L’esodo prima de l’Esodo: storia (digitale) de quei de Ellis Island

Giusepe Gherdol iera nato el 1 gennaio 1900 e i ghe gaveva messo el nome drio l’Imperador.

Sua sorela zemela se ciamava Stefania, ma tuti i la ciamava Valeria, nissun ga mai capì perché, e dopo iera Maria e Giovanna, detta Nina, e quel sì, se capissi perchè.

El papà iera fachin in porto ma el beveva e la mama, povera, nonostante che la vignissi de una familia bona, benestante, la gaveva dovudo ‘ndar a far la lavandera e de inverno ghe tocava romper el jazo co’ la picoza per lavarghe i linzioi ai siori.

A 35 ani la iera za morta, e ‘sti fioi, povere creature, col pare imbriagon, iera restai in pratica soli.

Alora Giusepe, a 16 ani, gaveva deciso de imbarcarse per l’America.

Che po’ quela volta, quanti i iera che i partiva, de tutte le province de l’Impero: de la Slavonia e de la Galizia, del Quarnero e de l’Istria, e sì, un mucio anche de Trieste.

Che a ben veder insoma, qua noi gavemo gavù l’esodo ancora prima de l’Esodo, quel famoso, per intenderse, de le piere che parlava ‘talian e dei beni abandonai.

Che si, che l’Austria iera un paese ordinato, ma anche qua iera miseria e storie brute, e sempre l’omo ga volù migliorar la sua condizion e l’America, se sa, iera l’America.

“Magari col monopatino”, i cantava…

E insomma ‘sto zio Giusepe el se gaveva imbarcà come mozzo sul Marta Washington e el iera andado a Nuova York, e nisun, né Valeria, né Maria, né Nina, gaveva gavudo più notizie per ani e ani e tuti pensava che el fossi morto, povero.

E inveze nel ’63 no xè rivà una letera de l’America?!

E iera la moglie americana de Joe Gherdol che scriveva! Che lui stava ben, che i viveva a Baltimora, che no i gaveva fioi e che la scriveva ela perché lui no saveva più parlar ne scriver per ‘talian, per slavo o per dialeto.

E tutti contenti a dirse “gavemo el zio d’America!”.

Che inveze, povereto, no el gaveva un, ma insoma, a la fine, i iera contenti lo steso.

E un’altra storia saria quela de Maria Fittipaldi in Manfreda detta la Napoletana, cantante e balerina de avanspettacolo in Nueva York, e de suo marì zio Onorato, capo cogo di bordo del Vulcania.

De ‘ste storie e de tante altre, dei ‘sti nostri zii d’America, a volte ritrovadi a volte persi, se trova adesso tracia (a meno che no i fossi clandestini, come zia Stefania, anche ela imbarcada sul Vulcania, ma però abusiva), se trova traccia disevo, sul sito de Ellis Island, dove se pol zercar per cognome tra quelle migliaia che xè pasai per de là provenienti da tutte le parti del Vecio Continente.

E se pol stamparse, volendo anche el zertificato.

Come sto qua de la Maria Fittipaldi, la balerina, sbarcada el 23 maggio 1910, a 22 ani, in zerca de l’America.

(Per aver el certificato te basta registrarte, xe’ gratis, te pol anche veder el documento originale, i lo ga scannerizzà)