El canton dela monada

El quel dela quela svela l’importantissimo arcano sul’identità del quel e dela quela palesandose come “El canton dela monada”, rubrica circumcirca quotidiana che se ocuperà…de monade pò. Ogi, per far capir cossa se intendi per monada, lasseremo la parola al noto linguista G. Dialetich, vicepresidente del’Academia del Kruscovac, istituto transIsonzale per la salvaguardia e lo studio del dialeto triestin dal lontan 1899. Tanti sa za, ma per quei che no sa ancora, visto che el ghe tien ‘ssai che se sapi in giro, ricordemo che el ghe xe entrà su racomandazion spudorata in un periodo in cui, el se vanta, esisteva ancora la meritocrazia. In pratica el se considera un pioniere dela racomandazion e de ciò el xe molto orgoglione. Più de qualchidun comunque disi che sentirlo parlar lui de dialeto triestin fa più o meno el stesso efeto che ghe fa la diarea a un pipistrel tacado in grota a testa in zo.
Comunque, vista la sua importante carica, ghe lassemo el spazio e doman cominceremo con le monade.

Monàda; plur: Monàde; termine dialetale de origine ambigua. Per taluni deriva scurilmente da le pudenda feminili, per altri deriva da lo spagnuolo mona, abbrev. de maimón, nome de una specie de simia. Da codesta origine lo significato de “monàda” assumi acezion canzonatoria de una condota simile a la simia, et indi stupidina et insempiada. Ma per li ricercatori del’Academia de lo Kruscovac lo termine xe molto più complesso e deriva da la monàde de la filosofia greca, ne la quale se ricoreva a codesto termine per indicar lo prinzipio (arché) da cui deriva tuti li numeri, la molteplicità de entità monodimensionali e tridimensionali e li quatro elementi (Aria, Tera, Fogo e Acqua) costituenti lo mondo. Adiritura Dio, ne le letere de lo neoplatonico cristiano Sinexio di Cirene, el vegniva descrito come la “Monade dele Monadi”, indi provabilmente stemo ‘diritura parlando de robe più grandi de noi comuni mortali.
Analixi etimologica a cura de lo Chiar.mo Dott. Prof. Arch. Mastel. G. Dialetich. Academia de lo Kruscovac 2009.

Da questa aprofondita analisi del’esimio G. Dialetich risulta chiara l’importanza dela monada e la sua presenza e difusion in tute le quele del mondo. El quel dela quela tenterà de rachiuder circumcirca quotidianamente la potenza inaudita dela monada in questo fondamentale spazio ad essa dedicado. Ogni giorno ospiteremo una “monada d’autore” diferente. Per saver chi xe l’autor, basterà vardar el pupolo in home page, ognidun ga un diverso. Oviamente, se ve sentì un poco autori de monade che merita mandenele che ve le publichemo!