Trieste ai tempi del Science+Fiction

Festival dela fantascienza, finalmente. Giornate passade sentai sule careghe a vardar aparechi che se spara, vampiri e zombi che se cori drio e astruse teorie sul’origine umana, un podessi pensar. E invece no. I giorni del Science+Fiction, che casca propio in mezo a Halloween e el ponte dei morti, pol diventar quasi una realtà paralela, in cui te se imergi per un poco dimenticando tuto el resto.
El mio festival incomincia giovedi sera, col concerto dei Mothership al Miela, la notte degli ultracorpi. E pol bastar ste foto, rigorosamente rubade dal facebook dei amici presenti, per capir che aria tirava.

Ulmo de gente, fora, dentro e in mezo. Robe che te incontri tuti. Da qualche anno a Trieste la note de Halloween ga ciapà pie, e sto giro el Miela monopoliza la serata. I Mothership non se limita solamente a meter musica, ma fa propio un spetacolo che va assolutamente seguido anche visivamente.
Pausa bira? La fila al bar xe eterna. Più de qualchidun se arendi, altri trova la furbada: andar al barachin che xe fora e tornar dentro in cinque minuti. Ma presto diventa dificile anche rientrar, de quanta gente xe. I sera el bar, ma la festa continua ancora, el giorno dopo se dormi.
E co se se sveia, se trova un sol quasi estivo. Giusto el tempo de organizarse, e la puntatina a Barcola xe obligatoria. E anche là, tantissima gente, che no se limita a passegiar, ma fa anche el bagno. Clanfin, e anche per novembre el cartelin xe stado timbrado.

E poi via de corsa in Sala Tripcovich, a veder finalmente i primi (per mi) film dela rassegna. El ritmo xe notevol, tra un e l’altro la pausa xe giusto quela de un sbecolez. A ora de cena, se riva a butar zo un toast al Miela. No me sofermerò molto sui singoli film, el livel xe comunque decisamente alto. Europa report, la storia del’esplorazion del satellite de Giove in cerca de forme de vita, se merita el mio 5 (el massimo) e resterà el mio preferito in assoluto. Subito dopo “Painless” una storia de bambini imuni al dolor, la cui trama se svilupa nela Spagna franchista, rendendo el film decisamente interessante anche dal punto de vista storico. E poi The strange colour of your body’s tears, in assoluto el film che me xe piasudo meno fin adesso, veramente dificile de seguir, sensazioni quasi de molestia.
E poi via al Miela, a ciacolar con chi invece ga seguido là i film del Spazio Italia, delusi un poco da Report 51, almeno cussì i me disi.
Cussì, senza che gnanche te se corzi, riva sabato. Pranzo veloce e poi altra maratona, dale 14.30 ale 24. Prima i corti, poi “Upstream color”, che ga diviso a la platea tra el 50% che no ga capì e se ga infastidì e el 40% che no ga capì ma se ga incuriosì. E un 10% che ga capì e ga dito che xe un capolavor.
Con “Robot & Frank” riva finalmente el film comico, con l’ormai classico afezionarse tra omo e robot. In chiusura, al Miela, “Across the river”, produzion indipendente che fa el pienon, con gente che resta a vardarlo in pie. Me ricorda “The Blair Witch Project”, con tanto buio e tante ombre e robe che no se vedi, o che se intravedi. E che quindi fa più paura. Un etologo che se perdi nei boschi del Friul orientale e resta incastrà in un paesin abandonà, in balia de due gemele dai lunghi cavei bianchi de strega (agane? O quele xe bone? Domando aiuto ai amici friulani). Decisamente un bel film, filmà, disi el regista Lorenzo Bianchini, in 20 giorni durante le ferie de Nadal e dopo nei busi de tempo nei week end. Bravi muli, bel lavor.
Ultime ciacole fora del Miela. E desso, cossa femo? Spetemo doman per tirar le some de questi giorni? Bon, intanto andemo a bever l’ultimo de qualche parte. Ma la testa resta al Festival, poco de far. Per un fine setimana diventa questa la realtà.