19 Febbraio 2007

Kraški pust 2007, versione maldobriata

(liberamente e chiaramente ispirato alla perizia dialettale e allo humor di Carpinteri e Faraguna, creatori delle Maldobrie, fonte sempiterna di deliziose letture e memorie dei tempi che furono)

Nella quale Bortolo, memore dei tempi in cui il generale inverno era ben piu’ minaccioso e la Bora spirava subdola sull’ex Impero della Defonta, narra a siora Nina delle gite a Opcina nel dopopranzo del Sabato di Carnevale, per rimirare i carri carsici e le belle mascherine che sfilano per le vie della capitale dell’Altipiano

– Orade, orade, ociade ociade, barboni, riboni boni, sardoni, sardele, sardunici, capelonghe, capesante, caperozoli. Ale, ale done, che el sol magna le ore, ale, ale, siora Nina, che el le magna anche per vu’…

– Ah sior Bortolo la ga proprio ragion la sa, el “tempo passa e mai piu’ ritornera’” cantava sempre mio cognado…quel che per Carneval el se vestiva sempre de baba e fazeva la vedova pianzota al Carneval de Servola, che adesso ‘sti muli zovini gnanche quasi no i lo fa piu’…
– Ehh cossa la vol siora Nina, i figli crescono e le mame imbiancano, ga dito quel!

– Xe’ vero, anche mi la vardi, iero propio una bela putela mora e inveze adeso…

– Indiferente siora Nina, de putei ierimo bei tuti, ma la speti che ghe conto del Carneval, za che la me lo ga fato vignir in a mente…

– El Carneval de Servola, sior Bortolo? Ve vestivi de dona anche vu?

– Ma cossa mai siora Nina, che mi son de Rena Vecia, cossa la vol che me vesto de baba a Servola…la vol che i me porti a San Giovani!?…No no, mi ve digo del Carneval de Opcina, o Kraski Pust come che i lo ciama lori su l’Altipiano, ogni sabato de Carneval, ghe xe’ la sfilata, i cari, la giuria, el premio…Cossa no la ga mai visto?

– Ehh mio nipote sta a Opcina, che ghe xe’ aria bona el disi…

– Aria bona no savessi, siora Nina, ma i cari ghe xe’ sicuro, e quela, la vardi, xe’ proprio una bela roba. Tuti sti putei e ste putele del Carso, ma anche de piu’ lontan…

– Anche de Gorizia i vien?

– Cossa so mi se de Gorizia o Monfalcon, siora Nina! Conforme! Ogni ano i ga i cari ospiti, fin anche austriaci!

– Ahh me mi ricordo mi co’ iera i austriaci…

– E chi no se ricorda siora Nina de co’ iera i austriaci??!! 600 ani i iera qua, come la vol che un se dimentichi!?…Ma in ogni modo, insomma alle 2 de dopopranzo i fa sta’ sfilata, e la gente va sul col tram de Opcina…

– Ehh povero tram, el xe’ propio nato disgrazia’…Anche mio zio Ucio tranvier, diseva sempre…

– Tuti disi, Siora Nina, ma mi no so se xe’ piu’ disgrazia’ el tram o chi che dovessi far manutenzion. Indiferente. Insoma parti la sfilata dei cari, col re e la regina in testa…

– Ma chi, Francesco Giusepe e Sissi?

– Ma cossa mai Francesco Giusepe e Sissi che fra un poco i torna presto indrio, se no se li ga za magnai le tarme, siora Nina! Che poi lori iera imperatori, dela Cacania, casomai…
No no el re e la regina del carneval de Opcina, co’ la carozza trainata da cavalli…
E dopo drio tuti i cari, de Monrupin, de Dolina, de Opcina stesa…Insoma tuti quanti, chi coi cari chi coi careti…

– Mia nona, sior Bortolo, gaveva un careto in Piaza de la Legna dove che la vendeva sparisi e violete, co’ iera stagion…

– E mi gavevo un careto a baliniere con cui me molavo zo’ per Via del Monte, siora Nina! No qua xe’ careti decorai, “allegorici” i li ciama in lingua! E tuti che bala, che canta e i fa scherzi per ‘talian e per sloven. E dopo xe’ la muleria che tira coriandoli, e quela schiuma che par de barba e macia i capoti…

– Ehh, schiuma de barba xe’ dificile de netar via. Me diseva sempre mio mari’ defonto, povero, che gaveva botega de barbier in Acquedoto…Inveze le macie de vin roso se lava col vin bianco…

– Si Siora Nina, e el pecato se lava co’ la penitenza, diseva el vecio Don Blas de Lusin Picolo, ma qua al Carneval carsico niente xe’ pecato, che solo xe’ divertimento per tute le eta’…
Sto ano, la sa’, ga vinto propio el caro de Opcina! I ga fato un Papa Ratzinger gigante…

– Ahh i paparazzi?…quel che i ghe fa le foto de sconto ai vips, come che i li ciama ogi…

– Ma cossa mai i paparazzi! Papa Benedeto XVI, siora Nina, quel tedesco che sta in Vaticano, che la ga con tuti…

– Ahh i tedeschi i xe’ cativi, contava sempre mio fratelo partigiano…

– Xe’ boni e xe’ cativi, siora Nina, come in tute le raze…
Ma qua al Carneval de Opcina, xe’ l’amicizia tra i popoli che trionfa, la sa siora Nina?…

Tag: , , .

2 commenti a Kraški pust 2007, versione maldobriata

  1. patrick karlsen ha detto:

    Brava Fabiana, grande mimesi (te se ga ricordà perfin de Don Blas de Lusinpicolo. Chissà cossa gavessi dito l’avvocato Miagostovich, che el iera ateista come).

    Una maldobria “nuova” non ha davvero prezzo… grazie!

  2. Fabbs ha detto:

    Per Patrick 🙂

    – Me ricordo, siora Nina, che l’avocato Miagostovich, che el iera ateista come, ogni volta che el vedeva pasar Don Blas fora de quel spaceto de vin sansegoto, rente del squero de Lusinpicolo, el diseva forte “Date a Cesare quel che è di Cesare”…!

    – Ahh Cesare Batisti, el iredentista, quel che adeso i ghe gà nominà fin anca la Corsia Stadion?

    – No siora Nina, Cesare Maldini, el baloner che ga la mama che sta a Servola! Ma cossa zentra po’ Cesare Batisti.??!!
    No Miagostovich el lo cioleva pel fioco a Don Blas, no? Che quel che xè de ciesa se ocupi la Ciesa, e quel che xè dei omini che se intrighi i omini…
    Cesare el imperator de Roma, siora Nina…

Lascia un commento

Il tuo indirizzo email non sarà pubblicato. I campi obbligatori sono contrassegnati *