Caro sior sindaco Dipiazza…ciù!

A distanza di qualche giorno ospitiamo ancora una volta un intervento di Xe meio un biciér de dalmato, che dopo aver elencato al sindaco Of Square il decalogo del perfetto sindaco di Trieste, stavolta va sul concreto e offre la soluzione finale alla questione rigassificatore e parco del mare. Un mito. (Dal blog del sindaco)

Alora Sindaco, go visto che de tuto quel che ghe gavevo dito mi de far ancora un ano e mezo fa, no la ga fato gnente. Ma la ga fato ben, la sa, la se imagini se la fazeva qualcossa, coss’che i gavessi rugnado! Che cossa, come che la se ga insognado de far ‘sto qua inveze de far prima quel. E se la fazeva prima quel, i gavessi dito che cossa no la vedi, iera furia de far prima ‘sto altro. Insoma, saria nati longhi bruti, e se ghe digo mi la me credi, ghe go mai contado monade mi????
Desso però go visto che xe altre questioni sul tapedo, come che i disi per television. Roba che perfina in coriera tuti i parla, i scassa la testa, qualchidun perfina la manda a remengo, la sa? Ma pochi, xe sempre quei che no ghe va ben gnente, no la stia bazilar drio de lori.
Bon, insoma, anca stavolta ghe digo mi cossa che la ga de far per ste questioni ssai rilevanti, anca se po’ no la me scolta, eh ma la vedarà ben che co la sarà vecio la me darà ragion, e mi ridarò! E come che ridarò, la vederà ben. Bon, no la stia cambiar discorso, la staghi bon e la cioghi nota dele questioni.

1. El Parco del Mar. Xe sto Paoleti che nol sa più cossa far, nol ghe fa passiòn povero omo??? El xe ndado a zercar pila par tuto, in Comùn, in Regiòn, in Fondaziòn. Tuti ghe ga dito: orca che bela idea! Osteria, che ben ara! Ulo ciò! Femo sicuro! Tropa roba Toni, ben che mai!
Ben, ma co se ga tratado de cazzar fora la pila, tuti che se vardava la punta dele scarpe: desso no go…forsi sto altro ano…go ma go pochi…speta che vardo meio el pupolo…te ciamo mi doman…orca ciò, se te me disevi ieri gavevo ma desso no go più…e cussì vanti.
Insoma, la gente vol, ma la pila no xe e xe tuto blocado.

2. El Rigassifigadòr. Qua inveze la pila xe, ma pareria che la gente no vol. Siora Ines, che la va ogni venerdi de Grassili a cior pesse e perciò de pessi la se intendi, disi che moriria tuti i sardoni. Bon, magari no tuti, bona parte, ma quei che restassi voleria dir che i xe ssai sgai e sicome i xe sgai no i se faria ciapàr, e alora sempre quel saria: gnente più sardoni.
Dopo xe anca la question che sta roba pol s’ciopàr. Bon, i ga dito che i meterà là rente el cartel “E’ vietato di fumare”, perciò che no’l s’ciopi. Ma sior Ucio se ricorda che su pare, che’l iera pompièr soto la Defonta, una volta el ghe ga contado che xe s’ciopade le bombole de gas int’un magazìn del porto, e anca là iera el cartél “E’ vietato di fumare” e che alora no se pol mai dir coss’che poderia nasser, cartél o no cartél.
Insoma, la pila xe, ma la gente no vol e xe tuto blocado.

3. La Metropolitana legera. Che mi calcolo che legera no vol dir che ‘sta metropolitana xe boba e gnanca che xe nagana, ma che la xe propio legera, che insoma la pesa poco, magra, fina, no s’gionfa, come la ghe vol dir… legera po’! Bon, de sta metropolitana, che fa ssai figo dir perché sona ben: “me-tro-po-li-ta-na”, par de esser a Niuiòrk, nissun sa gnente. I xe là che i studia, i fa calcoli, e sicome no i ghe vien fora, desso i ghe ga zontado la parola “Città” davanti, ma i ghe ga cavado “legera”, cussì la xe diventada “Città metropolitana” senza legera, che la gente in coriera desso pensa che alora se no la xe legera vol dir che la xe pesante, e che più che la pesa sicuro più la costa e i scassa la testa, che cossa no saria meio doprar la pila per altro, cossa so mi, per un per de doce nove a Barcola, per un poche de careghe pel Pedocìn, per esempio.
Insoma, la pila no xe, la gente no sa se la vol, nissun capissi gnente e xe tuto blocado.

Eco alora, caro el mio Sindaco, eco qua la soluziòn. Che mi no capisso come che no la la gabi za pensada lei che la xe omo pratico, ciò mi ciò ti, omo de sostanza po’! Ben, no ga importanza, meno mal che son qua mi che ghe digo come che la ga de far.
Alora, la staghi ben ‘tento, se no la riva tignirse ben inamente, la ghe disi a Galeto che se cioghi nota.
Lei la ga de far cussì. Lei la va dei spagnoi, che ga la pila e vol far el rigassifigadòr. La ghe disi che bon, che va ben che i lo fazi, ma la ghe lo fa far sule Rive, tacà dela Pescheria, no a Zaule. A Zaule la ghe disi che xe ssai fora man, che no xe gnanca un’osteria là vizìn e che insoma che sule Rive xe meio. I mati, tuti contenti, sicuro i tira fora la pila e i fà. Dopo che i ga fato, ma prima che i tachi i tubi, la ghe disi ai spagnoi che però la se ga inacorto che la gente no vol el gas, chel s’ciopa e ne mori i sardoni, tuti meno che i sardoni sgai, ma quei sgai no se li riva ciapàr e alora xe come gnente. Che insoma xe ssai longhi, che gas sarà che noi no saremo, che viva l’A e po’ bon xe questo el moto triestin, che ndemo dei, coss’che te ga ciù, insoma la li inzingana come che la sa far lei.
Mi calcolo che sti spagnoi sarà fora de lori, i mati tirerà zò dii e madone, i volerà meterghe le man dosso, ma lei la devi star calmo, ssai calmo. Lei la speta che i svampissi, dopo la li ciapa de parte e la ghe conta che no xe un mal se no xe un ben, che xe più giorni che rigassifigadori e che la gente no vol el gas ma che ghe piasi el Parco del Mar, ma che no xe la pila per imbastirlo e che alora ghe xe vignuda la granda idea de far el Parco del Mar con la pila sua de lori. E alora dentro ‘sti grandi bomboloni del rigassifigadòr, inveze del gas la ghe fa meter acqua de mar e pessi, un mucio de pessi, tuto pien de pessi de tute le marche che nuda su e zo, con un do finestre de parte che la gente possi vardar dentro e dir “Orca ciò, ara che bei sti pessi del Parco del Mar, ara quanti pessi che xe!”
La ga capido come? Cussì mi calcolo che saria tuti contenti! Anca i spagnoi ala fine saria contenti, che i se faria mata pila coi soldi del bilieto che i ghe domanderia ala gente per lassarli vardar i pessi. E anca Paoleti, che cussì la smeteria di frizerghe a tuti con sto Parco del Mar, che la gente no pol più de lui, e el poderia far el Presidente del Rigassifigadòr del Mar.

Bon pulito, desso che gavemo sistemado do robe int’un colpo solo, lei sicuro la volerà saver cossa che la ga de far de ‘sta Città Metropolitana Leggera.
Ben, sicome nissun ga capido gnente de ‘sta roba, lei la lassi là come che xe, no cori che la disi gnente, la fazi capir che se fa ma no se fa, che xe de veder, che saria ben far ma anca no.
Se no, de cossa parlassi la gente in coriera e per cossa i scasseria la testa?

Cordialmente.