Piazza della Borsa, un cantiere da non perdere assolutamente

Torna el cantier de Ucio e Pino, anzi, più che tornar, se sposta. I due cocoli siori ogi ga volù cambiar, e i se ga trovà in Piaza dela Borsa. Là i ga trovà ‘ssai compagnia, come podè veder dala foto. El cantier però ormai xe agli sgoccioli. Dove anderà tuti i umarells adesso?

Grandissima foto di Cayo Effe del Forum Trieste

EL CANTIER DE UCIO E PINO
El cambiamento e “la classica” (ovvero la posizion con le man drio la schena)

– Ciò Ucio, te go dito mi che gavemo fato ben a vignir fin qua. Ara che bela grua che xe qua.
– Si si Pino, te ga ragion. I disi che noi veci no ne piasi cambiar, ma ogni tanto fa ben, xe de far. Te iuta tignir la mente ativa, go sentì che i diseva ieri par television.
– Ah anca ti te ga visto quela trasmission là…su che canal iera speta, sul primo me par po’.
– Si si quela, subito dopo del reclam dela sip, prima che i daghi i risultati dela sisal. Insoma dele some i ga dito che el cambiamento fa ben, che fa morbin meo ancora che el vin.
– Si si Ucio. E sa cossa te digo? Mi ogi go cambià un futio de robe, per scuminziar.
– Ah si? E cossa te ga cambià?
– Prima de tuto go ciapà la coriera dopo. Quela dele 7.52, de solito invece ciapavo quela dele 7.47. Ciò, no te crederà, ma el stesso giorno ga cambià coriera anca tuti i fioi par ‘ndar a scola. Anca questa iera piena de muleria col rucsac che intrigava!
– Maledeta muleria, no i ga rispeto. Però per cambiar no te ghe ga zigà no? Se no vien subito meno i propositi. Te son stà zito?
– No, per stavolta go cambià solo modo de mandarli a remengo.
– Bon me par za ben dei. Poi cossa altro te ga cambià?
– E poi e poi e poi…la roba più importante. Te vedi, de solito sul tramvai mi me sento sempre vizin el frenador, cussì posso darghe una man sugerindoghe come mandar a remengo i auti, che xe certi, te sa, che guida che dio me perdoni.
– E te sa si, sopratuto i giovani, no i scolta. E no i se meti gnanca la bereta in auto.
– Si, bon, stavolta però sula coriera iera ‘ssai posti liberi, perché la mularia ghe piasi star in pie a darse tiri coi rucsac. E bon insoma inveze de andar là del mio posto a chiederghe al putel che iera sentà de lassarme sentar a mi, me son sentà su un’altra carega.
– Orca ciò. No te farà mal tuti sti cambiamenti?
– Te dirò de più! Me son sentà su una carega messa con la schena al frenador!
– Ciò, ben che mai! E te son anca smontà per l’entrata?
– No no quel no go fato, quel fa la muleria che no ga creanza.
– Eh coss’te vol far, i ga tuto. Bon ma vardemo vanti sta grua, ara che bela!
– Ssai la me piasi, con sta trivela, ara che forza, un spetacolo. Meo del cinematografo! Ara quanti semo a vardarla ciò!
– Bel bel, ssai bel…vegniremo sempre qua da ogi. O te disi che doveremo cambiar?
– Si si te ga ragion, xe bel qua. Po’ xe pien de compagnia, me piasi….ssai me piasi…sa cossa te digo? no stemo cambiar dei, vegnimo sempre qua! Cossa mai cambiar, remengo quel che disi el canale 1!
– Ah ah remengo si, te ga ragion. Sa cossa? Femo cussì, eco, per dir che go cambià ogi tegno le man in scarsela e no drio la schena come i altri. Oh là!