Qui la puntata precedente del diario.
Every inch between us becomes light years now. Che poi xe un verso de Eddie Vedder, che no ghe entra ssai coi viagi in bici, ma che me par comunque adato a render l’idea. Co’ te son sula tua bici, a 20 km/h de media (la nostra oviamente in realtà iera più bassa), le distanze ritrova de colpo la loro antica nobiltà, de quando no se coreva come mati con auti e vespini. Zontemo el fato che vivemo in una cità de confin, e dopo pochi chilometri in direzion est cambia lingua, cartei, face e panorami. E cussì, co’ finalmente riva l’ora de zenar a Logatec, che sarà si e no a 45 minuti de auto da Trieste, te par de esser za in un altro mondo, lontanissimo e iragiungibile da dove, solo poche ore prima, te gavevi lassà indrio la tua quotidianità patoca.
Bon, però ierimo rimasti che l’armata Brancaleone doveva ancora partir. El ritrovo iera al confin de Lipica, per le 10.30, che no sia mai tropo presto. Erich, Michele e Pasta rivava dala ciclabile, mentre mi e Cionn da Opicina. Tanto per cambiar, xe sempre chi che riva da più vicin a esser in ritardo, perché el sotostima la distanza, ancora evidentemente convinto de andar in giro in auto e no in bici. E cussì ala fine rivemo radunarse ‘pena per le 11 e ciapilo. Fato el punto dela situazion, partimo. 
Cossa gavemo nele borse? El bel de sentir sule proprie gambe el peso de ogni singolo gramo in più che te porti xe che te fa meditar sule robe de cui te ga veramente bisogno. No te ga niente che no sia stretamente necessario: mudande, calze, roba de bici in caso de piova o zima (quela volta sul Grossglockner che gavemo ciapà bufera de neve in giugno in braghete curte ne ga insegnà qualcossa), un do maiete, un per de braghe de meterse de sera, un per de scarpe de ricambio e un sugamaneto per tute le ocasioni. Stop. Erich, che ga la morosa farmacista, xe el medico curante del grupo, con una quantità industriale de pomate per le infiamazioni, i mussati, el scagoz, el post-fadiga, ghe manca solo quela contro le famose spore del verme solitario che vien fora con le scoreze. Mi go l’ancora de salvatagio alimentare: el baratolon de Nutela per tute le evenienze. Pesa più quel che tuto el resto.
L’asfalto soto le riode cori ssai veloce. Femo la stessa strada che gavevimo fato per andar a Berlino, ma el ritmo xe notevolmente superiore. Stavolta no piovi, e sopratuto no se semo ancora fermai a bever la prima bira, la famosa birachetetaialegambe. El traffico, su ste stradine secondarie, xe praticamente assente.
Se fermemo a far una foto in una cabina del bus.
La gente penserà cossa fà sti mone a farse foto in una cabina. Ma per noi la xe storica e la ga un certo valor afetivo: quatro ani fa, al nostro primo giorno sula via verso Berlino, la ne gaveva amorevolmente riparà per una bona mez’ora dala grandine. Gran bel’inizio quela volta: partidi da Piaza Unità, mi sbuso la rioda in via Fabio Severo. A Opicina, convinti de esser fenomeni, se bevemo subito una bira. Rivemo a Sesana e ciapemo grandine. Femo ancora pochi chilometri e Erich no riva più a piegar el ginocio. El giorno dopo el gaverà febre. Brancaleone al cubo. Me chiedo ancora come poi gavevimo rivà farghela a rivar a Berlino. Fine flashback.
Erich ghe piasi ssai corer e tirar el grupone. De drio, mi e Michele discutemo dela lubianskona+birona che ne speta per cena. Preferimo un’andatura più lenta e costante, ma con meno pause. El distaco dala bici xe sempre duro, sia sentimentalmente, perché te par quasi un continuo tradimento dela vostra missione comune, sia fisicamente, perché scender e salir dal selin no xe propriamente come alzarse e sentarse sul divano, nonostante el coprisela in gel del Lidl a 5,99 euri e i mudandoni col panolon da ciclista.
Restemo un poco impressionai dala grande quantità de eternit butà in giro de qua e de là.
L’arivo iera previsto a Planina. Ma semo più bravi de quel che pensemo, e proseguimo fin Logatec. Qua se bevemo la prima meritadissima Lasko.
Trovemo una Gostilna con camere, e Pasta fa el suo primo incontro col trash televisivo. Ghe piasi ssai i grupi musicali folcloristici locali. Fisarmoniche, mule in costume tipico che bala, scene de vita rurale con mati che canta su tratori o in betolini. Un frate ghe conta qualcossa sule erbe.
Nel mentre, compari la prima pomata miracolosa dale borse del dotor Erich: quela che ciameremo d’ora in poi “la pomata del vescovo”, per via del frate disegnà sula confezion (no xe el stesso dela television). Una roba potentissima che solo l’odor fa risuscitar i morti. Te se la meti sule gambe e le te se iaza de colpo. Xe quasi come farse una flebo con le caramele Fisherman’s friend.
Incontremo due ciclisti de Gorizia, rivai in giornata, che domani però tornerà casa.
Bagolemo tra le persone che esci dala messa, poi trovemo un solo posto verto dove magnar, e sul menu salta ai oci la gravissima assenza: no xe la lubianskona che spetavimo de tuto el giorno. Dramma. Solo pize e polastri. Delusi, optemo per le pize. Passa a saludarne Paolo Tanze, dei muloni Vile&Vampi, che stà qua in zona. El ne sugerissi de puntar Lubiana da sud, seguindo le ciclabili che xe favolose e imerse nela natura. El ne buta de bever. El ne ga convinto.
Se ga fato ssai tardi, gavemo le panze piene e femo fadiga a tegnir i oci verti, xe scuro, no xe più nessun in giro e anche el nostro local sta per serar. Vardemo l’orologio: 21.37. Ridemo. Manca poco che tornemo a dormir nela nostra Gostilna prima ancora che Cenerentola vadi al balo del principe. Ma queste no xe le 21.37 de Trieste, xe le 21.37 de cinque de lori ormai imersi in una realtà distante ani luce da casa, nela quale anche l’orario perdi el suo significato abituale.
Statistiche indegne: Km 56.89
Vel Media 15.0 km/h
Tempo pedalata 3 h 47 min
Mappa e altimetria by Eric Medvet:
Grandissimi! Ora urge una conferenza congiunta sull’uso della birra come propellente sportivo. Nella mia rumizada a piedi è stata salvifica, nonché sostitutiva del pranzo (e per uno che ha fatto voto di vastità come me è clamoroso). Però riconosco la carogna proprietà tagliagambe come possibile effetto collaterale. Una delle cose più belle? Il sonno dei giusti che piomba le palpebre in orari in cui altri sono ancora nella coda lunga dell’aperitivo.
ala fine dela narazion dela puntata xè una fassa grigia cola scrita “nessun comento”.
bon xè questo el mio commento … come dir son a boca verta che scolto questa storia bellissima e ‘ndè vanti a contar!
Mi continuo a rimandar, le mie rumizade (fato solo un belgio/olanda in solitaria, ma là xe piato e no conta): tocherà rimediar.
(grazie per gaverme fato tornar voia! 😀 )
arlon, ala prossima te son dei nostri alora.
me incanto a legger 😀
ma logatec xe un paese o un marchio de informatica?
anche al sottoscritto avete fatto tornare la voglia di “indianate”.
tifo per voi e…che possiate trovare la meritata lubianskona sul vostro cammino!!!
Mi in bici andavo su e zò x el Carso km e km al giorno de muleta.fin budapest no rivo perchè me faria tropo mal el popi ma a pie andassi (quasi)ovunque.
Aldilà dele mie divagazioni rendi,figo figo
sempre con la Graziella arrugginita di tua sorella, Katerjna?
niente Perccedol lo scorso w.e……spero per il prossimo.ps lo stagno di banne è lo stari kal…mi pare.
che faccia che ga manna davanti a tute quele bire. sembra dir:
“no xe che me toca pagar mi tuta sta roba?”
che bici gave? quanto me verebe costar una così? (solo per titolo informativo dato che sto comprando una pensavo de comprar una più resistente, chissa forse una volta andrò anche mì cusì
Lasko come scelta ideologica collettiva in alternativa alla Union?
O la scelta era tra Lasko e Lasko?
aldo
Lasko = verde
Union = rosso
Dice niente?
Lasko: scelta…”semaforica” come, Srečko?! 😉
Sì Quel prima Graziella poi Bottecchia oro metalizzato quelle che si piegavano in due e le mettevi in bagagliaio. Vero Stari kal!me n’ero dimenticata.
Mi voto Lasko xe piu bone
Complimenti, avete tirato su una vera trasferta con i fiocchi, e la narrazione ė davvero memorabile! Buon proseguimento!
ciò diego, al massimo riverè a Trojane, ve disferè de Lasko e ve s’gionferè de krafen, starè un per de giorni a smaltir la piomba e tornerè a casa in treno.
Ve servi che ve passo a cior in stazion a Sezana?
ciò sai roba muloni
@10 massimop
gavemo mountain bike amortizade davanti (aparte cionn che ga una bici no amortizada e col cambio nel mozzo).
Visto che iera de far ssai strada e no tanto offroad, gavemo messo i copertoni da strada.
Le costa sui 300-400 euri, 4 anni fa, ma imagino anca adesso.
@16 sfsn:
anche noi pensavimo, ma ala fine semo rivai, el diario xe postumo 😉
ah, tra Lasko e Union vinzi Lasko 😉
Ma Lasko rider xè più che… isi raiders? 😀
@ diego:
diario postumo? go dito mi che ve sé mazai de birete! Bon ve darò un ruk fin a sant’ana
figon!…vardavo l’altimetria de eric…ma a un certo punto sé cascadi in un buso?!?! 😀
Isi raiders? Noo! Tomos raiders! (uno e due)
Che eroi!
ciò Ufo, noi ghe demo de vitz , ma xè perché i muli ghe ga dà de gambe !
Clasici tifosi de…tastiera noi do” 😉
ve xe ndada ben che i ga cava le piastre de cemento con un scalin tra l’una e l’altra, e a logatec i ga asfalta. anni fa me son sbullonà la bici da strada.
@19
“tra Lasko e Union vinzi Lasko”
ciclisti Laski…mejo che loski!
I omini vivi de contrapposizioni. Quella tra Lasko e Union la me xe proprio incomprensibile.
Pare che in cèco Lásko sia amore.
Romanticismo mitteleuropeo.
http://youtu.be/aXXNiPxtg9g
No al una xe piu bona e una xe meno bona.no xe la stessa roba tipo tra roma e lazio:D
Lasko e Union …Katja stavo per scriver tipo Triestina e Udinese 🙁 e sarìa stà l’autogol più clamoroso dela storia dela nostra riffa coi lanfur… meio cambiar paragon. tanto,…
E io tifo Cocalight , Tiè! 😀
Lasko sta a Union come miss Topolini a Miss Trieste…rremenghis la xè Goriziana!…NOSEPOL!
Grande Diego per un’altra bellissima pagina !
@10 te pol veder una simpatica descrizion delle bici, tranne quella di Capitan Medvet che ghe la ga ciulada a Vienna, sula pagina della rumizada Trieste Berlino
http://mappets.it/?cosa=alt&id=13
Sul costo no me ricordo perché la ga’ sai anni, pero’ la question del cambio nel mozzo (che xe’ bel perché cambia anche de fermo e sotto sforzo, ma se te vol più de 7-8 rapporti te devi prender uno tedesco che se ciama Rohloff che costa solo lui come tutte le nostre bici) dovessi raddoppiar almeno la cifra che ga dito Diego.
@11 Lasko perché mi pedalo col Casko, Union solo se rompo el cercion 🙂 !!
“Bevo Pivo fin che rivo, bevo Lasko fin che casco”
🙂
Se sti qua i se senti anni luce a Logatec….KOSSA i va a far in giro per il mondo? Che i resti a casa!
Ciò, stago diventando un personagio leterario!
Bikers del Tea Party:
http://www.youtube.com/watch?v=EF3iLNgHWWA
Bikers del Lasko Party:
vedi foto sopra
@37
Bikers del Tea Party…LINK CORRETTO:
http://www.youtube.com/watch?v=EF3iLNgHWAA
BELA DIEGO….anche noi del Vulkan gavemo fatto tante de ste bele storie..tipo Trieste-Praga e tante altre…e vara caso usavimo el stesso petrolio per andar avanti (Lasko)…ahahah!
saluti da Alce
cossa xe Vulkan?
@36
“Ciò, stago diventando un personagio leterario”
LASKO RAIDER!
Giorgia e Elda de Gorisia nela Rumesiade da Maribor a Budapest.
Ma se rivadi a Budapest? O se gave fermà a Zagorie? Noi semo rivade. El dio dei ciclisti ne ga meso alla prova, con el pegio che ne podeva tocar: sbusà la goma, quela dedrio. Ke x due mule (se fa per dir, me riferiso ai ani ’70 o zo de lì) ze al pegio drama. Se po la camera d’aria de riserva ze anke sbusada e la riserva dela riserva ga la valvola curta (me la ga venduda al giorno prima al mecanico furlan de ex fiducia pena finì de meterme al portapachi), meio tornar a casa. Inveze gavemo imbiecà e meso dacordo cadena e cambio. Pecà che dopo 5Km al biec no ga tignù! I podeva dirne che toca spetar 5 minuti che se sughe el mastice no? Bon in un modo o l’altro confidando nella pietà umana, gavemo risolto. Note pasada a Maribor in ostel dopo contratasion ( da 120 eu. a 74 eu in due, de più no se pol). Colasion della ciclista: doppio cafè, triplo suco de arancia, rassegna meticolosa de tuta la pasticeria, esagerazione glicemica di marmellatine, assunzione smodata di proteine tipo yougurt, musli ed incetta furtiva della banana e panin per la merenda. Ogi ne dopo toca recuperar i Km non fati. Partimo con el moto “andemo fin dove rivemo”. Per farla curta Alle 8 e meza de sera, magnade dai musati, con tute le luci impisade, ierisi ferme a decifrar su una rotonda i contraditori segnai magiari. La Giorgia ga fermà un auto, cartina ala man, ghe domando al omo dove semo. No saveva gnanche lui, ma potensa dei mezi, gaveva al GPS. Cussì semo rivade in un vilagio nei presi del Balaton. No una soba, no una panzion. Ghe domando ad una siora ferma in auto dove podemo ‘ndar. La se ofri de portarne a casa sua (el tuto parlà in tedesco de sopravivensa). “Mi a casa dei singari no vado”- Giorgia “Alora dove te vol andar? Hotel 4 stele? O soto le stele e basta? – Mi. La convinso, inseguimo l’auto e…. rivemo in una linda casetta de Biancaneve. No ze singari, no ze gente sospeta, no ze nisun.La siora, che dev’eser studiada, ne mostra le camere: nete, tuto novo. Deciso: dormimo là. I morsi dela fame se fa sintir . ..el panin lo gavemo brusà sulle salite dell’Ungheria (Chi ga dito che la tuta piata come una brega?) La va a casa sua e la ne porta quel che la gaveva in frigo: risi, salame, ungherese per forsa, pan, formai e un litro de vin. Gavemo spazzolà tuto, brindà, scolà el litro de vin. Bon … finiso qua che semo andade a dormir con le bici in cusina e con 163 km sul ……. Bona note. Doman se riparte….
grande elda! semo rivai ala fine si 🙂
ma voi quando ieri? contine! magari se semo incrociai!
se ve incontrava sicuramente i ve riconoseva con quela panocia in campor rosso tacada sula bici