27 Marzo 2012

Tolkien iera de Roian

Ogi qua se ospita l’importante contributo socioantropopatocologico de Andrea Rodriguez (si, quel che se sveia de matina e inveze de andar a scola el fa rabiar el sindaco :P), che sul suo blog el confronta i triestini coi hobbit. Ecco cossa el ne ilustra:

TOLKIEN IERA DE ROIAN
de Andrea Rodriguez

Mi son sicuro, ghe giurassi ara.
Tolkien iera de roian, ‘scoltime mi.
I hobit semo noi, in piena, dei.
El se vardava in giro, el rubava co l’ocio, poi ga cambiado un poco le robe cussì tanto per no farse pizigar ma semo noi.
Comincemo subito col dir che anche per noi el mondo finissi dove che finissi la contea cioè là dele colone de santa crose o aurisina che no me ricordo mai.
El resto no ne ciava sai.
”Mi no capisso quei che va ale Maldive” diseva un, bevendose un spritz al tramonto là dela baracheta del decimo topolin vardando Miramar.
Giustamente anche, diria.
Se spostemo poco, e propio se ocori.
Gavemo le nostre robe che capimo solo noi ma no ne passa gnanca per la testa che in america no i sapi cossa xe un capo in b: noi in cina ghe chiedemo in dialeto come se fossimo in bareto de ponziana poi restemo anche un poco mal se no i capissi.
Ne piasi magnar, bever, star in pase, ciacolar, dir monade, cantar.
Hobit de osmiza, diria.
Co penso ale osmize in primavera de domenica dopopranzo co vien un poco de sol e te pol star in maieta, penso ai hobit dela contea.
I hobit più veci va a barcola a caminar e là del california a ciapar sol bevendo cafè.
I furlani xe più tipo nani, che i brontola e i se da de far.
Noi fumemo l’erba pipa e no volemo far fadiga.
Come i hobit, noi semo pacifici: de base no tiremo sai longhi.
Ne piasi babar, cussì tanto per far.
Rider, far el witz.
Un bel witz ne da sodisfazion più che spacar piere.
Contemo monade, esageremo.
Gavemo ciapa’ do sariandole e diventa che gavemo mazado un drago.
Però ou.
Ou, podemo far anche quel eh.
Se xe de ‘ndar a zercar el drago, ma propio se no xe altra posibilità (tipo mandar un furlan ad esempio), alora ciapemo la 20 e andemo.
Poi magari sarà anche un poco de caminar, ma andemo.
No gavemo paura.
Un poco se caghemo in braghe, ma no ghe disemo nissun.
’Ndemo zercar sto drago per mari e monti poi lo trovemo ghe demo un do papini ghe ciolemo tuti i bori e tornemo qua a far fraia coi amici.
Che poi magari semo stadi via zinque ani ne xe sucesso de tuto semo tuti pieni de colpi de bugne mezi rovinai co la barba longa dilagnai, e te trovi sicuro l’amico quel che te disi:

”Ah bon dei, mi draghi copavo za un do ani fa e stavo sai meno tempo…”

Ciò, ou, mai una sodisfazion!

Hai scritto qualcosa (o fatto foto, o video, o pupoli…) di divertente/ironico/satirico su Trieste, Gorizia e dintorni? Mandacelo al Quel dela Quela! Scrivi a manna@bora.la

Quel dela Quela on Facebook
Tag: , , , .

9 commenti a Tolkien iera de Roian

  1. effebi ha detto:

    tolkien iera de roian, ma i fasisti voleva cambiarghe cognome e lu xe emigrado in australia… xe ora de dirla sta verità…

  2. sfsn ha detto:

    Difati gavemo anche la poesia:
    “Tre Anelli ai Re degli Elfi sotto il cielo che risplende, Sette ai Principi dei Nani nelle lor rocche di pietra, Nove agli Uomini Mortali che la triste morte attende, Uno per l’Oscuro Sire chiuso nella reggia tetra,
    Nella Terra di Mordor, dove l’Ombra nera scende. E un anello in tel cul niente?”
    Un Anello per domarli, un Anello per trovarli,
    Un Anello per ghermirli e nel buio incatenarli.

  3. sfsn ha detto:

    ops me xe saltai due versi… gnanche pel cul

  4. sfsn ha detto:

    ma i elfi xe sloveni?

  5. Sandi Stark ha detto:

    Me piasi el gergo dei muloni giovini, me sta anche ben “ou” piutosto che “ciò”.

    No me piasi tanto “chieder”, perchè chi pensa in triestin no se sognassi mai de pensar “chieder”, che xe parente de “scender” e de “salir”.

    So che “chieder” se dopra sempre de più, ma go fato indagini e parti da quei che pensa in italian o in sloven e dopo i traduci in triestin.

    E xe anche un “poi” sospetto de resentamento. Apprezzabile “vardava” inveze che “guardava”, ma ancora più patoco saria stà “cucava”; “chibizar” xe per i spioni.

    “Brontola” podessi esser “rugna” o “frizi”, ottimo inveze el “pizigar” piutosto che el resentà e generico “ciapar”. Una vecia boba forsi gavessi doprà “trapà” o “blindà”, ma no stemo farghe la tapun ai zistron, el stile xe stile, e Rodriguez ga un dobro stile morbinoso DOC.

    La Clapa dei Baziloti Patochi per la Difesa dal Resentamento, che son solo che mi, ghe da un bel 8 a Rodriguez in triestìn patoco.

    El mulo prometi ben ma el bifla poco niente, altrimenti el podessi ciapar 10, 15 o anche el 20 per andar a Muja. La Clapa ghe consiglia de andar in osmica almeno 2 volte a la setimana, e de rememarse ogni tanto con vecioni domaci de bona voja.

  6. aldo ha detto:

    @4

    I elfi xe biondoni/e altissimi/e e magrissimi/e: adeso i lavora tuti nele sfilate

  7. Andrea Rodriguez ha detto:

    hahahahaha sai sai bel el comento de Sandi!
    hahaha

  8. dimaco il discolo ha detto:

    no volesi dir, ma secondo mi iera più de S.Giacomo l’omo.

  9. Bracco ha detto:

    No volessi dir, ma xe le 8:15 e qua xe tutto l’ufficio che ridi!

Lascia un commento

Il tuo indirizzo email non sarà pubblicato. I campi obbligatori sono contrassegnati *