La causa dello scempio in Val Rosandra

Novo contributo sul tema tanto caro dela Val Rosandra. Eco l’intercetazion che giorgio (no events) ne ga mandà via mail, che apri novi inquietanti scenari campanilistici…

Il vero motivo della rasatura a zero della Val Rosandra.
di giorgio (no events)

– Un sempio in Valle? Ma chi vien a esser ‘sto sempio?
– Ma no “sempio” per dir “mona”, scempio per dir disastro, scandàl, casin, po’: i gà tajà de tuto, mancava poco che i se porti via le travi del ponte de legno.
– Zà l’anno scorso, quei de Bolunz, i gavèva ciapà paura quando che la TAV doveva far un giro in galeria soto la vale e vignir fora per far una stazion grande a Botazzo con i scambi fin a Domio. Ma dopo che i gà cambià tuto e che i farà una stazion grande a Slivia, i gà pensà che ormai no xe de preocuparse…
– Inveze, una matina, te capita ‘sti elicoteri dela protezione-civile in campo sportivo a Dolina: smonta Ciriani e Berlasso, vestidi de Rambi furlàni e con ‘ste motoseghe e manère i va su verso Botazzo: i gà fato anche tre filmini, perché cò riva lori i se porta sempre drìo el frico e un due panoce, ma anche le cineprese, come i giaponesi.
– Ma cossa ocoreva far quel disastro o scempio! El rosandra no xe miga un Tagliamento o un Isonzo! E cossa no i sa che el cori sule piere del Carso?
– I sa, i sa, cossa no i sa in region, el motivo vero xe che Tondo e Molinaro, che xe assesor ala cultura, se gà come rabià che nele scòle a Dolina no i voleva far l’ora de furlàn.
– Ah, no i voleva el furlàn a Dolina?
– Ma no el furlàn perché furlàn, che a Bagnoli i parla anche finlandese con el paròn dela Varzila, ma propio perché no i gà tempo: lori a scòla i gà zà: italian, sloven, finlandese, inglese, aplicazioni tecniche e musica: quando i gavessi podù far altre materie? E cussì no volendo studiar el furlàn a scòla, in region i gà deciso de darghe una leziòn.
– A Mugia, inveze, cò i gà sentì de sta spedizion punitiva in vale, per pararse el cul, i gà gato furlàn obligatorio fin de l’asilo e i gà volesto organizar el festival dei fogolèri furlàni 2012: convegni, bancarele, vaporeto, alberghi e tratorie, tuto a gratis, meio che el carneval. Nerio gà dito che no’l volessi che vegni quei de la protezione-civile a verzerghe el rigasificator come sorpresa de Pasqua.

giorgio (no events)

Hai scritto qualcosa (o fatto foto, o video, o pupoli…) di divertente/ironico/satirico su Trieste, Gorizia e dintorni? Mandacelo al Quel dela Quela! Scrivi a manna@bora.la