18 Settembre 2011

Trieste-Budapest ciclodiario 7: via da “Misery non deve morire” e la leggendaria pizza napoli

Qua le puntate precedenti

Sveia. Andemo fora dal nostro bed&basta ala disperada ricerca de dove far breakfast, in tempo utile per poi scampar prima che rivi la parona Misery col suo carico di sprizzante simpatia. Ma par che ghe sia el coprifuoco anche de matina. Verzi tuto ale 10.
Ma speta un momento, cossa xe scrito là? HOSTEL. Una insegna grande come una casa. 100 metri soto de do che stemo noi. E cossa i stà fazendo tuti là sentai? Colazion. Tuti? No, no tuti. Tute. No xe un solo mulo sentà a quei tavoli, per bon. L’ostel dele hungaronacici. Che noi el giorno prima no gavemo assolutamente visto. Bon dei, zerchemo de vardar el lato positivo. Sicuro el costava un casin. Sicome ne piasi farse del mal, chiedemo. Costava la metà de quel che gavemo pagà noi de Misery. Sconfortai, se sentemo a far colazion. El mato al banco xe ssai cocolo. El ne chiedi perché no semo andai là, che xe bel, che xe rustico, che xe novo, che xe tuti cocoli e che, el ne striza de ocio, xe pien de “ladies”. Eh, perché semo mone, cossa dovevimo dirghe.
Prima de abandonar Revfulop, Cionn va nel’uficio turistico a farghe pupoli. Ah no ve stava cocola Misery? Ma come, preferivi l’ostel dove pagavi de meno? Che strani sti italiani, ara.
Passemo davanti a un museo del’aviazion. Questi devi esser quei elicoteri che Rambo tirava zo con l’arco, ciò. De drio, el mitico Mig-21.

La ciclabile continua sempre ‘ssai bela e piacevole. Un solo difeto: la mancanza de fontanele. Che, dal’inizio del nostro viagio, xe praticamente una costante. A parziale consolazion, trovemo una fontana de acqua frizante. La gente se porta le botiglie de casa per riempirle. No gavemo el vin, se no un festin a base de spritz saria stà d’obligo.

A Balatonfured, dove se fermemo per el pranzo, Cionn ga ancora caldo e no el rinuncia a un idromassagio volante.

El clima, come nel resto del lago, xe ancora decisamente quel vacanziero. Muleti che fa le bobane con le bici da veri bikers.

Ciclisti aventurieri che saluda le hungaronacici sentade sule panchine prima de ripartir.

Saludemo anche la parte ungherese più turistica, e tornemo a masinar chilometri su stradine più silenziose e contemplative, dove la rana de Cionn pol tornar nela sua quiete abituale, non trovando più altri viagiatori su do riode a cui gracidarghe la nostra empatia.
I bareti diventa sempre più radi, e semo costreti a beverse l’abituale radler pomeridiana su una panchina fora de un supermercato, a Nadasladany. Radler gusto limon, mela o pompelmo. Bonissime, tute e tre.
Atiremo l’atenzion de un locale. No passerà tanti ciclisti de qua. El ne vien incontro, el scendi dala sua bici che devi gaverne passade veramente tante, el ne disi qualcossa in ungherese che no capimo, ghe chiedemo se el parla inglese, tedesco, francese, triestin, ma niente, el rimani fedele ala linea e el ne inonda de una storia lunghissima, che ogni tanto devi far rider perché el ridi. Ridemo anche noi, perché el personagio xe ssai comico. El se senta con noi sula panchina, dovemo esser un bel quadreto. Erich ogni tanto prova una garbata risposta “te sa si”, “molime dei”, noi se limitemo a anuir, cercando de capir almeno el tema de fondo. Ma l’ungherese no ga praticamente gnanca una parola simile a quel che noi conossemo, e naufraghemo nel monologo. Riva un altro nativo folcloristico. Jeans lerci, giacheta de quele catarifrangenti de co’ te smonti del’auto in autostrada sora torso nudo viloso, cavelada longa e onta, barbeta sfata, caminada da nagana. I se saluda. Chissà cossa gavessi podù contarne sto altro, qualche altra storia de cui probabilmente no gavessimo capì niente, ma che ne gavessi fato rider comunque. Poi, al’improviso, el nostro amico se alza, el ne strinzi la man a uno a uno, el ghe dà una paca sula spala a Erich (evidentemente el ga aprezà ‘ssai el “molime dei”) e el ne augura, credemo, bona fortuna per el viagio.
Pici passi. Un viagio in bici xe fato de pici passeti. La bassa velocità te permeti de aprezar tuto, de no perderte i pici particolari che altrimenti restassi anonimi. I pici passi te permeti, co’ te entri in un paeseto, de entrarghe veramente, de sentirlo tuo, de respirar a pieni polmoni la sua atmosfera, de imerger totalmente i tui cinque sensi in un novo contesto. I pici passi te permeti cussì de incontrar queste persone, e de non sentirte un semplice osservatore, ma de rivar a condivider con lui tuto quel che te stà intorno e de cui za te se senti parte integrante, anche in quei pici 10 minuti. I pici passi fa questo. Fa assaporar i luoghi, fa assaporar le persone, fa assaporar la tua crescita assieme a queste. Pici passi come filosofia de vita.
Arivemo a Szekesfehervar, ultima tapa prima de Budapest. Notemo un grupo de mule dai trati sudamericani. Ne fa strano, abituai come semo ale hungaronacici. Le ga tute una felpa uguale. Trovemo un altro grupo “straniero” in monofelpa. Poi una banda bulgara che sona in giro per le strade. Scoprimo che semo capitai nela serata de un festival folk, e infati la piaza dela belissima cità xe piena e el clima xe quel de festa. Che cul, senza saver niente.
Xe piutosto tardi però, e gavemo poco tempo per trovar una zimmer. Se fiondemo in un hotel e tornemo zo rapidi. El cartelon disi che finissi tuto ale 20. Semo za oltre, ma la festa continua, per fortuna.

Dopo un po’, la fame del ciclista no ne dà tregua, e zerchemo un posto dove magnar. La Lonely Planet de Cionn ne indica un posto veramente tipico, carateristico, rustico, peculiare, imperdibile, ungherese tipicamente ungherese. Se lancemo là. Lo trovemo. Solo che desso el xe un poco diverso.
El se ciama: “Da Lorenzo”. E el ga anca el sprizze.
Per la seconda volta su tre sere ungheresi, ne toca magnar in un ristorante che de ungherese ga ben poco. Inveze de preocuparse del tocai, i dovessi preocuparse de salvaguardarse i locai. E bon ah. Cossa ciolemo? A sto punto Erich ordina l’apoteosi del’italianità:

Ghe ridemo su. Per dar a Cesare quel che xe de Cesare, xe de dir che gavemo magnà ssai ben, iera bon. Ma mi volevo el gulash, ciò.
Fora dal ristorante, tanto per cambiar, la cità se ga svodà. Resta verto un bareto, dove se bevemo l’ultima palinka. Xe dei muloni imbriaghi che ghe dà zo de palinke. I senti che semo italiani e i ghe tien a farne sentir la colezion de parole italiane che i conossi. De ripetibile, oviamente, il nulla. D’altra parte l’italian i lo gaverà imparà da Renato, quel del Grande Fratello ungherese.

Distanza 101.6 km
Media 18.4 km/h
Tempo 5 h 32 min

Tappamappaltimetria by Eric Medvet

Tag: , , .

13 commenti a Trieste-Budapest ciclodiario 7: via da “Misery non deve morire” e la leggendaria pizza napoli

  1. aldo ha detto:

    L’ostello di Revfulop immagino fosse l’Hullam Hostel…

    http://www.balatonhostel.hu/italiano.php

    sulla home del sito:”Girare in bicicletta. Ti aiutiamo a scegliere l’itinerario di tuo gradimento”…lo stesso del primo gruppo di ciclohungaronacici…

  2. Riccardo Ferrari ha detto:

    Malediz ! El iera pure su internet, se me collegavo magari lo trovavo …. grrr maledetta megera de Revfulop 🙁

  3. Fiora ha detto:

    Piza Napoli de Lorenzo in Ungheria, e piza cinese qua de noi… ah! non ci sono più le stagioni di mezzo…
    E in mezo a tanto color e folklor, cossa va a domandarte sta pignola de taliana?:
    Le tre lattine dela foto dopo ‘verle imortalade nela foto le gavè butade ‘ntel scovazon? Giusto che no se femo conosser…fa gnente se no iera quel dela diferenziada 😉

  4. Dag ha detto:

    Ahahah, mi fate morire!
    Ma insomma, ‘ste ungheresi, meritano o no? Non sarà un caso se Rocco Siffredi vive da quelle parti, no? 😉

  5. Diego Manna ha detto:

    L’hungaro-CTFfactor xe decisamente high, confermo 😉
    fiora, le gavemo butade via, mancassi altro! 😉

  6. Luigi (veneziano) ha detto:

    Volgarmente parlando: ve gavè cazà almanco ‘na volta, o gavè pensà che po’ ve spompavi massa?

  7. Riccardo Ferrari ha detto:

    @6 I due “ammogliati” sono rimasti casti e puri, per i due “scapoli” non so dirti ! 🙂
    Comunque non c’era freschezza la sera, dopo la cena subito a nanna … e le uniche bionde che ci interessavano erano da mezzo litro !

  8. dimaco ha detto:

    chi xe i ammogliati?

  9. Diego Manna ha detto:

    i amogliai xe quei con la panza più granda, as usual 😉

  10. aldo ha detto:

    @7
    “le uniche bionde che ci interessavano erano da mezzo litro”

    Is Budapest a depressive town?
    http://www.youtube.com/watch?v=HED8bok5u9k&feature=related

  11. Diego Manna ha detto:

    eh eh, el comento 7 xe el classico comento da amogliato che però no ghe credi nissun 😉

  12. Riccardo Ferrari ha detto:

    @12 ha ah te me ga sgama’ !

Lascia un commento

Il tuo indirizzo email non sarà pubblicato. I campi obbligatori sono contrassegnati *