Trieste “spiata” da 65 telecamere. Ucio: “speremo che i mandi la direta dele gare dal Molo Audace”

Oggi altra puntata della rubrica periodica a spizzico magnifico “el cantier de Ucio e Pino”, dedicata alle nuove 65 telecamere che presto sorveglieranno diverse zone di Trieste. Spiamo dunque il dialogo intercettato dei nostri cari veci de cantier Ucio e Pino.

EL CANTIER IN 65 POLISI

-Ciò Ucio, te ga sentido l’ultima che i vol far?
-Farghe cantar l’ino de Mameli ai fioi a scola?
-No, a parte quel
-Cossa ‘lora?
-I ga dito che i meterà 65 cineprese in giro per la zità
-Remengo! e par cossa? I vol fotografar le bele putele che camina?
-No go capì ben, par che i devi sorvegliar qualcossa..
-Ah, speremo alora che i ciapi anca el Molo Audace, cussì finalmente gaveremo le registrazioni dele gare de chi che pissa più lontan e nissun poderà più futizar. Me vien ancora in amente quela volta che ierimo putei e che ancora se ciamava Molo San Carlo e che te me gavevi insempià con cussì tante monade che gavevo dovesto dartela vinta, anca se gavevo pissà mi più lontan
-Che monade ara, cossa te vol anca la moviola come che i ga a balon?
-Si, e anca el telebin, come che iera pei mondiali de italia ’90
-Quei che zogava Toni Polster nela Defonta?
-Si ma miga iera la squadra dela Defonta quela, me par che te cominci andar in dolze anca ti!
-Ma Toni Polster xe nato a Viena, el saria stado centrataco dela Defonta, te ga poco cossa contrastar. Pitosto, scolta inveze cossa go pensado sta volta..
-Che sentimo..
-Apena go savesto sta roba dele 65 cineprese, son subito corso de Mediolor a comprar un de quei televisori grandi, che par el cinematografo. Un 65 polisi go comprado.
-Ma alora te son per bon andà in dolze! Gnanca, in asedo diria! Coss’te servi un televisor cussì grando?
-Xe el progresso Ucio, el progresso! Desso noi semo qua ogni giorno a vardar sta mularia qua che lavora in cantier, che tra l’altro no ga un poco de quel che se ciama, se vedi che no i ghe ga imparà ben el mestier. E co’ che xe zima batemo broche, co’ che xe piova ne vien i reumatismi, co’ che xe bora ne ciapa el scric in schena per via che xe giro de aria, e po’ sta mularia senza creanza gnanca no i ne scolta quel che ghe disemo, anzi me par che le nostre osservazioni sul come andassi fate le robe come che dio comanda ghe dà squasi squasi fastidio.
-E quindi?
-Ancora no te ga capì? E quindi desso che i meti le cineprese se vardaremo el cantier suso a casa mia, al caldo, col 65 polisi!
-Ah ah bela Pino. Ma no bastava un televisor anca un bic più picio?
-No sta dir monade, per 65 cineprese un 65 polisi me par el minimo!
-Bon, ma ti te ga certeza che vedaremo anca el nostro cantier?
-Ma si Ucio, no te vedi che i ga anca piturà la grua de viola per farla più teleigienica?
-Aaah, xe per quel te disi? Mi giusto volevo dirte che sta grua propio la me par una ciolta pa’l daur, ai nostri tempi no i gavessi lassado piturar le grue de viola.
-Xe el progresso Ucio, coss’te vol farghe…
-Bon, ma te ga comprado anca un bel canapè? Ti no te ga in casa el canapè…
-No esisti, no se pol, no ga scopo. Le robe o se le fa ben, o no se le fa. Se dovemo vardar el cantier, soto la piova o in casa al caldo, lo femo come che dio comanda. Quindi in pie, e con le man drio la schena.
-Te ga ragion Pino, ben dito…ara ara cossa che fa quel mona desso! OOU! DEL’ALTRA PARTE QUELA GRUA!!!
-Ah, no i scolta Ucio, no i ga mestier e no i scolta niente…