I 1500 nuovi posti di lavoro di Gas Natural

Alora ciò, ogni volta che Gas Natural fa qualcossa xe tuti pronti a dirghe de tuto. Prima se li acusava de no gaver fato ben el studio de impato ambientale, e inveze el xe qua.
Dopo quachidun diseva che se el rigassificator fa el tiro semo tuti cagai, e invece esisti el manuale de cossa far in caso de emergenza, e se trova propio qua.
Desso i ga mandà dele cocole cartoline in zona Feriera e zona industriale in cui i prometi (ma solo una volta completata la bonifica della porzione di sito su cui sorgeTà l’impianto 😉 ) 1500 posti de lavoro l’anno per 3 anni e un aumento del PIL regionale del 0,9% e tuti zo a dirghe che i conta bale. Ciò, sè incontentabili.
Per fortuna su ste pagine semo sempre pronti a ciapar le sue difese.
Alora desso ve spieghemo ben pulito de dove che vien fora i 1500 posti de lavor anui. Tra l’altro xe posti con certificazione europea Choosy Free, quindi no stè far i soliti sofisticai.
In primis, desso sarà Gas Intestinal a gestir tuto, Gas Natural ga dito che xe stufa de voi triestini nosepolisti scassamaroni. El progeto xe comunque uguale, e xe una roba che Gas Intestinal ga comprà per la modica cifra de 2 spritz dal Monon Behavior Research Department, che a sua volta ghe lo gaveva fregà al’ideator, tale Fartolomeo Petazich (che no xe l’ultimo dei mone, xe un che ga el Master Degree in Ingegneria Idraulica con la tesi su “The effects of non-expelled farts on the pression of the urinary vescic and consequently on the distance of the pissades emitted” e che fra le publicazioni vanta robe tipo “Meteorological fart: sending away the nuvoli with big community farts. The real meaning of the scie chimiche“).
El progeto, in breve, xe che no se fa più el rigassificator, ma se produci el gas propio in loco, cussì no xe più gasiere che bagola e i ambientalisti marini no frizi più, e ghe xe anche una centrale eletrica a gas, cussì, per no farse mancar gnente e poder completar sto ciclo qua ilustrado:

Praticamente tuto inizia con la produzion dei fasoi. I fasoi vien usai come alimento nel stabilimento de produzion de gas. I lavoratori li magna e dopo i produci diretamente lori el gas. Facile, naturale e no tropo choosy. Parte de sto gas poi vien venduda, altra vien usada per la centrale eletrica de cogenerazion, che usa l’acqua del Rio Ospo cussì l’ambiente marino xe preservà e nissun rompi. Per completar el ciclo, el vapor acqueo vien incanalà con un tubo fin ala piantagion de fasoi e cussì anca l’irigazion xe a posto. Voi dirè che sta roba produci CO2, quindi inquina. E invece no, perchè la CO2 prodota xe bilanciada de quela asorbida dei fasoi.

Bon, e desso i numeri, che iera quel che ne interessava del’inizio. De dove vien fora sti 1500 novi posti de lavoro l’anno?
Alora, bisniz plen:
PRIMO ANNO:
1 che disi cossa far.
1 che ghe disi cossa far a quel che ga de dir cossa far.
1 che ghe tegni la scala a quel che ga de dir cossa far perchè el xe picio e i mati no lo vedessi.
1 esperto agronomo de fasoi, meo se furlan, ma comunque aprendista. Però che sia esperto.
1 zercador de fasoi che sapi otimizar el raporto chili ingeriti/scoreze elargite.
10 babe fighe che ghe conti un do monade ai triestini.
1485 de lori che tiri su tuti i impianti con la giusta furia.

SECONDO ANNO:
1 energumeno che difendi quel che xe de un anno che el ghe disi a tuti cossa far, perchè nissun pol più de lui.
altre 100 babe fighe che ghe la conti ai triestini visto che ormai i incomincia a napar la fregadura.
50 contadini per el campo de fasoi.
990 flatulenzieri, o produtori de gas.
10 nasascorese, o adeti al controlo qualità del gas.
349 de lori che lavora nela centrale eletrica.

TERZO ANNO:
10 psicanalisti per seguir i nasascorese, ormai in totale declino mentale e olfattivo.
1 Franca Porfirio per ricordarghe ai flatulenzieri che comunque ghe xe dele bone maniere de seguir anche nel scoresar.
1 Elsa Fornero per la campagna “And you? flatulenziere o nasascorese? Don’t be too choosy!”
1 che sapi come impizar la centrale che xe ancora spenta.
1 che sapi distudarla.
altre 1486 babe fighe per tegnir boni i triestini che intanto continua a frizer.

Sul’aumento del PIL del 0,9% poi, se trata adiritura de una sotostima. El Petazo Intestinale Lordo aumenterà ‘ssai ma ‘ssai de più.
E po’ ghe xe i famosi posti del’indoto, che nissun no li vedi ma tuti li nasa. Qual xe l’indoto condoto del progeto?
In primis, ghe sarà un programa TV ambientà nela fabrica del gas, un reality show del titolo “Il Grande Fartello” che documenterà el lavor dei flatulenzieri. E zo pila a maneta, come se vedi anche del grafico. In secondis, un poca dela piova generada del vapore acqueo pol gaver un bon mercato in Friul, che là la ghe piasi ‘ssai. Per no parlar poi dei produtori de mudande nove per i flatulenzieri, dei produtori de fazoleti profumai per i nasascorese e chi più ne ha più ne metta.
Morale: el progeto de Gas Intestinal xe una vanzada e i 1500 novi posti de lavor annui xe garantidi.
Come podè veder tra l’altro, dopo tre anni Trieste sarà ulma de babe fighe.
Quindi no stè romper dei!
W Gas Intestinal e buso i nosepolisti ambientalisti anticirianisti triestini!

Hai scritto qualcosa (o fatto foto, o video, o pupoli…) di divertente/ironico/satirico su Trieste, Gorizia e dintorni? Mandacelo al Quel dela Quela! Scrivi a manna@bora.la