21 febbraio 2018

La legenda de Madona Bora

el sunto Inizia oggi una collaborazione con Edda Vidiz, che dalla prossima settimana ci racconterà di Trieste attraverso ricette, ciacole e poesie

Il testo è tratto dal libro Tergeste, dove soffia la bora.

Tanti ani fa – ma cussì tanti che a nissun ghe sovien più quanti – Vento, scorabiando in giro pe ‘l mondo co’ i sui fioi e Bora, che iera la sua fia più bela e più amada, el xe capitado in zima de un verde altipian che ‘l se tociava drito in te ‘l mar.
Bora, profitando del fato che papà el iera ocupado a impararghe ai fradei pici a far refoli, la xe scapolada via per zogatolar a sconderse fra i nuvoli e a corer fra le zime dei carpani e dei castagneri che, bituadi a viver in pase, ghe vegniva i nervi a strassino del remitur che la fazeva passando. Dopo un poco Bora, stanca de zurlarse de qua e de là senza saver ben dove ‘ndar, la xe entrada int’una grota dove, per la prima volta in vita sua, la se ga imbatudo in qualcossa mai vista prima: un essere umano! Ma miga un qualsiasi! Gnente de manco che Tergesteo, un dei Argonauti su la via de ritorno a casa, fermadose a riposar propio in quela grota.
Tergesteo ‘l iera cussì forte e cussì bel e cussì diferente de Vento, e de Mar e de Tera e de tuto quel che fin in quel momento Bora gaveva visto e conossudo, che de boto la se ga quetado. E fra ela e Tergesteo in un tif-taf xe stà un amor grandissimo, vissudo in quela grota per tre, zinque, sete giorni, fra i più bei che se possi pensar.
Co Vento ‘l se ga inacorto che Bora la iera andada a torzio de sola el se ga rabiado de bruto e ‘l ga scominziado a zercarla, butando sotosora tuto el ziel. Sufia de qua, fis’cia de là, zerca che te zerca, el iera cussì infuriado, che tute le creature le scampava a sconderse piene de paura. Finamente un de quei nuvoloni neri, ingropadi e brontoloni, stufo de tuto quel remitur, el ghe ga spiferado ‘ndove che ‘l gavessi podudo trovar quel disastro de su fia.
Vento, entrado int’ela grota, el ga visto Bora intorciolada a Tergesteo, e la sua furia xe diventada un spaventoso uragan, che no ve digo e no ve conto. Senza che la disperada Bora podessi in nissuna maniera fermarlo, el se ga scadenà sora de Tergesteo sgnacandolo e sbatociandololo su e zo per la grota, fina che ‘l povero eroe xe restà duro per tera, senza più respiro!
Vento, per gnente ‘vilido per quel che ‘l gaveva fato, dopo averghe zigado a Bora robe che no se pol ripeter, el xe ripartì lassandola al suo destin! Bora, impetrida de paura e de dolor, la ga tacado a pianzer a calde lagrime, tanto che ogni lagrima, che ghe scolava zo pei oci cascando per tera la se trasformava in piera.
A Madre Tera ghe xe vegnù un gropo in gola nel veder el dolor de Bora. E cussì del sangue de Tergesteo la ga fato nasser la foiarola, che de quela volta la colora de rosso l’autuno in Carso.
Ma Bora ancora no la smeteva de pianzer. Alora Madre Natura, preocupada de tute quele piere, che ris’ciava de rovinarghe el logo senza modo de refarlo, la ghe ga permesso de regnar propio su quel posto, e Cielo, per no esser de manco, ghe ga permesso de riviver ogni ano, insieme a Tergesteo, i lori tre, zinque, sete giorni de amor. E finalmente, sta speranza nel cuor ga sugado le sue lagrime.
Anche Adriatico ga volù dar una man e ‘l ghe ga ordinà a le Onde de coverzer de conchiglie, stele de mar e verdi alghe el corpo del povero inamorado. E xe sta cussì che Tergesteo el xe diventando più alto de tuti i montisei che za coverzeva ‘sto cantonzin de mondo. E i primi omini rivadi su ‘ste tere se ga alogiado propio su la sua zima costruendo un Castelier co’ le lagrime de Bora diventade piere.
Ano drio ano, piera su piera, sto Castelier xe diventa zità, na zità che i omini, ricordando Tergesteo, i ga ciamado Tergeste: ogi Trieste, dove de ani anorum regna Bora: “ciara” co la sta a brazocolo del suo amor, “scura” co la speta de incontrarlo.

A la prossima e per intanto …che San Giusto ve vardi!

Tag: , .

19 commenti a La legenda de Madona Bora

  1. Fiora

    orpo che romantico scuminziamento dela mia cità ! e che indulgente plenaria propusnica per Sua Scontrosa Graziosa Maestà la Bora!

  2. Marovelli Silva

    me ga piasso legger questa bela storia ,go 77 anni, e non la savevo go fatto un poco fadiga a leggerla perchè leggerla in triesti non son abituada ma me ga proprio piass. Ve ringrazio

  3. Marovelli Silva

    volessi salvarmela sul mio profilo per leggermela con calma ogni tanto come se fà

  4. Mislej Annamaria

    Bella leggenda…che fa ancota più interessante la ns.bella Trieste..<3

  5. michela

    Silvia, clicca sulla striscia in alto con il tasto destro del mouse… la scritta diventerà blu… poi con il tasto sinistro, clicca “copia” e trasportalo sul tuo profilo, fissandolo con “incolla”.

  6. Fiora

    … e quando l’ enesima ombrela “garantita antibora” me se scavezerà , inveze de ciaparmela, adesso soriderò pensando a quest’ amor de vento de piere e de mar nostri.

  7. giorgio (no events)

    Bela legenda, ghe voleva in ‘sto periodo.
    Ma ogi, se pol butar le ombrele scavezade in scovazon? Gò inteso che, fin che xe bora, no i svoderà le scovaze dei scovazoni per tignirli fermi che no i fazi “gran premio” come l’altra volta…

  8. Fiora

    cossa Borin xè el picio de madama Bora e de Tergesteo, lora?! va ben che mater certa…bon indiferente!

  9. Fiora

    ” e che s. Giusto ne vardi” eh, me sa che che nel derby casalingo de ogi, miti e legende bati fede catolica per cinque (a)….sotozero!

  10. Fiora

    anzi per eser più specifichi e no ris’ciar che quei de cesa se inombri : Madama Bora bati Santo Patrono….

  11. giorgio (no events)

    @10 Fiora: però podèmo sempre dir che el stratempo d ‘sti giorni xe colpa de “Burian” el cugin russo ortodosso dela nostra

  12. Fiora

    @11
    ah, maschilista te me son Giorgio?! che sto Burian sia responsabile del gelo ghe lassemo, ma Bora nostra ga tali credenziali pregresse e consolidade ( inverni dei ani ’50) che reparto refoli la bati l’ortodosso siberian & compania cantante.

  13. Fiora

    cossa esisti ombrele antiBurian,forsi?Mi conosso solo quele antibora. e se le ombrele se arendi al suo primo refolo serio, xe solo ulteriore riconosimento a Sua Grazia …ma sì Scontrosa, natural!

  14. giorgio (no events)

    Ma no, Fiora. Mi zercavo una storia de contarghe ai quei dela cesa. Che, tra l’altro, ‘sto Burian xe vignù fora de poco, sicuro dopo che xe cascà el muro, ma forsi solo insieme con Putin e, per mi, gaverà a che far col comploto “russiagheit”. A ‘sto punto vederemo se la zima de ‘sti giorni influirà sul voto de domenica e chi che se troveremo pronto per far el governo lunedi.

  15. Fiora

    @14
    ” per mi gaverà a che far col comploto “russiagheit” eh, giorgio! niente de meravigliarse …”EL” xè grando amico de Putin, LU’!…xrò EL predica sempre ‘ndate a votare, senò queli altri ci magnano la marenda. Eh, ma ani passa per tuti …magari co’ sto Burian che ghe ga imprestà l amico, EL ga fato una mossa sbaliada tipo autogol. Bon indiferente ,vederemo lunedì!

  16. Fiora

    Orpo, altro ch’el compagno de marende de Putin! qua la sinistra se ga ricordà del Migliore e i ghe ga fato una prece. Dane ti una man, mandine un segno e al tempo stesso un disuasor che quei altri bituai ai agi e al confort i staghi casa domenica e cussì la marenda ghe la magnemo per bon noialtri!
    s. Palmiro ga fato la grazia Xe rivà sto Burian e lori pol dirghe anche a quei de cesa , s. Palmiro (tramite el suo Inviato) vs. Giusto. Noi sì che semo a bolla!

  17. Fiora

    …ma forsi S. Palmiro ga tignù el calendario ortodosso che posticipa tuto e magari Domenica Elecscion Dei xe un sol che spaca le piere.

  18. John Remada

    @14 Ora hai visto i risultati Giorgio…..e immagino le risate che ti sei fatto! Altro che l’american della Remada…..poi non capisco “L’american” ,Remada è un cognome di origine messicana, o un sopranome dialettale delle nostre zone; e ma tu avendo qualche primavera in avanti, sicuro ne saprai di cose….Au revoir Iure!

  19. Bello, grazie
    Casomai vi potesse interessare: su questo interessante e simpaticissimo foro veneto si è cominciato col parlare sulla nebbia i si è finito a parlare sulla bora:

    https://www.tapatalk.com/groups/evenesie/nebia-t226.html

Lascia un commento

Il tuo indirizzo email non sarà pubblicato. I campi obbligatori sono contrassegnati *