28 Settembre 2011

Trieste-Budapest ciclodiario 10: l’odissea ferroviaria del ritorno a casa

Qua le puntate precedenti

Dopo un giorno da turisti, riprendemo le spoglie de viagiatori. Semo pronti per afrontar la parte più dificile del’impresa: el ritorno in treno. Le borse xe pronte, no le tocheremo più se non per stacarle e riatacarle ale bici a ogni cambio de treno. In scarsela solo el streto necessario: schei, biglieti e carte d’identità. Ciolemo qualcossa nela botega magnativa (no vedevo l’ora de scriver sta parola) che xe soto el nostro apartamento. Mi e Erich se fermemo sula porta a far finta de comentar la lista de gelati tacai sul muro, senza capirghe niente. In realtà butemo l’ocio sul’ultima hungaronacici che paga in cassa. Una vecia ne napa subito e la se la ridi. Semo felici e continuemo el teatrin per la nostra unica spetatrice non pagante.
Taco sula bici el ricordo de sto viagio e procedemo verso la stazion, dove saluderemo de novo el mulo Ivan Curzolo.
El primo treno xe Budapets-Gyor. No rivemo trovar dove xe sti famosi posti per le bici. Chiedemo. Dei austriaci ne iuta. Muloni, i posti per le bici xe sti qua dei. Senteve e metevele a fianco nel coridoio, cossa po’! Otimo. Blochemo completamente un vagon.

Sfiga vol che sia proprio quel col bagno. E puntuale, dopo un quindise minuti, riva el sior che devi corer assolutamente a far le sue robe. Un casin per spostar tuto, bici in impenada tra i sedili, riode che lo incragna, ma ala fine el riva a compier la sua mission.
Cambio treno: Gyor-Vienna. Za stufi del viagio, se metemo a zogar al zogo de indovinar el personaggio che te stà pensando rispondendo solo si o no ale domande. Se parti dai classici, nissun indovina Moira Orfei, poi el zogo svaca bastanza presto visto che val anca personagi de fantasia. Personagio secondario de un film. Maschio. Spelà. Sui 40. No se sa che lavoro fa. Su un tram. El ciapa una multa. Nela scena xe anche un vecio. No el vol pagar la multa. Si, se vedi solo tre personagi in tuto. El vecio ghe frizi al controlor. Si, el controlor ga i bafi. Bon, vedemo se capì chi xe 😉
Trascoremo nela capitale austriaca un tre orete. Erich, che ga lavorà un periodo qua, ne fa da guida esperta in bici: questo xe quel, questo xe quel’altro, questa xe la strada che fazevo mi in bici, qua xe dove i napoletani travestidi da austriaci me ga ciulà la bici. La cità xe piena de personagi interessanti. Fra i vari artisti de strada, quel che ne incuriosissi de più xe un finto tenista atempado che se ga inventà un numero notevole: sule note de una canzon similpostnewage lui stà là, sul suo trespolo, racheta in man e sguardo serio, a moverse lentamente, ora de qua, ora de là, nela danza del bradipo tenistico.
No ga ingumà gnanca un povero, se vedi che el mondo xe ancora tropo indrio per capir la sua arte.
Xe tanti ciclisti in giro, e qualchidun se porta a spasso el can.

Rivemo in stazion. Ne vien in mente che gavemo in scarsela solo i biglieti per Villaco, dopo no gavemo ancora deciso cossa far. Nela miglior tradizion, la muleria fa sempre tuto in ultimo. Decidemo che la soluzion migliore xe dormir a Villaco, cior el treno per Jesenice, e tentar là el cambio record in 3 minuti per Sezana. Xe possibile? E se lo cichemo? Bu, penseremo in ultimo po’. Rivemo de scampon a cior i biglieti e za dovemo corerghe drio al treno che ne stà per scampar.
Partimo per Villaco. Dove se meti le bici? Casin. Muli, butele nei scompartimenti dei.
Manovra bastanza epica. El coridoio xe strento. La gente ga de passar, i ne brontola che se movemo. Bon, passa prima ti ah. Ghe brontolemo. Tuti brontola. Una volta no i gavessi lassà. Stà massimo due bici per scompartimento.

Prova meter tre dei. No, no stà. E bon, ocupemo due scompartimenti per le bici, e noi andemo a sentarse in un altro vagon. Ne vien in mente che se ciapavimo el mitico Budapest-Trieste, onzendo el capotremo, gavessimo dovù meter tute 4 le bici più noi in un solo scompartimento, per tuto el viagio. Saria stà ssai de rider.
Fora, tuto scori veloce. No te rivi fissar qualcosa de particolare. Case, alberi, strade, gente che bagola, pale eoliche che girando zerca de farte indormenzar. No te senti i odori, no te senti i rumori, no te godi abastanza dei colori. Sentà sul tuo sedil, te son solo un spetator de quel che nassi fora, no te pol viverlo. Xe come co te ieri picio e partiva el treno e ti te ieri convinto che el treno iera fermo e che se movessi tuto el resto. El mondo te stà scampando e te resta solo sto vagon de viverte, con le poche robe che el ga dentro. Gente stanca, polvere, tende che no riva a farte da cussin. No son un amante dele cufiete, preferisso tegnir le rece a disposizion de quel che el contesto vol donarme ad ogni istante. Dentro un treno però, la monotonia regna bastanza sovrana.
Rivemo a Villaco che xe ormai sera. Ne par de esser za in Italia. L’unico local verto xe “l’aperitivo italiano”. Se sentemo. Vicin de noi xe gente che parla in veneto (sto giro per bon) e in furlan. Se ciolemo un spritz, tiremo fora le carte e pensemo che dovemo tirar in qualche modo fin le 4. E xe le 22.
Presto l’aperitivo italiano sera, se spostemo, femo un giro, ma xe za tuto un deserto. L’unico posto verto xe, oviamente, un kebabaro. Mi senza pomodoro, grazie. E el chili te vol? Chili nel kebab? Mai sentì. Ma go za dito senza pomodoro, me seca far la parte del rafinà. Bon, daghe de chili dei.
Dio stramaledica el chili sul kebab. Per bon, no stè cior. Mai. Mai. Xe l’impersonificazion del male. Xe el cudic fato a salseta maledeta. Una spudaceta de chili me rovina totalmente la cena. Me vien de magnar carta vetrata de quanto brusa. De bever dale pozanghere, che no xe. E alora dale fogne. No xe chili sta roba, xe un traciante radioativo. Se te me chiedi, son in grado de dirte l’esata posizion in cui el se trova in sto momento in panza. Ecolo in stomigo. Desso el sta rivando nel’intestino, giusto qua dove go el dito. Speta un atimo…ah eco, desso el xe qua. Cussì per tuta la note. 10 ore. Desso so l’esata tempistica dela mia digestion, che robe.
Se distiremo sule panchine dela stazion.

I le ga studiade per no farte dormir, par. De feraz, frede, e con i pogiamani che no te rivi a star in nissuna maniera. Dopo un poco, vado distirarme sul finestron de drio.
Sorgi per l’ultima volta el sol. Sto qua xe el stesso che vederemo anche da Trieste, fra qualche ora. Xe el sol del ritorno ala normalità, e el se porta drio un poca de malinconia. Mutismo e rassegnazione.
Parti el trenin che ne porta a Jesenice. Finalmente le bici ga un posto decente dove star.

Semo parechi ciclisti qua. Forsi fa tuti el nostro schema. El cambio in tre minuti. O sarà una lota a chi resta zo, o el treno farà el cocolo e magari el ne speta tuti. Rivemo. Daghe. Ghe demo. Tuti che cori come mati. Ma ghe la femo, i binari xe vicini, no xe grossi problemi. Otimo. Semo sul Jesenice-Sezana, riveremo casa in tempo.
Riva el controlor. Sezana abbiamo un problema. Sto treno ferma a Nova Gorica, là dovè cambiar e cior el Nova Gorica-Sezana. E bon.
Cambiemo. Riva el controlor. Sezana abbiamo un problema. Sto treno ferma a Stanjel, là dovè tacarve al tram. E bon.
Scendemo a Stanjel, semo soli. Dopo gaver passà le ultime 24 ore a cambiar 6 treni, sto ultimo tochetin de far in bici xe solo che el benvenuto, e ne par un giusto tributo ale nostre fedeli compagne de viagio. El tempo xe otimo, passemo el confin, bevemo l’ultimissima radler a Opicina. Se sentimo ancora un poco stranieri, o straniti, anche se ormai semo a casa. Su quela sedia ghe xe el Picolo, chissà cossa xe nato in sta setimana che ierimo via. Forsi qualchedun ne lo conterà. Sicuramente no poderemo condividerlo coi altri, visto che ormai xe passà.
Poi, ognidun va per la sua strada.

Un meseto dopo, la ciurma se ritrova a beverse una birona.

E za se parla dei prossimi viagi. Croazia? Scandinavia? Estonia, dei, che no savemo gnanca dove xe esatamente. Treni? O pulmin che forsi costa meno e se godemo de più anche sta parte del viagio? Keep all dear…per el momento le bici xe tute a riposarse, in atesa de ricominciar l’aventura.
E far un libro? Diario e pupoli? Me ricorda qualcossa… No, no solo diario e pupoli. Diario in 10 tape che sia l’ossatura, poi da ogni tapa estrapolar un logo, una persona, una Lasko, una Dreher, una festività, una cicogna, e da queste ricavarne un racontin, una storiela, una maldobria ambientada nei loghi dela defonta. Bel. Femo dei. Ma si, faremo dei. Fin che se divertimo a far, is good.

Tag: , , .

17 commenti a Trieste-Budapest ciclodiario 10: l’odissea ferroviaria del ritorno a casa

  1. Maximilian ha detto:

    Aieie Brazo?

  2. Diego Manna ha detto:

    Lui!
    Aieie Brazorf! 🙂

  3. Maximilian ha detto:

    Ah go sbaglià el cognome!

    Ah buon Voleada!

  4. arlon ha detto:

    bel de leger 😀 ottimo giro!

  5. angiaz ha detto:

    complimenti muli, bel giro, bella esperienza e racconto figon!

  6. Dag ha detto:

    Bellissimo il resoconto, ho veramente viaggiato con voi! Più foto delle “hungarocici” la prossima volta, però! 🙂
    Grazie anche per essere andati a Villach in un locale friulano, dì la verità: vi mancavamo noi “lanfur”, vero? :))
    http://www.contarena.it/gruppo-spritz-time.html

  7. Andrea Da Fino ha detto:

    Gran bel racconto di viaggio Diego, talmente interessante che mi sono letto tutte le dieci puntate una dietro l’altra. E mi sono scompisciato dal ridere, soprattutto alla descrizione delle spore del verme solitario.
    E mi è piaciuta molto anche quella cosa dei piccoli passi, molto profonda e molto vera.

    Roba favolosa, ottima lettura. 🙂

  8. Maximilian ha detto:

    El mulo ga talento!!

  9. Fiora ha detto:

    Ara a mi me ga continuà a comoverme sto ciclodiario.
    De quest’ultima parte , particolarmente poetico “…ch’el mondo te stia scampando e te resti solo sto vagon de viverte cole poche robe ch’el ga drento…”
    e ” preferisso tignir le rece verte a disposizion de quel ch’el contesto vol donarme ad ogni istante”
    e el morbin che riprendi el sopravvento nella picaresca descrizion del chili & Kebab!
    Con la fantasia e cuor patòco, rumizavo con voi. GRAZIE DIEGO !

  10. dimaco il discolo ha detto:

    perchè diego ga sempre il bicer de bira più grande? 🙂
    no xe una critica ma una constatazion.

  11. Diego Manna ha detto:

    iera acqua dentro 😛

  12. Fiora ha detto:

    @12 orpo el nostro Diego come un’ entreneuse…

    😀 😀 😀

  13. Diego Manna ha detto:

    la bira la ga bevuda tuta Paolone Vidoz 😛

  14. Riccardo Ferrari ha detto:

    Grande Diego, el ciclodiario ga reso questo viaggio epico !

  15. Katja ha detto:

    figo. ribadisco l’estonia

  16. Alice ha detto:

    bravi muli ve go seguì tutti i giorni

Lascia un commento

Il tuo indirizzo email non sarà pubblicato. I campi obbligatori sono contrassegnati *