Trieste-Budapest ciclodiario 3: galina con do teste per tuti, brother

Qua le puntate precedenti

Se sveiemo ale 8, col celulare de Michele che taca banda con la musicheta de Monkey Island. Un zogheto che ga fato la storia dela nostra generazion e che ne rendi tuti almeno un poco felicemente nerd.
Te pol meter la sveia a qualunque ora dopo el primo giorno de pedalada, ma sarà comunque sempre un trauma sveiarse. Per qualche strano sortilegio, la sveia sonerà esatamente proprio sul più bel che te se gavevi rivà a indormenzar dopo una note tragica. Ierimo andai in busta stanchissimi, praticamente copai. Quele robe che za te pregusti quela che sarà la regina de tute le spavade. E inveze, co te son tropo stanco, te manca quel bic de energia che te servi per indormenzarte. El sono xe come una candela. Più la xe granda, più te sa che te se la goderà a lungo. Però per impizarla te servi comunque el fulminante, se no la candela no ardi e no se consuma. Eco, se te va dormir senza gnanca la forza de impizar quel fulminante, xe longhi. Gnanca l’efeto dele birone a cena te aiuta. E cussì te passi la note perso nei tui pensieri, tropo spesso tornando indrio ala realtà triestina, a quel che sta sucedendo là, quel da cui te volevi star separà per una setimana, quel che ora torna insistente a richieder el suo spazio, proprio ora, col buio, de note, proprio mentre te son lontan dala tua bici che no pol quindi ciorte in brazo e portarte via. E te scopri che la luna piena sparada in verticale fa più luce de un lampion. E te scopri che la tua stanza xe a un tiro de subuteo dala cesa, e che le campane sona ogni ora de note. E che se te seri l’unica finestra te le senti de meno, ma te trasformi la stanza in una sauna finlandese. E che ale 6 le campane sona ancora de più, fin a scadenarse per 20 minuti filai de saluto al sole. Poi le se calma. Forsi le campane xe creature noturne, va saver. O forsi semplicemente de giorno no te ghe badi più.
E poi capita de sentir un muezzin che taca cantar. Go capì che in bici le distanze par enormi, però te se chiedi se veramente semo rivai cussì lontan. E te scopri che invece xe solamente la sveia del celulare de Erich. E poi toca a quela de Cionn, el fis’cio del robot de Star Wars. Questa Data sicuro no la gaveva, ciapa!
Ghe demo zo de colazion. Se la cena rapresenta el pasto più desiderà e più godù del ciclista, la colazion xe probabilmente quel più importante e comico. Robe che te se stupissi de quanto te rivi a ingerir, abituado a magnar qualche biscoto o un panineto de Nutela (seconda volta che la vien nominada in sto diario. Signor Ferrero buta la pila dei).

La colazion del ciclista ga tuto un suo rituale. Scelta del posto. Ociada in giro se xe bele mule ai altri tavoli (mediamente, no). Consapevoleza de esser soli, probabilmente perché i altri iera za prima. Riempimento taza cafè. Riempimento taza late, cacao e cereali in bomba. Finidi i cereali, se passa ai paninazi dolci, de crema ala nociola (fin che no riva la pila de Ferrero no dirò più “Nutella” :P) o de marmelata. Due, de solito. Poi se passa ai salumi e formagi. Xe anca fritaia? Otimo! Via anca quela. Se concludi col yoghurt e col suco de fruta a oltranza. E infine, coi salumi che vanza, se se prepara i panineti per el pranzo e se se li porta via. Se pol, no se pol? Bu, no gavemo mai capì. Le altre volte nel dubio fazevimo i indiani e li scondevimo nele scarsele dei bragonzi o nei zaineti tatici. Sto ano gavemo deciso che basta dei, femo le robe fate ben, con una certa spudorateza. Se li preparemo, li rodolemo nele salviete e se li portemo via a man. Nissun ne ga mai dito niente. Xe de dir che nissun ne ga gnanca mai becà. Resta el dubio. Sicome semo stufi dei tropi Nosepol, disemo che se pol e po’ bon.
Una tra le soste che più te fa sentir “ciclista inside” xe quela al supermercato a comprarte le bumbe. Semo come i bambini, in zerca dele piroloze ale vitamine e sali minerali e enzima Q10 e Bifidus cagaregularis più complete e che più sodisfa le nostre esigenze de atleti ale prese con la fadiga. De solito se finissi per cior le più colorate, quele che costa meno, quele che ga un gusto più bon int’ela boracia, quele che spara più 100% dela RDA de tuto el possibile. “Ciol questa, ga scrito che ga tute le vitamine, tuti i minerali e + Selen! Questa si che tira de bruto!”. Gavemo vardà, ma Selen dificilmente stava in quel tubeto, gnanca liofilizada. Quindi no gavemo ciolto. La meio bumba però iera sicuramente el Guaranà del Che Guevara. Rivoluzionario diria. De ciorlo per poi tegnirselo come ricordo. Ma iera 5 euri, no stemo scherzar su ste robe. Sora i 2 euri Nosepol.
El percorso verso Lubiana, tra le ciclabili, xe stupendo. Gaveva ragion Paolo Tanze. Paesini, stradine, sentieri, boschi, campi de panoce, continui saliscendi con rapide discese tra alberi e picoli dirupi. Senza machine intorno, te ga piena libertà de usar tuta la strada.

Nel percorso trovemo tante robe interessanti. Vece machine abandonade, un Trabant dentro una Volskswagen.

E bestiuzze, tante bestiuzze. Un gato che se zoga con un povero sorzeto pena ciapà.

Una marea de rapaci non meo identificadi che ne svola in testa, e che Cionn che ga el linguagio tecnico disi che “i xe grandi, ma no credo più de qualche pixel”. El pixel come nova unità de misura dele bestiuzze.

Un giovane Capitan Harlock che ne cuca de sconton.

Un poche de galine con una testa sola.

Muche che ne varda curiose, chiedendose come mai no stemo fermi anca noi a magnar un poca de erba scassandose le mosche dei oci.

Ma, su tute, la galina con do teste. Se i muloni americani dele due coste ga el loro saluto uficiale, West Coast e East Coast fato con le man, perché noi muloni de Trieste dovemo esser da meno? Eco quindi che nassi ufficialmente, ideado da quele geniali menti dei Trabant, el saluto uficiale dela muleria de Trieste: la galina con do teste fata con le man. Basta far l’aquila come che se fazeva de pici per far le ombre cinesi, e tegnir i polici separai fra de lori. Easy, Oh yeah.

Con questo gesto, a Lubiana Michele abandona el grupone, per inderogabili impegni lavorativi. El preaviso tropo breve no ghe ga dà bastanza tempo per rivar organizarse meo. Pecà, perdemo un grandissimo elemento, che podeva dar un contributo umano insostituibile al viagio.
Se saludemo bevendose una Radler al pompelmo dela Union, altra grande scoperta. La Radler no rientra nela categoria dele birechetetaialegambe, per cui da ogi sarà un apuntamento fisso dela metà giornata.
Non entremo a Lubiana, ma seguimo la ciclabile Pot che ghe gira intorno. Fantastica xe dir poco. Mi credo che i muli de Lubiana vegni qua ogni domenica in bici a divertirse. Xe boschi, salite, discese, una marea de percorsi dove perderse in un secondo. Con le nostre bici carighe de borsoni e de fadiga gavemo incrocià gente bardada de tuto punto che andava a far downhill.
Una deviazion che ne ga fato perder almeno un’ora sula tabela de marcia e che sentiremo per molto tempo sule gambe, ma sicuramente ne valeva la pena. Dopo tute ste discese, sentimo odor de fren dai dischi dela bici de Erich.

I miei freni se comporta ben. Do ani fa, sul Grossglockner, in discesa, li gavevo completamente consumai. Panico, co te struchi e te vedi che no sucedi niente, anche tirai al massimo. Specie se per tera xe tuto bagnà e te doverà afidar el tuto al fren davanti. Inutile dir che poi in sti do ani no li go cambiai, e la decision de partir per Budapest xe rivada in tempi tropo strenti per farme vegnir la voia de andar a comprar (bruto verbo) freni novi. Per cui go risolto girandoli, in modo de consumar anche l’ultimo tochetin che prima no entrava in contato con la rioda e che quindi iera ancora utilizabile. Istrianismo funzionale, per fortuna.
Arivemo ala Sava, e ne seguimo el corso fino a Zagorje Ob Savi, paesin nel quale trovemo un solo albergo in cui no i parla ‘ssai inglese e che ne spara 42 euri. “A stanza? Bon, otimo” digo mi. Ma inveze xe a persona. Brontolemo un poco e Cionn ghe indica el 38 sul preziario. Ah si, fata la xe, femo 38. Alora ghe indichemo che un poco più soto nel preziario ghe xe un 24, “femo 24 dei!”. Ma quel 24, i ne spiega, xe per chi che ciol una stanza per tre ore al pomerigio. “Riposo pomeridiano”, i lo ciama, ridendo sornioni. Ah. Gavemo capì. “E chi che ghe basta 2 minuti?”, ma la batuda no vien aprezada. E bon ah, 38 euri sia. Ma ghe porteremo via tuta la colazion, promesso!

Salimo. Spostemo el televisor in camera zercando qualcossa che ne fazi rider mentre se preparemo, ma no trovemo niente. Cenemo, e finalmente riva la lubianska a lungo atesa. Ma me iero dimenticà che qua la xe diversa, e probabilmente, visto dove semo, xe quela vera. La xe cola fritaia drento. Bona, certo, però molto più picia rispeto ala regina dele lubianske che za pregustavo. E bon. Almeno la bira xe da litro, e su quela no se pol discuter.

Pupol by Michele Zazzara

Tappamappa e altimetria by Eric Medvet:

Distanza: 101.6 km
Tempo pedalata: 5 h 32 min
Media: 18.4km/h