Nate dei refoli de bora: del tempo dei ricordi

DEL TEMPO DEI RICORDI

Del tempo dei ricordi
son ligada
a na campagna cariga de sede,
che ‘l sol
no ga ancora sugada.
I scalini de piera,
la pergola de ùa fragola,
el pozo, el pra de erba spagna:
gnente xe cambiado,
solo el morer visavì de casa
se ga lassado andar,
no ‘l ga più ombra per quela picia,
che la zogava co’ le pupe
de straza colorada.
El careto del pesse
passava el venerdi
e nona li sielzeva svelta,
sugandose le man ne la traversa.

El toro nero
ne la stala, in fondo,
el vardava de bruto torno,
e l’aratro morsigava ‘na tera
rossa come la sera
che indovina un bel giorno.
Sora de tuto
un sutil fil de malinconia,
come un amor
tropo picio de tegnir,
tropo grando de butar via.
Edda Vidiz

PANORAMA

Me piasi star
su la finestra
a vardar fora.
Drio de mi xe
la casa neta,
la mia scorza;
fora un picio mondo
che conosso
de fioi, cani
e usei che svola
alegri o disturbai dei gati.
El mar xe tuto verde
per le onde
fate de la bora.
Le Alpi vedo
bianche de neve
e Conconel nel sol.
Sto mondo bel
che par de incanto
sarà sempre cussì
anca co no sarò più mi.
Ma intanto me lo godo.
Graziella Semacchi Gliubich

AUTUNO

Xe finida sul lido la stagiòn,
no gira un can in tuta la pineta.
Xe serade le case e le boteghe,
no se vedi nissun. No xe rumori.
Le ultime barche dondola sul mar,
dormi altre, ribaltade su la riva.
Tra foie seche un refolo de vento
un scartozo de plastica strassina.
Xe tuto in giro un’aria de tristeza.
Malinconia? Perchè? Gnanca per sogno!
Vegnerà un’altra estate, dopo questa,
come che vien dopo la note el giorno,
come che vien un altro carnevàl
come che vien, e specie a vinti ani,
dopo una delusiòn, un altro amòr.
Laura Borghi Mestroni

Alcune delle poesie raccolte a cura di Edda Vidiz e Graziella Semacchi Gliubich sono tratte dal libro “Nate dei refoli de bora”.