La risposta del centrosinistra ai mille candidati sindaco del centrodestra: la temibile Lista Gialla

Pubblichiamo con molto piacere il contributo speditoci da giorgio (no events). Grazie!

LA LISTA GIALLA
di giorgio (no events)

Ultime battute nella definizione dei candidati a sindaco di Trieste.

– Ben, ma quanti vien a esser i can-di-dati del zentrodestra? Mi capisso che xe una carica ambìda, ma sarà più capi-lista che eletori….
– I la gà pensada per far come dele primarie senza spender. La se pensi cossa ghe sarìa costà far come quei altri: stampar le schede, trovar i scatoloni per le urne, meter le tende o “gabibi” che i li ciama desso, ciamar i scrutatori: mi calcolo che minimo ghe sarìa andà un quatro-zinque mila. E lori no xe miga come quei altri, pieni de soldi, che magna tuto el giorno salmon, caviale e salame ungherese col pulover de cashmir anche al primo de magio.
– Ma de là xe restà solo Cosolini, ormai.
– Questo no xe dito, ancora. Quando Zvech gà sentì che a Piran, i gà fato sindaco un nero, el gà pensà “E se provassimo anche noi?”
– Ma come? Va ben che Menia, se gà fato: MSI, AN, PDL, FLI, ma me par no xe mai passà con l’altra parte.
– Ma no nero de politica! Nero propio de pele, come Obama. Solo che quando i xe andai in giro per Trieste, in zerca de ‘sto nero de pele, per farlo corer a sindaco, i gà dovesto cambiar idea.
– E no se trova più neri a Trieste, nel ‘54 ancora, ancora, ma desso…
– No xe che no se trova. A S. Giacomo, drìo piaza Puecher o in via Setefontane xe pien de neri, oddìo no i stà fermi in strada come i serbi, el nero ve lavora in centro, piaza dela borsa e via dele tori, ma ala sera i torna a dormir a casa con ‘ste borse piene de strafanici che nissun ghe compra. Solo che ‘sti muli, che massima parte xe ingegneri nucleari o dotòri, cò i gà savesto che iera de far el sindaco de Trieste i se tirava indrìo. Che anzi, più de qulchedun, iera come ofèso e ghe dixeva che lori iera vignudi in italia per trovar un lavor onesto, i iera si, poveri, ma no fino a quel punto.
– Eh xe duro far el sindaco e xe paga comunal, difati i ultimi due, Ily e Dipiaza, gavèva zà un lavor de suo, se no i sarìa morti de fame…
– Indiferente, mi ghe contavo de ‘sta “cacia alo straniero” che se gavèva messo a far Zvech, Russo e Godina. E de le telefonade che matina e sera ghe fazéva Fedriga che voleva andar con lori. Fin che un giorno, passando per via Roma, un dixi: “E se ciolessimo un zalo?”
– Xe bel, cò se gà tempo, lèger un zalo, un de Heinichen per esempio…
– Ma no zalo-romanzo, zalo come un chinese, un giaponese o un niponico che i ghe dixeva una volta. Insoma un zalo propio de pele. Ben che mai: che desso xe facile trovar, lori i xe de boca bona e pò, propio ogi sul giornal xe scrito che xe più chinesi che triestini, ormai. “Due candidati a sindaco per il centrosinistra” gà dito el gazetino.
– Ma cossa ocorèva, ai eletori ghe farà solo che casin, tuti ‘sti colori. Xe come tornar indrìo de zinquanta ani, anche se iera le schede in bianco e nero, iera venti partiti con venti can-di-dati…
– Altro che ocoreva, de quando no ve xe più le ideologie, sèmo in seconda republica, xe magioritario e bipolarismo. Desso gavèmo solo due o tre poli, ma sempre quatrozento de lori che zerca lavor. Quando xe vignù Bersani per controlar le liste…
– Anche Bersani xe vignù a Trieste? No gavèvo inteso.
– No i gà fato tanto cine, ma quando el gà savù che Silvio gà tirà fora i euri per salvar i uxeleti de Miramar el ghe gà dito a Dalema che anche lori doveva far qualcossa per una qualche bestia in dificoltà a Trieste, el xe vignù, in scondon, a veder come che xe. El se gà convinto che no iera più bestie in pericolo, solo dopo che el gà visto un corteo de pantigane in Via Ghega e i cinghiai che pascolava in giardin publico. Quando, al Tommaseo, el se gà fato mostrar le liste dei candidati a sindaco e el gà visto che, per el zentro-destra, iera una specie de squadra de balon: Antonione uficial, Bandelli con un’altra, Menia coi filini, Dipiaza per conto suo, un dela lega no mancherà mai, el ghe gà dito de far più liste de candidati possibili.
Come el giorno dopo, de dopopranzo, el stato magiore del pidì se gà fato un giro per el borgo teresiano e gà ingrumà nove de lori per far ‘sta benedeta lista de apogio de soli zali: oto omini e tre done massagiatrici. “Per essere a posto con le quote rosa” gà dito Godina.