Trieste-Budapest ciclodiario 9: la festa di Santo Stefano, il tokaj e il treno aumma aumma

Qua le puntate precedenti

In vacanza, el giorno dopo de una note a base de bira&palinka finida ale 4 de matina, quel de cui proprio no te senti la mancanza xe la sveia. E invece el muezzin de Erich taca banda, ale 8. Subito dopo, taca el robotin de Star Wars de Cionn. Bon, le sveie inoportune xe fate per esser distudade. Ma ale 8.30, eco che lui, colui el quale ne gaveva salvà preparandone el thè prima de andar a dormir, diventa el nostro aguzin. Cionn ne zuca pei pie. El fa la fastidiosa telecronaca de come el ne sveierà. L’impiza tuto. El decreta l’inizio uficiale dela giornada. Ou xe la festa nazionale dei. Xe tuta l’Ungheria che riva. No podemo perderse i famosissimi festegiamenti dele 9 de matina. El ciapa un do tiri. Ma no el desisti. El xe tropo determinà e in chiaro vantagio fisico-cognitivo sui altri. Erich se arendi e el se imola per la causa, scendendo in strada con Cionn. Mi e Pasta restemo a remenarse ancora un atimo per i famosi 5 minuti diluidi in 1 oreta, anche se ormai de dormir no se ne parla.
Budapest xe in festa. I ponti xe serai al trafico e cussì un fiume de gente scori tuto el giorno perpendicolarmente al Danubio. Andemo a Buda, salindo verso el castel e i bastioni dei pescadori a pie. I scalini xe decisamente i nemici numero uno dei ciclisti. Par quasi impossibile che le gambe rivi pesarte tanto, xe come se un te gavessi fato una sponta nei quadricipiti butandote dentro piombini. Le bici xe rimaste tranquile a casa. Adesso no se sentimo più viagiatori, ma semo diventai turisti veri e propi. Cartoline e souvenir. La bici no te permeti de gaver tanto spazio che vanza in borsa. El souvenir nei viagi in bici xe un lusso che no te se concedi quasi mai.
Xe caldo e sol. Se femo la classica foto da turisti finti papponi con la limousine.

Che sia per bon una de queste, sugeride dal nostro letor aldo? Gavemo butà l’ocio drento, ma no se vedeva niente.
In sta foto, invece, se no sé maliziosi, i sogeti xe oviamente Erich, Cionn e Pasta, a destra 😀

Decidemo che xe giunta l’ora de farghe lo sgarro massimo ai cugini furlani: finanziar deliberatamente el Tokaj ungherese.
Le cantine del castel, carighe de vin, xe visitabili, e te pol anca assagiarne un pochi. Pagando, oviamente. Sarà che semo stanchi de caminar, ma el giro pei soteranei dopo un poco diventa ripetitivo e xe trope scale. Una, traditrice, la te fa scender in pichiata in un buso dove poi no xe niente de veder. Xe tropo, decidemo de concentrarse sui assagi e basta. Se sentemo e se demo, per quanto possibile, una parvenza de tono da finti intenditori de petess. CHe no ga ancora smaltì del tuto l’hangover dela sera prima.
I ne porta tre vini, un Olazrizling, un Bikevar (sangue di toro) e infine el mitico Tokaj, che lassemo per ultimo. Per tuti e tre, el mato ciol la botiglia, la verzi, el ne conta la storia del’orso su chi lo fa, come e dove, el ne versa mezo bicer e dopo el ne conta ancora qualcossa. No savemo ben qual sia el galateo dela vinazza, nel dubio spetemo che el finissi de ciacolar per cominciar a sagiar. Pieghemo el bicer de una parte, missiemo, nasemo, e sagemo. Se sentimo ssai sommeliers dele nosele. La mia massima conoscenza xe che ogni tanto xe de dir “gusto fruttato”.
Dago el mio articolato giudizio da enologo provetto: “ciò, xe bon, prova anca ti”. Cionn xe ssai più bravo. El ghe rifila una serie de domande sul tipo de teren, su come se fa, sula piova, sul’economia globale regionale e su come le mule se lavava i pie prima de strucar l’uva, che el mato xe tuto contento de risponder. El sa tuto, ciò.
Riva finalmente el turno del Tokaj, che za l’atmosfera xe diventada più alegra.

Ciò, xe dolce, e no c’entra niente col tocai furlan tipicamente furlan. Comunque “ciò xe bon” anca questo. Sfidemo el mulo sula storia dei nomi del tocai, per veder se el xe preparà e quale xe la sua opinion a riguardo. No el ga ssai pel fioco in realtà. Si, esisti un vin in Italia che se ciama Tocai, ma si, no c’entra niente con questo e i ghe ga fato cambiar el nome. E po’ bon. Niente giudizi o zighi de bataglia. E pensar che Cionn voleva farse sponsorizar el viagio dal tocai lanfur per vegnir a tirar longhi.
Andemo fora dale cantine. Xe i aerei che ne svola sul naso. I passa anca soto i ponti, i disi. I xe fora coi copi.
A Budapest i xe ssai avanti. I me disi che i stà cambiando le sine del tram metendo dele nove con una picia parte in goma perciò che no fazi casin. Anche qua i ga i veci che varda i cantieri. Ma i li tien cussì in considerazion che i ga adiritura un sistema aposito per no rovinarghe la sorpresa finchè no i cuca de vizin.

Decidemo che, visto che dovemo partir doman, forsi xe el caso de andar a informarse come funzia el treno. Rivemo in stazion e vedemo che el Budapest-Opicina xe là che speta. Bechemo subito un capotreno e ghe chiedemo se el pol portar bici. A Trieste i ne gaveva dito che nosepol, volentieri. Ma sa come xe la storia de Pierino e el lupo…a furia de sentirse dir volentieri no ghe se bada più.
El capotreno ne disi che nosepol. Ma. El disi “ma”. Otimo. El disi “Ma forsi”. No se pol, “ma forsi”. Ne par za ben. Aprofondimo el “ma forsi”. Dipendi da chi xe capotreno. Ah, comincemo a capir. “Ma forsi”, se comprè tuto un scompartimento, e quindi gavè tuto un scompartimento per voi, e dopo paghè, forsi podè meter su le bici. Strizada de ocio. Ah, pensemo de gaver capì. Prima compremo el scompartimento, pagando. E dopo paghemo, complemento ogeto indefinito. Ghe disemo che gavemo capì. El capotreno invece forsi pensa che semo un poco come Homer:

e el ne chiedi se partimo ogi, perché visto che xe lui, ammicco, FORSI rivemo a meter su la bici, ammicco ammicco. Sto giro niente strizada de ocio, ma un plateale gesto de polici e indici de ambo le man che se strofina. Noi però partimo doman, ma gavemo capì come funzia, lo saludemo e speremo de vederse doman, amico ammicco.
Semo tuti imborezai de sta roba. La nostra prima coruzion. Che figada. Se femo la foto col muso da aumma aumma.

Se chiedemo quale sia la cifra. 50 euri? Bu, no sarà tropi? 10 a testa, 40? Bu, magari xe pochi. Ma el servizio xe completo? No xe che co’ rivemo in Croazia i ne fa el cul come simioti e i ne fa magnar le bici senza gnanca la zivola? Ma 4 bici ghe stà in un scompartimento? Forsi. Se te paghi, magicamente le starà, disi el nostro ammicco.
Bon, intanto femo la fase uno del piano. Comprar tuto un scompartimento. Andemo in biglieteria e afrontemo la fila imperiale.
El Budapest-Opicina xe tuto pien. Sia doman, sia dopodoman. Caro Cogoi. Salta cussì in 10 secondi la nostra prima coruzion, pecà.
Altra fila per le informazioni, zerchemo de capir come rivar a Trieste. Una signora ssai gentile ne disi che la roba migliore xe partir ale 10, passar per Vienna, e rivar alle 22 a Villaco. E dopo xe longhi. Da Villaco in treno rivar a Trieste no se pol, te se tachi al tram. Che no xe gnanca quel. Alora te se tachi a qualcossa de altro, rangite. Ma come, nissun colegamento tra la capitale del’impero e el porto?
Zerchemo un poche de opzioni: podessimo dormir a Villaco e tornar in bici el giorno dopo. No dei. Alora podessimo andar da Villaco a Tarvisio in bici e ciapar el treno là. I treni da Tarvisio xe quasi tuti sostituidi da pullman. E che bale ara. La terza soluzion saria ciapar el treno da Villaco per Jesenice ale 5 de matina e poi cambiar in 3 minuti per Sezana. 3 minuti? Con le bici? Xe mission impossibile. E dormimo in stazion? No dei, se ciolemo una stanza. Ma pagar una stanza per dormir 5 ore? Va contro tuti i sani principi istriani. Discutemo. Bon, intanto fin Villaco xe certo che dovemo andar, ciolemo almeno quei biglieti dei, e viva l’A e po’ bon.
Altra fila in biglieteria per cior i biglieti. Un croato ne se avicina e ne chiedi 1000 fiorini. Ghe va ben anca 4 euri. El devi pagarse el treno per tornar a casa e no el ga più soldi. El ne disi che xe tuta colpa dei prezi dele babete che xe salidi al’inverosimile, no el gavessi mai pensà, no xe più la Budapest de una volta. Ah. Lo finanziemo perciò che el ne moli. Grazie amici italiani, i primi che lo aiuta. De dove sé? Ah, Trieste, mi go un amico a Bassano del Grappa. E bon ah, ne fa ssai piazer che te gabi un amico a Bassano del Grappa. Ma ti croato de dove te son? De Novi Grad. Ah.
Sta roba me meti un poca de tristeza. Un de Novi Grad che per zercar de atirar le simpatie e i 1000 fiorini de quatro triestini el milanta amicizie a Bassano del Grappa, inveze de dir che el xe istrian de qua drio l’angolo. Bon, ma quindi te ciapi el Budapest-Opicina. Vara che xe pien, no te troverà posto, va a informarte. El scampa fazendo finta de andar a informarse. Con 4 euri in più in scarsela per le babete ungheresi.
La fila intanto no va avanti. Davanti de noi, due mule americane, anzi disemo statunitensi. Se capissi che le xe americane perché le xe conzade come i telefilm americani. Le xe americane perché se capissi che le xe stupide, disi Cionn. Fra i altri indizi, el fato che le parli inglese con acento american (ricordemose che noi semo quei che sentiva parlar le francesi in veneto). Fato stà che le ghe meti una vita. Le ciacola con la biglietaia. E cussì no va ben. E cussì si, e cossa dovemo far, e che treno xe. Mez’ora bona, minimo. La nostra pazienza xe al limite. Ogni tanto, una dele due riva a guadagnar un 5 minuti de bonarietà maschile ripetendo una manovra atta a stendere i lunghi biondi crini che si sciolgono sulle sue rosate spalle verso il cielo per poi farli ridiscender in una cascata di aurico splendore ammaliante. Comunque, le ga roto le bale dei.
Toca finalmente a noi, che savemo za tuto dei biglieti che dovemo comprar. Ghe meteremo 2 minuti, no? No. La biglieteria devi esser rimasta ai tempi del’impero. Stampa questo, timbra, ricopia a man, stampa de novo, daghe, meti in busta, lica, scrivi, cambia pena, meti il sigillo del sacro graal, trova la scimmia di giada, ricomponi il puzzle incantato e spediscilo nel tempio di Altair. Ciò, anche noi ghe metemo un casin. La gente se stuferà e ne fucilerà. No problem muli, provo far anca mi la manovra americana dei cavei che sicuro funziona.
Finalmente, zenemo ungherese in un ristorante ungherese. Budapest xe ancora piena, la gente speta i foghi d’artificio. El più grande spetacolo che go mai visto. Mez’ora de foghi, fati esploder in contemporanea in tre punti diversi del Danubio. Fantastico. Finidi questi, la gente comincia a defluir. Lungo el fiume, i altoparlanti continua a mandar musica. La acompagna i titoli de coda, disi Pasta. Ma no sarà cusì. La parte più complicata del nostro viagio stà apena per cominciar.