6 Aprile 2018

Magnar ben per bon: Presniz e putiza

el sunto Ricete e morbin dai sie ai zento ani e passa spignatade de Edda Vidiz

De la pasta per la pinza, un vero simbolo de la Pasqua triestina, tanto che ai tempi andai se se augurava ‘diritura:”Bona Pasqua, bone Pinze!” – nassi la putiza che – dopo el presniz che xe el massimo – la xe un dei meio dolci de Pasqua.
Come gaverè za capì per la pasta de la putiza se dopra quela de la pinza e ‘l ripien… più che somiliarghe a quel del presniz, el xe propio lu’, solo che no’l ghe vien rodolado dentro come un salamin ne la pasta sfoia ma messo int’ela pasta per la pinza come per el strucolo de pomi. (Orpo. me sa che ve go dà do rizete inveze de una!) Ben bon, ciapelo come un regalo de Pasqua e andemo ‘vanti col preparar.

Per el ripien de presniz e putiza
1 CICHERA DE BISCOTI SFREGOLADI
½ CICHERA DE MANDOLE BRUSTOLADE SFREGOLADE
½ CICHERA DE PAPOLI DE NOSS SFREGOLADE
½ CICHERA DE ZIBIBE
½ CICHERA DE PIGNOI
PUGNETO DE CEDRINI
1 CICHERA DE CIOCOLATA GRATADA
UN BIC’ DE RAS’CIADURA DE LIMON
SLUC DE RUM
ZUCARO VANILIADO
5 DECA DE FIOCHETI DE BURO
5 DECA DE ZUCARO
SEI CIARE DE OVO MONTADE A NEVE
Come se fa: dopo gaver sfregolà i biscoti, le mandole e i papoli de nosa zonteghe le zibibe (che spero gaverè za ‘morbidì in aqua tepida), i pignoi, i cedrini, la ciocolata gratada, la ras’ciadura de limon e ‘l sluc de rum e impastè tuto insieme.

PRESNIZ
prePer la pasta sfoia “semplificada”:
20 DECA DE FARINA,
DIESE DECA DE BURO, SAL
Podè anche ringraziar el Ciel che, ogidì, la pasta sfoia la podè trovar za pronta surgelada al supermercà, cussì gavè meno de bazilar e podè andar “per le alte” a ciapar un fià de primavera.
Ma, se propio se dei masocisti: impastè e missiè ben, ben un terzo de la farina e del buro co un spatolin. Feghe una balota e lassela riposar. Impastè el resto de la farina con un fià de sal e mez cicara de aqua. Tirè la sfoia. In mezaria meteghe la nbalota de butiro e farina, ripieghè sora la sfoia,mastruzela co le man, tirela col rodolo de la pasta. Po’ ripieghè la pasta in quatro e ripetè piega dopo piega per altre tre volte. Fata la xè!
Col paston del ripien, come descrito più sora, farè un bel salamin che anderè a involtizar ne la pasta sfoia un fiatin zucherada e tirada sutil. Doverè far tacar ben el salamin a la pasta che involtizerà, quel che oramai podemo anca ciamar presniz, e spenelarlo co’ l’ovo sbatudo. Desso el nostro presniz doverà andar in forno zà ben caldo per zirca ventizinque minuti.

PUTIZA
putizaPer la pasta:
3/4 DE CHILO DE FARINA,
7 DECA DE LIEVITO,
6 ROSSI DE OVO,
15 DECA DE ZUCARO,
15 DECA DE BURO,
UN PER DE CUCIARI DE PANA, SAL.
Ma se gavè fato le pinze basta lassar indrio quel tanto de pasta che servi per far una putiza!
Per prima roba sioliè el lievito int’una cicara co’ un fià de late tiepido, do cuciari de farina e un de zucaro e lassè levar in caldo. Po’ sbatè i rossi de ovo col zucaro siolto in un fià de late, un bic’ de sal, la pana e ‘l butiro ‘morbidì, ma no squaià. Zontè a la pasta zà messa in calduz sta pasta compena fata e lassè levar le do insieme. Co la pasta sarà levada distirela sora un tovaiol infarinado dandoghe la forma de un retangolo, sparmizeghe de sora i fiocheti de buro e po’ ‘l zucaro e la pana. Distirè el ripien sora de la pasta e, in ultima, le ciare de ovo montade a neve. Rodolè ben, con atenzion, e sistemè la putiza cussì preparada in un stampo de torta onto de buro; indorè la putiza co’ l’ovo sbatù e metè in forno a 200° per circumcirca un’ora e meza.

Che basi, bori e buzolai no ve manchi in piato mai!

Lascia un commento

Il tuo indirizzo email non sarà pubblicato. I campi obbligatori sono contrassegnati *