Ricevo da sfsn questa profetica mail sulla fine del mondo a Trieste, come che la vedi lui.
21 Dicembre 2012
di sfsn
Secondo i Maya el 21 dicembre del 2012 (cioè doman) vegnerà un gran remitur che sarà tipo la fin del mondo e dopo comincerà una nova era de pase e giustizia e se salverà solo quei che ga la consapevoleza.
Eco cossa che nasserà vénerdi:
el mar se ritirerà, e dopo vegnerà un zunami che no se riconosserà più niente. Per esempio cascherà el muro del pedocin, e anche se i Maya disi che dopo vegnerà un’epoca de pase, no sarà pase per tuti, perchè i omini ghe tocherà star insieme cole babe anche al bagno.
Dopo sarà torme de gente che se agirerà in giro e i passerà de un posto al altro zercando un logo dove stabilirse. Un poco quel che sucedi za desso tra Aquedoto e Nàima.
Per giorni e giorni no se vederà più el sol. Ma a tuti quei quranteni bevandele noturne che iera za abituai a girar nei suddetti locai no ghe cambierà gnente.
Sarà sai teremoti, e a Monte Grisa ghe casherà de novo l’intonaco, e tuti i bori che ga messo la region per refar el formagin sarà sprecai.
Vegnerà bora de bruto. Bora scura. E tute le ombrele finirà in scovazon.
E dopo jazzerà el mar, e finalmente tuti quei mone che va sul molo co el xe jazzà, inveze che sbrissar, finir in aqua e morir congelai i se becherà dele mate tonade, perchè comunque el mar se jazzerà che xe bassa marea.
Dopo evaporerà tuto l’alcol e sarà sai grave per tuti. E solo i previdenti che gaveva sai ben tapà le botiglie se la passerà ben.
Dopo se verzerà i nuvoli e Dio aparirà al umanità e dirà: “Ciò, che tempo de merda, ara!”
Dopo i quatro quinti del umanità sparirà. Ben sarà che sparirà i comercialisti, i avocati e i coghi filipini. Un poco meno ben che sparirà anche la barista tettona del bareto de via Giulia che vado sempre là a cior un capo in B e che me fazessi sai volentieri un tireto, ma pazienza.
Bon, comunque, oltre ai comercialisti, ai avocati, ai coghi filipini e ala barista tettona, sparirà anche
tuti quei che sta in case che ga el numero civico 47 (compresi i barrai), i mati che sona l’arpa, le babe che la ghe spuza sai de freschin (anzi, sta roba sarà sai, sai bela), i preti poligami e anche quel stronzo de tubo che me ga messo la multa per sosta sul scalin che no iera gnanche el scalin.
E dopo sto remitur finalmente comincerà una nova epoca, de giustizia e in cui se salverà solo quei che ga la consapevolezza.
Sopratuto se salverà tuti quei furlani che ga la consapevolezza che lavorar xe una cazada e i se ga trasferì a Trieste per no lavorar, tipo Gelindo.
E sta nova epoca comincerà con Pepi s’ciavo che farà panini grandi e a prezzi decenti e col mato del enoteca vizin ala cesa dei s’ciavoni che dirà: “Chateau Carignan de Premières Côtes de Blayer del 2001? Ma va a cagar! Te vol bianco o nero?”
E dopo le babe de Trieste diventerà sai cocole, no le se la tirerà più e le la darà con sai meno dificoltà de desso e le sarà tute simpatiche e disponibili come le bisiache.
E dopo sarà Tondo che i ghe monterà un rigassificator intel e el farà energia per tuta la region.
E dopo i cani no cagherà e pisserà più in strada, ma i userà sempre el cesso e sarà una bela epoca de siole nete.
E dopo quel amico che te disi sempre: “Sto giro fa ti, mi fazo la prossima volta” el tornerà tuti i bori che el ga scrocà. Coi interessi.
E tornerà a verzer el Capitol.
E Umberto Lupi finalmente canterà intonado.
E tuti i dentisti che ga fato piombadure fazendo pagar dozento euri senza gnanche la ricevuta, in boca ghe vegnerà el tartaro.
E i spelai ghe tornerà a cresser i cavei e no ghe vegnerà gnanche dopie punte.
E no ghe sarà più etilometri.
E in sta nova epoca sarà tuti boni e democratici e i lasserà parlar Crepaldi in stazion idrodinamica, ma tanto no ghe sarà nissun a scoltarlo, perchè chi va in stazion idrodinamica? Sarà solo do turisti che ghe domanderà al custode “Ma chi xe sto mato cola flaida nera che parla da solo?”
E el zitolo zotolo diventerà sport nazionale inveze del balon. E i muleti de ricre sarà campioni mondiali de zitolo zotolo.
E quel mona de Paolo che me ga ciulà (in tuti i sensi) la baba tredici ani fa el troverà Antonio el rasta per strada e sarà cazzi sui.
E Menia e Bandeli co se troverà per strada i se saluderà disendo: “Dober dan, dragi, kako si? Greva jest? p’nin z birco?”
E el mondo sarà sai più bel perchè quei che ga la consapevolezza iera tuti in osmiza e sicome i iera carighi no i se ga acorto de niente. E i tornerà zo del Carso e i vederà che xe un mondo più bel e gente sai più cocola e no i capirà come mai che no xe più el muro del pedocin (ma tanto xe el 21 dicembre e chi sa un cazzo del pedocin in inverno?) e allora i vederà sto mondo belissimo e i se dirà: “Ma cossa te disi se andemo a farse ancora un spritz?”
sfsn
Hai scritto qualcosa (o fatto foto, o video, o pupoli…) di divertente/ironico/satirico su Trieste, Gorizia e dintorni? Mandacelo al Quel dela Quela! Scrivi a manna@bora.la
GRANDEEEEEEE 🙂 🙂
Bravissimo! 😀
😀 😀 😀 😀 😀 😀
sì! sì! sssììììììììì!!!!
Venezia afonderà e i la ciamerà la defonta, i austriaci diventerà gondolieri e i canterà le canzoni de cechelin alle coppie de turisti che i se prometerà brodo de fasoi eterno sotto la nova passerella de canal grande.
Che figada!!!
IMENSO sfsn! che mone che semo stai, ara! che se se ativavimo per tempo podevimo elaborar un pampel…pardon un pamphlet titolà ” La maledisione del Vintiun Dicembre” che gavessi rinverdì i fasti del Libreto Rosso de Cosolini.
Bon dei ,indiferente! el tuo lavor xè zà esaustivo e toca tuti i obietivi sensibili dela comunità patòca.
A doman ‘lora,o de qua o de là ma sempre alegri mai passion viva l’A. e po’ bon!
doman son a conconel-ferlugi… no se sa mai coi zunami…
complimenti!!!si si si!!
la triestinita non xe scomparsa,anzixe sempre più forte!!
propongo la giornata della triestinita….
chi sa che diavolo vien fora
w triest w noi..
e chi che ne vol mal,ne magni le culate
E soprattutto riverzera Anita a Roian e tornerà el vecio Libero che ristrutturerà tutta l’osteria come jera una volta. Non vedo l’ora de manjarme una de patate in tecia…
Buon 21.12.2012 a tute le leggere de Bora.la!
bon, bravo sfsn. Nonostante el momento bruto, sarà un bon nadal, propio grazie a ‘sta maya (con le manighe longhe, mi calcolo).
troppo forte sai bel!!!!
sto toco de sfsn al momento lo ga leto:
3728 persone.
la fine del mondo!!!!!
Diego, te son un mito!
Podevo perderme la fine del mondo? Figon!
Aah, desso go capì perché ultimi tempi con l’omo no iera posibile parlar de altro che solo de tapi, sugheri e altri modi de tegnir serade le botilie.
Tranquilo, cumpà, go meso silicon torno tute le botilie che val la pena salvar; quele altre se le bevemo vardando el patatrac. Che ora incominza spetacolo?
Apocalise rimandada a data de destinarse. Bon dei!
Se zà in quela volta mi gavevo fato el vaticinio che “Se vinzi Cosolini” se la sugavimo…
ma in cambio dela salveza universale, propio a noialtri viva l’A.& morbin people ne toca cucarse un Sindaco che perlomeno in veste uficial ridi propio el minimo sindacal ( se e quanto ch’el ridi in privato xè bizniz suo de lu’) e che co’ xè de far festa e alegria low cost, tira fora la scusa che no xè bori e che xè robe più importanti de pensar 🙁
La prima galina che canta..orpo ciò, ma xè ‘ncora tempo fin mezanote che rivi l’Apocalise. co’ sti anunci prematuri me par che go capelà.
La prima galina che canta…meno mal che son de quei dela galina con do’ teste e se la testa dela galina mona ga cantà, la testa dela galina savia xè restada zita, pensando chi che vivrà vedarà! 😉
…che dir ? iera ssai tempo che no fazevo cussi de gusto ridade…forte , forte ….pero’ e se xe tutto vero ? mi no me fido sa !mi fazzo …din don….ML..
ciò Fiora,
ara che no basta spetar mezanote nostra: cori spetar mezanote sul fuso orario del Messico, no?
E po, co me son alzà, iera sta luce un poco strana e sti nuvoli bassi… Secondo mi la rotazion terestre se ga za fermà (che i disi che se fermerà per tre giorni), e noi gavemo avù pegola che se ga fermà co de noi xe sol: cussì ne tocherà ndar lavorar per 24 ore su 72 inveze de poder star in busta tre giorni a spavar.
Bon, stemo veder.
Saluti da Conconel – pozdrav iz Ferlugov
Sfsn ,ma Conconel/Ferlugov xè de più de PRADELTORNO paese de otozentotanta abitanti che risulta risparmià dela profezia dei Maya?
Val de più Conconel, perchè la profezia maya disi che i alieni che scenderà coi ufo se fermerà tuti in gostilna de Ferluga e i se ciaperà una mina che ghe tocherà star due giorni de più de quel che i gaveva preventivà per farse passar la s’cioka.
Disi la profezia che i ufo ghe piaserà cussì tanto la vitovska e el crudo de Ferluga che un de lori se sconderà in cantina de Martin Andolsek e cussì el resterà a Conconel co i altri xe partidi. E dopo el se sposerà con Danica Ferluga e de lori nasserà una nova stirpe: i kraski aljeni, che sarà famosi perchè i viverà 300 ani e i se nutrirà esclusivamente de Teran, Refosco e crudo (qualche vota cevapcici). Solo che i gaverà spesso mal de testa e più raramente moroidi.
@22 “Kraski aljeni” 😀 😀 😀 questa te coloca tra Asimov Tolkien e Wells !
niente, go comentà giusto per rivar a 24.
23 xe un numero tropo pericoloso in un giorno come questo…
la più bela fine che podevo imaginar: col soriso stampà tala musa de mona che me ritrovo.bisognassi che la fine del mondo capitassi più speso.
nel fratempo che se ga fermà la tera me son capotada zo dele rive,ma no xe pel contracolpo,devo cambiar oste e bicer. 🙂
grande sfsn!
@24 mejo sì, Diego no lassar tropo in evidenza quel 23…
Anzi ‘desso che me vien in amente: xè insospetabile l’autor del post 2? a volte (i Pidiele numerofili) ritornano, eh?!
Me ga fato piazer de leger questo mesagio che mio cugin me ga` manda`ieri che per noi xe za` ogi.Qua` a Sydney no gavemo avu el Zunami ma sel vien te faro` saver.
Tullio
Me gavè tirado su de morale, le feste sè tremende, per i ricordi!
Ma credeme,articolo e anche i comenti sè un meio dell’altro, el spirito sè grande!
@28 Animo, Maria! la malinconia butila in valzer, che costa companio e tra l’altro par che se la sughemo. Anca cola nova finanziaria no i ne tassa el morbìn ! 🙂
Pitosto come i farà ‘desso a giustificar la capela tuti quei corvi, chi per credulità, chi per lucro ala maledizion dei Maya gaveva credù e ghe gaveva speculà, con libri, gadgets, pacheti turistici ecc. ecc.?
ah ! carta fa zogo , à la guerre comme à la guerre e viva l’A.!
Come no xè ciaro?! e quando mai i vegenti parla ciaro… e mi de brava Sibila Cubana de sete colpi gavevo previsto che noialtri patòchi a sielgerse el Sindaco scaramantico ierimo franchi dela fine del mondo! 😉