Tuffi e bombe ai Topolini: se pol o no se pol?

Foto di Roby Blasina (www.bybla.com)

La notizia della nascita del comitato anti-tuffi ai Topolini, che vorrebbe la creazione di due zone distinte, una per i clanfadori e una per chi vuole stare in pace, non poteva non scatenare il commento dei nostri cari veci de cantier Ucio e Pino.
Eccoli qua, davanti al loro amato cantier, dopo un giorno de piova che ga riempì de acqua un dei busi del cantier…e i operai, invece de lavorar, fa clanfe…

EL CANTIER DE UCIO E PINO
Maledeta muleria

-Ara ara ma cossa el fa??? OU!!!!
-Ma remengo suo!!! El ne ga schizà tuti ciò! Ara che robe…no se pol dei…semo completamente lavai
-Remengo de muleria, invece de lavorar i fa clanfe int’el buso pien de acqua. Ma che cantier xe questo??
-Ma mi no so, ara, no se pol gnanca più star qua a vardar cossa che i fa. Niente no i fa po’. Co ierimo giovani noi i cantieri lavorava ‘ssai meo, no i gavessi lassà far clanfe.
-Te ga ragion, sa cossa te digo? Femo una racolta firme per far tornar i cantieri de una volta, quei che se pol vardarli, comentar, mandarli in remengo senza paura de esser schizai.
-Si si, come quei che i vol far ai topolini, te ga sentì? I racogli le firme perchè no i vol che la muleria se tufi. E i fa solo che ben! Cossa mai che no posso meter el sugaman rente el mar!
-Te sa si! Dove xe che vado firmar subito?? Giusto l’altro ieri iero tranquilo là del’otavo che me bevevo un otavo e un mulo ga fato un tufo po’, che me xe rivada l’acqua dentro el bicer…spritz de acqua de mar ciò…no se pol. Sta muleria ga passà el limite dei!
-Si si, basta con sti tufi dei…e sa cossa te digo? Basta anca con sti zighi, i xe sempre che i ziga, cossa i ga de zigar po’? racogliemo firme: no se pol zigar.
-Giusto! E sa cossa xe fastidioso anca? Che i vegni al bagno co’la coriera portandose tuti sti sugamani e ste zavate e sti aparechi che i se porta dentro i zaini. E dopo li tien in spala e i ne dà sempre tiri. Basta dei co’sti zaini, tuti uguali tra l’altro, che i li tegni per tera, remengo! Firmemo: basta zaini in spala, tuti per tera!
-Te ga ragion, ma mi me dà fastidio anca per tera, te se ribalti, no te li vedi, xe ulmo…basta zaini e po’ bon, cossa po’. Che i vadi al bagno diretamente coi slipini, o che i vadi in acqua in mudande, remengo!
-Si, firmemo anca per questo! Ma bon za che gavemo la pena per firmar in man, sa cossa me dà fastidio anca?
-No dime
-Che co vado suso in osmiza ghe sia sta muleria balorda che tra un bicer e l’altro tira fora le chitare e le fisarmoniche e i canta finanziere, la cavala zelante, el torero manolito…e i ziga, anca là, i ziga! E mi che voio solo beverme un otavo in pase. Basta, via le chitare dale osmize, no se pol!
-Giusto! Via anca la cavala zelante dei! La se strassina col cul i disi! No xe bel, xe volgare, via!
-Te sa si. Xe che el problema xe sta muleria che gira ah po’, che canta, che ziga, che schiza. Cossa i ga mai de far tanto casin? No i ga un poco de quel che se ciama, se vedi che i ga tuto po’ e i li lassa far tuto. Noi no ne lassava. Mi digo che i dovessi star sempre scola. Ma senza andar a scola col’autobus, che dopo i ga sempre sti zaini pieni che no i ga un poca de creanza per tegnirli come dio comanda. No. A scola a pie che i vadi, firmemo anca per questo.
-Si ma no pei marciapie, quei ne servi a noi, dopo i ne sburta, i cori, i ziga…
-Bon sa cossa? Che i staghi sempre scola po’, cussì forsi i imparerà qualcossa!
-Te ga ragion, ecolo! Fioi che staghi scola po’, a imparar la creanza!
-Ocio, ara ara cossa fa sto altro mona!!! Remengo suo!!!!
-de novo ne ga schizà ciò…andemo firmar dei, alo.

P.S. tuto sto ambaradan dei schizi, dei cartei finti, del comitato anti-tuffi, ecc, xe partì dala publicazion de questa legenda metropolitana sul Quel dela Quela. Che robe!

P.P.S. Il 31 luglio ci sarà la terza olimpiade delle clanfe. Suoneranno Il Guf e Maxino!!! Imperdibile. Chi volesse iscriversi trova tutto sul sito dell’Associazione SPIZ.