19 Novembre 2013

Le piccole certezze di Trieste: i manifesti natalizi di Giulio

Cossa nassi a Nadal, a Trieste:
– a fine otobre compari i adobi. La gente brontola che cossa mai, xe tropo presto, xe un spreco, cossa coreva, una volta se gaveva meno e se stava meo.
– i adobi xe distudai. La gente brontola che cossa ocori meter i adobi se dopo te li tien distudai.
– riva i mercatini. La gente brontola che i xe ogni ano pezo. E po’ xe sempre le stesse robe.
– riva la fiera de S. Nicolò. La gente brontola che te capirà, ormai xe andà tuto a remengo.
– riva San Nicolò. La gente brontola che xe crisi, no el porta gnanca più carbon perchè no el ga schei, qualchidun disi che el va ciorlo de note de sconton in Feriera. Ma che i mati là i ghe la caza, e i ghe mola catrame che ghe fa mal ai fioi. Anca San Nicolò xe andà a remengo.
– riva lui. Lui chi? L’ALBERO DE PIAZA UNITA’. Bon, no servi dir gnente su questo diria 😉
– la gente va in crisi. E comincia farse domande filosofiche de sto tipo. A cui qualchidun anca rispondi.

A tuti questi sestavameoquandosestavapezoismi se ga de qualche ano zontà la triste dipartita del cammello Giulio, una dele poche certeze natalizie che ghe restava ai triestini (Anche se la gente brontola che el iera ogni ano un poco più bruto e che no el iera più come una volta e che se vedeva che el stava andando a remengo anca lui).
Ma el spirito de Giulio xe rimasto. E de quela volta ogni ano i triestini sa de poder contar su un grande ritorno natalizio, de tuti ateso con gioia e curiosità. Eco, anche sto ano xe finalmente comparso el primo manifesto del misterioso Giulio.
Ecolo!

(Un grazie a Lorenzo pellizzari per la foto)

La gente brontolerà che una volta i iera meo. Bah, no i capissi gnente. La grafica xe quela, i colori anca. Ghe xe el novo tormentone “Giù giù giù”, citazion artistica coltissima del video qua soto:

E poi ghe xe el riciamo al sovranaturale, come che iera stado ai tempi del “Zum Teufel”. Desso ghe toca a Babbo Natale. Par che prima iera stado ciamado San Nicolò, ma el xe tropo triestin, no el gaveva frescheza, el ghe devi gaver risposto “volentieri”. Insoma, manifesto promosso in piena, cossa vol de più la gente?

Per concluder, diria che val la pena ripercorer un po’ la storia dei manifesti più legendari de Trieste, strucando qua. 😉

Hai scritto qualcosa (o fatto foto, o video, o pupoli…) di divertente/ironico/satirico su Trieste, Gorizia e dintorni? Mandacelo al Quel dela Quela! Scrivi a manna@bora.la

Tag: , , .

10 commenti a Le piccole certezze di Trieste: i manifesti natalizi di Giulio

  1. Diego Manna ha detto:

    cmq:
    prima riga: 3 parole
    seconda: 5
    terza: 4
    quarta: 2
    quinta: 4

    5-3= 2;
    4*2*4= 32 (inversione teufelica di 23).
    unito risultato: 23 A 2.
    tuto torna.
    che bel gaver certeze nela vita!

  2. ufo ha detto:

    Grande Giulio! El camel, voio dir. Sto qua inveze me par un poco distrato. El xe stà trenta ani a scaldar poltrone (pagado de noi) senza produr niente, e ghe vanza de parlar. Se el fussi onesto el dovessi far un manifesto per dirghe grazie a chi che tuto sto tempo ghe ga permeso de farse i comodi sui senza lavorar.

    Opur vizin sindaco e region scriver anca autorità portual? Nianca quela no la brila de sgaieza… 🙂

    Cossa nassi per nadal, a Trieste e fora Trieste, ordine spanto:
    – no cora, ma sicuramente prima de nadal gaveremo Olli Rehn che ne prometi la ripresa in tela primavera che vien (lo sta fasendo del 2008, prima o dopo el intiva);
    – el sior ministro che ne conta anca lui la stesa fiaba (Saccomani ga zà tacà diese giorni fa); nissun se ricorda più che un ano fà diseva stesse robe;
    – mi che ingrumo firme per chieder la primavera anticipata;
    – San Nicolò che ne disi che sto ano no i lo lassa vignir, che no ga el visto per TLT e alora cice, i regali i li porta a Koper che xe ancora Schengen;
    – el premio per el meio libro de vitz e barzelete al ‘Libreto rossonero del TLT’, a cura de Diego?

  3. sfsn ha detto:

    ciò, con sto ultimo manifesto Camber ga proprio dimostrà de esser taljan: el se ga rivolto a Babo Natale! Un triestin patoco ghe gavessi scrito una leterina a San Nicolò!

  4. Fulvio Rogantin ha detto:

    I commercianti inveze se rivolgi a Santa Kraus

  5. Kaiokasin ha detto:

    #3 scusa Hobo, fai un servizio didattico…
    dov’è l’errore? Nel mio modesto tedesco da sopravvivenza sembra un po’ stucchevole (magari un tedesco non direbbe così) ma formalmente giusto.

  6. hobo ha detto:

    @kaiokasin

    “è nel nostro porto” si dice “liegt in unserem hafen”

    ci va il dativo, perchè liegen è un verbo di stato, non di moto.

    invece per dire “entra nel nostro porto” si dice “läuft in unseren hafen ein”

    con l’accusativo, perchè laufen è un verbo di moto

  7. hobo ha detto:

    eh, diventar austriaci xe casin, quasi piu’ casin che diventar negri:

    http://youtu.be/2E1SjhoVNK8

  8. ufo ha detto:

    Xe permeso infierir? Scuseme, ma stavo lezendo dele robe sui nostri avi e come xe come che no xe me son trova a lezer robe scrite dale nobili glave pensanti che una volta sta cità usava eleger e mandar nela capital de turno per rapresentarla. Rybář, Šček, Besednjak, Vilfan ma anca Hortis, Morpurgo, Basevi e tanti altri – e el confronto no xe che el sia tanto piasevole. Quei altri, oltre che pensar, no se faseva tropi problemi a meter per scrito i pensieri de lori, e stamparli soto forma de libro, con tuto quel che costava stampar in quei ani, e a riscio de andar in longhi se el libro no ghe piaseva a qualchidun. E i saveva anca scriver bel e pulito, e le robe che i scriveva le continua gaver un senso anca ogi.

    Eco, no che ghe lo auguro, ma prima o poi anca per el Camber veniera el zorno che i lo portera a Sant’Ana coi pie in avanti, e se quel zorno el giornalista de turno volera far la somma dela produzion inteletual del omo che per trenta ani ga rapresentà Trieste dove che i decidi e i spartissi – riverà al gran totale de due manifesti, ciompi de far paura e probabile fati scriver a altri pagando. Me par che no cori dir altro ne sula triste figura, ne sula cità che no ga trova nissun de meio de eleger che el pregiudicato e el campion de angry birds. De altro canto, no xe che el resto dei personagi diventai casta grazie ala Lista gabi fato ssai de meio, anzi.

    Chi xe che ga dito “chi è causa de suo mal…”?

Lascia un commento

Il tuo indirizzo email non sarà pubblicato. I campi obbligatori sono contrassegnati *