Riceviamo e pubblichiamo la segnalazione di “Giovine che no ga più el morbin de una volta” sul tema delle panchine dell’atrio dell’Università, fatte togliere dal rettore Fermeglia
Una volta iera tuto più lento. No iera tuta sta frenesia, se te se sentavi da qualche parte iera sacrosanto: te ciapavi un poco de sole in faccia e te trovavi sempre qualchi d’un per ciacolar de come se stava meio quando se stava pezo. Opur te pozavi el cipopo mentre te spetavi el solito stagorivando/facontochesonzalà. Opur per farghe le bele ad una putela. Insoma dele somme, un logo per sentarse ga sempre fato comodo. Col novo millenio invece xe sempre de corer, de bazilar, senza star mai fermi, se ga de ostentar de eser sempre i più meio.
Cussì per far de Trieste una zità de cartolina xe diventà de moda la parola “decoro”. Prima ga scominzià Bandelli a segar panche in piaza Venezia, poi i ga continuà nela stazione dei treni. In ossequio al “stuco e pitura fa bela figura”: i problemi vien sconti come la polvere soto el tapedo, senza risolverli. De solito xe un gonfiar i muscoli contro chi che non pol far gnente: per dir, Bandelli gaveva dito che se assumeva tuta la responsabilità. Te capirà, non gaveva mica mandà a remengo Napolitano o, pezo, Putin. Bon, tuto vero, ma xe roba vecia, el punto de tute ste ciacole per insempiar la gente quale xe? La questione xe che ‘deso i ga cavado dele panche anche in atrio del’università. Perchè? Ma per il “decoro” pò! Te pol capir che bruti de veder che pol eser quatro muloni sule panche de un atrio che magna un ninpa! O un che conta ai altri muloni de come te ga passà eroicamente l’ultimo esame che tanto ghe faxeva bazilar. O che per riposar i oci dal computer i valuta el CTF dele putele che passa. O pezo: che i se meti a rider per una mondada tra lezione e l’altra.
Robe de mati! Come xe stada posibile questa impunità per tuto ‘sto tempo? Ora finalmente xe un bel atrio, in ordine e… svodo. Dove te entri e te fili via rapido, xe un posto de pasagio e non de socializzazion. E se te devi spetar qualchi d’un per pranzar insieme te lo fa in pìe, e poi anche te magni in pìe, come i cavai (o i mussi). Se poi te provi a chieder de gaverle indrìo te son un spuzafadighe che vol solo pomigar. Prima iera una vera babele, non de
lingue (a parte el lanfur 😉 ) ma de cultura: una nacici parlava de diritto fallimentare, un LEM de scienza dele costruzioni, un mato de istologia, un altro ancora de particelle subatomiche e iera veramente come parlare lingue diverse che no te intendevi una parola. Iera bel, te capivi che xe un sacco de mondi de scoprir, te fa veder le cose in
modo diverso e più aperto. Bom, me son calmà, finirò ‘sto sfogo, fussi mai che un foresto sia rivà fin qua, in lingua. Secondo me è un gran peccato ed un brutto messaggio, ogni panchina tolta è una opportunità in meno per conoscere persone e mondi diversi. Si tratta di un immotivato e miope impoverimento della comunità. Babbo Natale, Cosoloni, Giulio o qualche altro benefattore, te ne le rimetti a posto? Prometo che dopo fazo el bravo, e se non ogi da doman! 🙂
Invito un poco tutti, ma soprattutto el prossimo che volerà segar panchine, chiuder un bar alle sette de sera, chiuder in negozi de domenica e za che semo de sabato dopo pranzo -ve invito, disevo- a far una gitina a Trento.
A Trento xe pien de pattuglie de polizia ma se i te ga de rubar la bici i te la ruba uguale. Dopo magari anche i te la torna, se te la trovi ti.
A Trento de domenica dopo pranzo xe tutti a coppie sottobrazo in centro a veder le vetrine… dei negozi serai. E guai fermarse! Primo perché te farìa bruta figura, secondo te intaserìa tutto el corso, terzo no xe dove sentarse.
In piazza del duomo xe due panchine (2). El resto xe tavolini de bar.
Un giro gavemo avudo la pessima idea de fermarse a cior castagne e vin brulé in un chioschetto. Castagne in una man, bicer in quel’altra… e ‘deso? Se sentemo… sui scalini dell’università: in tutta la via no ghe jera una panchina. E xè la via dove che i fa anche el mercatino, con sbocco sula piazza, quindi no una sconta.
Insomma bel decoro star sentai sui scalini. E in scuro!
Sì perché nella CITTA` VIVIBILE se illumina solo dove che servi, per risparmiar. Quindi un posto in cui no te dovessi sentarte, no ocori illuminarlo. L’angolo de piazza del duomo in cui no te ga de ndar, xe scuro. Tajo per de qua che fazzo prima… NO! O mejo, se te vol va, ma magari te se ritrovi spoja’ nudo con un cortel in panza. E chi te ga ditto de ndar per de là, che tutti quanti va per de qua e vara che bel de veder che te gavemo fatto noi per de qua e ben te sta.
A Trento xe permesso girar pel centro de domenica dopopranzo fin le sette de sera. Mejo sei e tre quarti. No xe scritto de nissuna parte ma fideve che xe cussì.
A Trento se te ocori un toco de pan de domenica te ga de ciapar el treno e ndar de qualche parte. Uguale de mercoledi dopopranzo, che xe come el nostro lunedi. Solo che xe serada anche la coop.
A Trento a capodanno i bar chiudi a mezzanotte e mezza.
A Trento se no ghe fossi i universitarii i bar sarìa tre quarti fallidi e comunque i zerca de renderghe la vita difficile. Anche i supermercati se la passerìa mal.
Invito un poco tutti, ma soprattutto el prossimo che volerà segar panchine, a far una gitina a Trento e dopo decider:
ve va ben una Trieste cussì?
Sarìa legittimo, eh. Là per chi xe inserido nel sistema le robe funziona bastanza. Basta meter le robe in ciaro: chi che vol Trieste CITTA` VIVIBILE metti el dito qua sotto. Ma zerchemo de esser sinceri a risponder: no val voler una città de un certo tipo, con certe norme e certe regole, e dopo scampar do ore in jugo per molar el can in bosco o far el bagno nudi.
TRA LA BOLGIA E LA TOMBA: una via de mezo no? l’altra stemana go vù modo de veder un’università italia più granda ( e più quotada de la nostra 🙁 purtroppo: BON un suf infernale, un gheto mai visto, mularia sentada per tera, genta la più assurda tapada a fogo e de una certa età, che scherzava coi bolgisti. E go pensà: mama mia che indecenza!Dopo go pensado all’atro spoglio, al silenzio sepolcrale… e digo: na via de mezo no eh? a presto per altri report su “tomba sì, tomba no” 😉
concordo.
cmq mi (almeno, parlo per…sigh, 6 anni fa) me par che la biblioteca generale iera esattamente una via de mezzo! gente sentada che ciacola, che ripassa, che scherza. no go visto nissun con otavi de bianco, ovi duri e chitarin 😉
apunto! quindi una manifestazione de celodurismo inopportuno. (chitare e calice però dopo ‘na certa ora… 😉
apunto! quindi una manifestazione de rigorismo inopportuno. (chitare e calice però dopo ‘na certa ora… 😉
apunto! quindi una manifestazione de disciplinismo inopportuno. (chitare e calice però dopo ‘na certa ora… 😉
apunto! quindi una manifestazione de perbenismo inopportuno. (chitare e calice però dopo ‘na certa ora… 😉