Dopo averci svelato i misteri della vera storia dell’Omo Vespa, Renè oggi rilegge e pupola una delle leggende cittadine triestine dei primi dell’800, quella della fantomatica Dama Bianca de Citavecia…
LA DAMA BIANCA DI CITTAVECCHIA
Se narava molto tempo fa de un fantasma de una mula dala beleza sconvolgente, coverta de un lungo velo bianco. Sta mula usava aparir con un sguardo più morto che vivo (e te credo!) nel bel mezo dela cità..talvolta anca in piaza granda, per poi incaminarse sempre longo la riva de zitavecia, fin suso a San Giusto indove che la scompariva in tel logo a ela più usual, overo el vecio zimitero che iera là vizin. El tuto iera acadudo nel lontan ano de grazia (e anca de Grazino, Graziela e Graziano) 1833 e in qualche antico tomo de storia triestina se pol trovar ancora qualcossa a proposito de sta legenda.
Sta mula la iera alta e imponente, dal far aristocratico. Vestida sempre de bianco.. la mula bianca per l’apunto (se no la se gavessi ciamado la mula nera e la gavessi fato la reclame dele Morositas, sculetando a tempo de musica!!). Tuti i gaveva paura de ela anca se no i podeva far a men de restar meravigliai dala sua beleza..ed esendo ela un fantasma, difati la iera bela de morir!! Nisun gaveva el coragio de fermarla, nianca per chiederghe se la gavessi un cichin o comunque la cartina Modiano per farse un spagnoleto.
Un giorno sta storia fu udida de un celebre (in alora) cantante d’opera del Teatro Verdi, un zerto Cesare Lopersi. Cesare iera alto, moro, coi oci azuri, de bon portamento e pare a volte anca bona forcheta. El mato el se gaveva meso in testa l’osession de becar la mula e magari fermarla e magari chiederghe de far un dueto asieme a lui, sule note de “Finanziere” de Pilat, davanti un bon bicer al’osteria de Libero Laganis (che tra l’altro la xè vizin a S. Giusto indove che la mula la ‘ndava a riposar sototera asieme al radicio e ai sui vermi adomesticai)..
‘Na note de inizio novembre, dopo che el gaveva zenado magnando de tuto (anche un bel capron abruzese ala griglia, con contorno de cavial e fileti de coscia de Paolo Pichierri.. i cantanti de opera i xè sempre stai bone forchete) e dopo gaver fato pissin e saludado i amici, se gaveva involtizado nel suo grosso mantel indove el tigniva sconto un pugnal. Un kriss malese per la precision che ghe gaveva regalà tempo indrio un suo amico indian (un zerto Sandokan che un per de anni dopo el ga ispirado un libro, scrito de Emilio Salgari.). Così conzà el gaveva iniziado a girar per le vie de Trieste, de solo e de note come un povero mona.
Dopo gaver passado per varie vie e quartieri e el corpo de guardia de piaza grande, el se gaveva incaminado rente i scalini vizin al convento de San Ciprian e ala via del castel che la sali fin suso a S. Giusto! In lontananza in quel momento l’orologio dela tore del porto la gaveva batudo le ore (tute le ore de questa zità) ale undese e tre quarti esate!! La luna iluminava le strete e scure stradine de zitavecia, mal iluminade de pochi ferai. Cesare ogni tanto incrosava solo qualche imbriago de pasagio che lo vardava de storto, disendo fra de sé: “Ma chi xè sto mona che gira a sta ora per zitavecia? N’altro alcolizado come mi?”
Ogni tanto passava anca qualche guardia de patuglia che, vedendo el nostro Cesare, la diseva fra de sé: “Ara sto mona che camina da solo col fredo, per zitavecia a sta ora!!”..e po’ la continuava per el suo giro de ronda..
Finalmente vizin piaza Barbacan, più o men fra l’Arco de Riccardo e el negozio Nonsololibri de Darius Fontanaschulz (ex libraio de Colonia, emigrado in Triest vrbs fidelissima durante l’ocupazion napoleonica), Cesare el se gaveva trovado visavì con sta mula fantasma!! Alta, belisima, un model 103 con un cumulo de curve come al mondo no ghe xè, la tigniva in man un mazo de fiori (crisantemi apassidi per la precision). “Caz*o!!” esclamò Cesare.
E la mula fantasma subito ghe gaveva risposto co’ un timbro gutural e teribile che el sembrava un incroso tra la vose de Sandro Ciotti e quela de Paolo Conte apena sveio: “Mortal, no sta dir parolaze che chi disi parolaze mori!!”
“Se te lo disi ti te credo sula parola..” ghe gaveva ribatudo Cesare. Alora la mula la se gaveva voltà e la gaveva continuado drita a salir suso per via del castel. Cesare estasiado del suo belisimo sguardo che el gaveva intravisto soto el suo velo (che po’ no iera un velo.. ma un sudario!), ga iniziado a seguirla su per la riva, con la bora che sufiava pena pena, come un vecio asmatico in coma etilico ireversibile el sufia le candeline dela torta del suo centoventiseiesimo complean. Tuto in t’un trato a S. Giusto, nel piazal de fronte ala catedral, la mula ghe ga intimado a Cesare: “Mortal, vatene..perché te va in giro a sta ora de solo come un povero mona, seguindome?..Torna indrio al’osteria de Franzeless de dove te son vignudo, altrimenti doman i legerà el tuo nome sui necrologi del bugiardel!”. El baldo giovine Cesare (baldo giovine insoma.. el gaveva zà 56 anni) el iera restà aterido de sta minacia, proferida in maniera cussì minaciosa. Ma poi el ga continuado a seguirla fin apresso alcune mura dirocade, drio la cesa. Ma no el gaveva più trovado nula, solo una rosa bianca apasida e na spuza de cadavere con contorno de pantigane in salmì (anca la mula fantasma la iera na bona forcheta!!). Cesare ga spetà tuta la note, fin quando semi indormenzado el iera sta sveià de un scovazin comunal che ghe ga zigado incazado nero: “Va a casa a dormir stupido, coss’te se dismissi qua per tera in sto ludame, come un povero mona?”
La note seguente Cesare el iera ritornado imperterito in piaza Barbacan.. ale undese e tre quarti eco che la mula ghe xe aparsa de novo! Subito el nostro Cesare ga zercado de fermarla.. e la mula: “Ancora qua te son che te scassi los marronaros de Sevilla.. ? Ma va a dormir mona!!” Ma Cesare la gaveva ciolta per un brazo.. “Mortal, lassime el brazo e metite le mani in tel daur!!”
“No” disse Cesare..”dopo gaver visto el tuo bel volto de sfugida, go capì che te amo e te bramo.. ti cussì bela no te pol eser na defunta, anca se te ga una vose de defunta.. ma xè tante cussì per colpa dele ciche. El fumo fa mal e no xè una novità”
“Mortal, te son duro come un scalin.. va a smaltir la piomba al’osteria al’istrian de dove che te son vignudo, altrimenti te mazzo qui sul posto, te ga capì?”
“No” disse Cesare Ragazzi.. ehm voio dir Cesare Maldini, no..ehm come se ciamava? Ah sì, Cesare Lopersi. “No ghe credo ai fantasmi formagini.. voio veder per ben el tuo viso, anca perché de drio no go visto ben e te sa come che se disi; de drio liceo e davanti museo, e alora no volessi.. ”
“Mortal.. ” ghe gaveva intimà ancora na volta la mula bianca “te me son simpatico in fondo, anca se no te son altro che un povero mona e pure un po’ maniaco sessual e zonteria, a ragion, anca un fià necrofilo.. Bon, te acontenterò. Ma a tre sole condizioni.. ”
“Tuto quel che te vol belisima, cocolisima, simpaticissima, piena de vita.. ehm, cioè volevo dir pien de morte, però sempre vital” ghe gaveva risposto de rimando Cesare Cadeo.. ehm voio dir Cesare Lopersi.
Alora la mula disse: “Prima te me dirà el tuo nome, poi te me lasserà la man che te tien streta fazendome mal e de fato rompendome teribilmente i c*ioni, e infin te me prometerà, che pena te me gaverà visto in facia, te girerà la testa de quela parte, fin al momento che baterò una man sul’altra…”
“Bon.. alora mi me ciamo Cesare Lopersi e canto al Verdi che ancora no el se ciama cussì, ma sicome sto raconto i lo legerà su Internet nel 21° secolo, per comodità de lori lo ciamo zà Teatro Verdi!!”
“Ah..ti te son el famos tenor bonculovich Cesare L. ? Sa che fin desso te gavevo scambiado per Umberto Lupi?”
Subito dopo Cesare ghe gaveva lassà la man, ormai cricada, de sta povera mula bianca ed ela la se gaveva alzà el sudario, scoprindo un volto angelico e celestial. Cesare del stupor ghe ga zigado: “Caz*o!!!!!” E ela: “Ancora parolaze? Ma te son proprio malà in testa alora.. te ga el zervel lobotomizado oramai a furia de gorghegiar opare! Comunque doman te me rivedrà in piaza Barbacan, sul incrocio de via del Fontanon (via Felice Venezian per le mule e i i muli del 21° secolo).. desso lasime ‘ndar e varemengo ti e tu mar!”
La sera dopo Cesare el iera ritornà, spetando a lungo soto la seranda sbassada de Nonsololibri, ma la mula no xe comparsa mai più. In compenso iera passada giusto un’ora più tardi una guardia civica che ghe gaveva dito: “Coss’ te fa a sta ora de note qui de solo, distirado per tera tra le scovaze come un mona? Va a dormir, tandul de mato..”
********************************************************
NOTA FINALE:
Che fine fecero poi i suddetti personaggi?
Cesare per onorare il suo cognome, rimosse con un’apposita operazione chirurgica ad hoc l’apparato sottostante e divenne così un celebre soprano, modello Farinelli.
La così detta “mula bianca” si dice che aleggi ancora oggi nelle notti di luna piena, lungo la via del castello che da S.Giusto si dipana nell’intricato ed alquanto vetusto tessuto di Cittavecchia.
Se doveste aver la fortuna d’incontrarla durante una di queste notti e di fermarla, ella vi risponderà dolcemente: “Ciò ma la gavè finida sì o no de romperme i bisi? Vara ti, iera meo che ‘ndavo in castel de Miramar a far el classico fantasma linziol che strassina cadene e ziga tuta la note come un mona “BUUUUUUUUUAAAUUUUUUUUUU!!”
Renè
Negli anni ’35 girava un analogo racconto a Fiume della Dama Bianca, velata, che andava di notte a spaventare le coppiette nel Parco, ma senza i dettagli del Cesare Lo Presti. E nel contempo sul giornale locale “Vedetta d’Italia” – come contorno di questa notizia – girava il racconto della scommessa del Legionario di D’Annunzio ai tempi dell’Impresa, che lui di notte sarebbe stato capace di andare al Cimitero e asportare una croce e poi rimetterla al suo posto. Lo fece e uscì all’ingresso dove altri Legionari lo attendevano per vedere la prova. Ritornato sulla tomba per rimettere al posto la croce, nel buio lui non si avvide che la stava interrando sul proprio mantello. Finito il lavoro, si alzò e fece per tornare ma il mantello lo trattenne e … perse la scommessa fulminato dalla paura.