I 150 anni dell’Unità d’Italia a Trieste: cossa dirà la gente?

I festeggiamenti per i 150 anni dell’unità d’Italia si avvicinano, tra vari preparativi e polemiche. E la gente cossa disi? O i disi ste robe solo che per insempiar la gente?
Ecco il contributo speditoci dal nostro giorgio (no events):

– Alora ‘sto 150 cossa vien a esser? Sul momento pensavo che fussi el 150° dela morte de Karl von Ghega, l’ingegner che gà fato la “meridionale”, che el viadoto xe ancora là, in pìe a Nabresina, ma con l’Italia no ghe entra più de tanto. Podessi esser el posto che gà l’italia tra i grandi, che una volta ierimo nel G8 e desso nei G150? O xe la nova età per andar in pension?
– Ma che mai pension! Che noi gavèmo, massima parte, alberghi. Xe, che màrtedi 26 otobre se gà celebrà el 56° aniversario del ritorno de Trieste a l’Italia e casca, varda caso, poco prima dei zentozinquanta ani de l’unità d’Italia…
– Ma se xe zentozinquanta ani che l’Italia xe unìda e unica e solo zinquantasìe che la xe rivada a Trieste, vol dir che sèmo soto ocupazion, come in Palestina?
– A dir el vero, anche mi gò osservà, se vedi che i gà sbalià i conti. Che sicome che al ministero de la difesa iera tuto un preparativo, i se gà insempià, difatti, La Russa, gà dito che ghe farìa piazer far ‘ste feste a Trieste, che xe la più italiana dele cità italiane, un rider che no ghe digo…
– Se vedi che no la xe mai stàda a Bolunz o a Servola, ma chi vien a esser ‘sta Russa, xe la baba de Putin?
– La Russa no xe una baba, come la sorda, la bersagliera o la zòta. La Russa ve xe el ministro de la difesa e xe un omo cola barbeta e i mustaci. Lù, e i sui, gà sta fissa de l’aniversario, i farà festa grande in piazza grande che pò del 1861 ghe mancava ancora Udine, Venezia e Roma…
– A mi me mancava Boninsegna, cossa no gò penà per quèla figurina! Per far scambio con Berto, me gà tocà darghe Furino, el scudeto del Lanerossivicenza e Haller. Forsi, i podèva far scambio, dandoghe una dopia per Udine, o no i gavèva dopie?
– Cossa la vol che sapio mi, se i gavèva o no dopie o triple, mi volèvo dirghe che, me par, i se gà pensà ‘sta storia che i xe nati nel 1861, perchè ormai, con ‘sto Bossi al governo i gà paura de no rivar a far nissun compleano. Secession i la ciama…La se pensi che, oltre a l’ino de Mameli, stavolta i sòna anche “Va pensiero” per far star boni quei dela Lega. Anche Fontanini gà dito che iera ora, che no se ghe ne podèva piu de l’elmo de Sipio…
– Ah! “Va pensiero” xe una canzon furlana? E alora noi canteremo “Magari a caval de un bacolo” o xe meio “Se le babe no vol che cantèmo”?
– Per l’amor de Dio! Che se se metèmo a cantar noi, in dialeto, riva el sindaco coi tubi e i ne porta via..
– No gò capì, sti qua vien in piazza grande, i ne dixi che i xe unidi e unichi de zentozinquanta ani, i sòna quel che i vol, anche in furlàn, e se noi cantèmo qualcossa i tubi ne porta via? Ma no xe meio che i resti a casa sua?

Hai scritto qualcosa (o fatto foto, o video, o pupoli…) di divertente/ironico/satirico su Trieste, Gorizia e dintorni? Mandacelo al Quel dela Quela! Scrivi a manna@bora.la