàn, lamponi xe malina come in Istria, i gnochi resta gnochi, le naranze se disi naranze, el mandarìn se ciama mandarìn; le zariese “cseresznye”, i pistaci se ciama pistaci. El pomo granà se disi alma gráná, le banane resta compàgne. E intanto no se mòri de fame. Per bever se pol domandàr frambua per i fiòi, cafè, capuccino (ocio che i ve porta el nostro kapuziner, picio e co’ la panna come a Vienna), palinka e se no savè come se disi “bira”, podè dir “Dreher” che i la fa ancora.

    Altra roba singolare: zò per le trombe de le scale dei più veci palazzi de Budapest, vien el stesso odòr che se senti in tante case triestine dei tempi de l’Austria, no go mai capì come mai, forse le vecie malte gaveva la stessa ricetta.

    Odòr de casa…

  3. Fiora ha detto:

    @2 ciù Sandi , tanti vocaboli del vecio patòco che te ga cità, mi li go ‘ntel archivio dela memoria e pò vara ch’el dna no xè acqua! ghe xè la predisposizion a ri-impararse el resto col amor e el culto dele nostre tradizioni !

  4. Dexter ha detto:

    Mi iero a Budapest lo scorso anno e nella hall dell’albergo dove che stavo go parlado un poco con un sior locale che, quando ghe go ditto che iero lì per l’Università de Trieste, el se ga quasi emozionà ricordandome che se iera tutti sotto lo stesso impero, e el me ga trattado come un suo connazional 😀

  5. effebi ha detto:

    brevi flash da http://www.nuovolitorale.org/carlo.asp:

    “Alla fine del mese di ottobre 1918, sul fronte italiano, si ribellarono alcuni reparti ungheresi della k.u.k. Armee. L’Ungheria il 31 ottobre dichiarò la fine dell’unione reale con l’Austria e ritirò le proprie truppe dal fronte del Piave.”

    “Quando divenne chiaro che l’Ammiraglio Horty non intendeva affatto rispettare il giuramento di fedeltà al Re, che gli imponeva obbedienza e sottomissione, e che si preparava, invece, a detenere il potere illegalmente, Carlo decise di tentare una seconda volta la restaurazione in Ungheria.
    Il 20 ottobre 1921 volò con Zita, a bordo di un aereo Junkers F 13, verso Sopron (Ödenburg), città al confine con l’Austria tedesca e da questa reclamata, ma che con plebiscito tenutosi nel dicembre 1921 votò per restare in Ungheria. Lì era stato radunato un piccolo esercito dai legittimisti. Ci fu un a scaramuccia a Budaörs, un sobborgo di Budapest il 23 ottobre 1921 ma Carlo, resosi conto che il tentativo di riacquistare il potere avrebbe scatenato una guerra civile, decise di rinunciare alla violenza risparmiando così un alto costo in termini di vite umane alla popolazione ungherese.
    A questo punto, l’Ammiraglio Horty, nonostante fosse legato dal giuramento di fedeltà e sottomissione a Carlo, lo fece arrestare.”

  6. Fiora ha detto:

    …povero Carlo Piria, e sì che un periodo i parlava che i lo voleva far Santo…
    Canonizar, sior Amiraglio Horty, no canonegiar!!
    😉

  7. Sandi Stark ha detto:

    No me risulta che i ungheresi gabbi fatto grandi ribellioni, i iera tornài a casa. E no “reparti”, ma divisioni intiere, perchè intorno al 20 ottobre l’Impero iera za finì. Inveze la Isonzoarmeè iera tornada intatta a Klagenfurt, ma Carlo no gaveva volù che Boroevic la portassi a Vienna per difender la Corona, sempre per evitàr spargimenti de sangue.

    Carlo se iera anche butà ne l’Isonzo in piena nell’autunno del 1917 per salvàr un infanteriest che no saveva nudàr. El gaveva preteso che no se sappi niente, iera uno dei episodi per el processo de beatificaziòn.

    El secondo tentativo de restauraziòn de Carlo iera stà organizzà dal fradel de Franz Lehar, per el quale suo fradèl (quel de le operette) gaveva scritto el primo “Inno del Piave”.

    E dava una man anche Kalergi, ex ufficiàl, eroe de Caporetto, che dopo gavessi fatto l’Europa Unita.

    Horty iera una meza figura porca, el ghe diseva a Carlo “cicili ciocili” intanto che el circondava el treno e dà ordine de sparàr. Unico “reggente” che tradiva el suo Re, e unico ammiraglio a capo de uno Stato senza màr. Iera anche l’unico pampel de ammiraglio che gaveva mandà le corazzate a torziolòn a ciapàr siluri; nè Haus nè Niegovan se gaveva mai sognà de far monade compagne. E no se pòl nianche dir “cicio no xe per barca”, Teghethoff iera de Tolmìn.

    Tuttavia i ungheresi ga perso più de centomila de lòri per difender Trieste e Gorizia, i vien ancora co’ le corriere, sempre più numerosi, i va a Doberdò, che in Ungheria xe conossù più de Roma.

    Ma tutti i gaveva dà l’anima per difenderne su l’Isonzo, no solo i ungheresi. Tutti i popoli de la Mitteleuropa nissùn escluso: bavaresi, svevi, boemi, ceki, moravi, polacchi de la Galizia, tirolesi de Trento e de Rovereto, austriaci, quei de la Bukovina, ucraini, slovacchi, romeni, dalmatini compresi i italofoni de Zara, sloveni, serbi, bosniaci… e anche triestini ovviamente.

  8. effebi ha detto:

    ceki e boemi ? ma dai… ma la lassemo perder dai…

    i triestini e istriani ? quei del demoghela… ma per favor… ma dai…

  9. Fiora ha detto:

    @7 ciò Sandi, ti che te sa, miga che sto Horty cussì figura porca e traditora ‘ntei confronti del suo Imperator, gaveva una vena de sangue…. Talian? 😉

  10. Fiora ha detto:

    …ara Sandi che la vecia Zita saveva tuto de la vera verità de Mayerling…la salvava una letera che ghe gaveva dà un congiurà, dopo el fataz.
    Perché tentativo de congiura contro F. J. iera sta! altro che amore contrastato!
    Un Arciduca, no me ricordo qual, forsi Francesco Salvatore, insoma quel scampà nele Americhe soto falso nome.
    Drento par che fussi spiegà pulito tuto punto per punto, ma ela se ga comportà de Maestà Apostolica fin l’ultimo e sui contenuti de sta letera, schluss!
    Magari, povera vecia no iera gnente de cussì fondamentale e la diseva ” Ich weiss…” 🙂 , giusto per darse importanza…

  11. dimaco ha detto:

    visto che parlemo dela Defonta, ieri sul picolo ghe iera una interesante letera de un nobile gorizian che vivi a klagenfurt tala quale se lamen tava de come che xe finida in baso Gorizia, la perla del impero austriaco. Saria interesante spunto de discfusion se la redazion la postassi

  12. effebi ha detto:

    eh quela volta lavorava tantissimo …el porto de gorizia… altro che desso…

  13. Fiora ha detto:

    @12 mi certo sarcasmo no lo condivido o perlomeno , no tra de noi…
    Se taluni de noialtri abbandona per un attimo i cupi pensieri del presente e se rifugia nelle memorie che in queste terre ga vissù i loro bisnoni, o cita le proprie fonti de conoscenza e senza gigioneggiar, con linguaggio familiare mai cattedrattico (NON ala Luigi Ve per intenderse…) no vol miga dir che i xè mone, no?!
    E co’ no xè astio etnico , ste rimembranze solo affratella .
    Chi che no condividi, anziché ironizar… che salti!

  14. Matteo ha detto:

    Mi diria che xe ora de far referendum per tornar soto ll’ Austria

    Firmo subito

  15. Sandi Stark ha detto:

    Tamata Pečar che tanto gaveva ciacolà co’ Zita, la riferissi che la gaveva una sua opiniòn su Mayerling, ma niente de preciso. Podevo domandarghe a Karl quando lo go intivà l’ultima volta, ma iera el funeràl de suo papà e no me sembrava el caso.

    A proposito, el caminava per strada solo senza scorte la mattina del funeràl, el me gaveva visto mi e mio fio, el ga sentì che ghe mostravo el novo Imperatòr al mulo, el se gaveva avvicinà per ringraziarne de esser là. Rampolli de altre ex Case Regnanti a ocio e crose, gavessi zercà de venderne Rolex falsi.

  16. ufo ha detto:

    @14 E come li convinzemo, i austriaci, a ciorse in schiena i miseri resti del Litoral? Più probabile che i rispondi: “Voi lo gave rovinà, voi ve tegni i rotami”.

  17. Eric ha detto:

    Bravo @Matteo. Firmo anche mi!

  18. Fiora ha detto:

    @”Rolex falsi” Grande, Sandi…e reale!
    No “regale” propio VERITIERO, usti! 😉

  19. Diego Manna ha detto:

    ah ah anca mi go ssai aprezà quela dei rolex falsi 😀

  20. Fiora ha detto:

    ” ROLEX FALSI”: 😀 😀 😀 Sandi, Diego e mi, parlando de principeschi pataccari, pensemo tuti tre al principe balerin o in alternativa a su’ pare? 😉

Lascia un commento

Il tuo indirizzo email non sarà pubblicato. I campi obbligatori sono contrassegnati *