Trieste-Budapest ciclodiario 8: l’arrivo nella capitale ungherese, dove no se bati broche

Qua le puntate precedenti

“Bon muli, semo rivai. No vedo grossi festegiamenti, come xe?”. Pasta ne fa notar che no stemo acompagnando el nostro ingresso a Budapest da nessun tipo de entusiasmo.
Co’ te parti con la bici fissandote una meta, forsi el modo giusto de descriver el tuo viagio xe “vado verso Budapest in bici”, e non “vado a Budapest in bici”. L’arivo decreta sempre la fine de qualcossa, in questo caso dela tua simbiosi con la bici. Quela che fin ‘desso iera la roba più importante che te gavevi, dala quale te fazevi fadiga a separarte, anche de sera co te dovevi serarla in qualche garage o pezo lassarla nel cortil del’hotel orfana dei borsoni, che in un lampo se trasformava in banali bagagli. Ala fine del viagio, la bici se senti pian pian portar via el suo ruolo de fedele compagna, e presto la se incupissi. La libertà de cui la godeva su spazi più grandi vien presto sostituida dal trafico, dai marciapie carighi de gente, dai semafori da rispetar. E anche ela, da strumento de libertà, se trasforma presto in una limitazion. Se te vol visitar e viver fin in fondo la tua meta, te devi trovar un posto dove lassarla, dove farla riposar. E dove negarghe, in fondo, la condivision dela parte finale dela tua storia.
E infati quatro ani fa, co’ semo rivai a Berlino, semo partidi el giorno dopo, per pranzo. Senza che nissun de noi se lamentassi de no gaverla visitada, de esser rivai fin là per poi no godersela almeno un poco. No ne xe gnanche passà per la testa. Semplicemente, la meta no fazeva parte del viagio. Idem sto giro, l’idea iera quela de partir col treno del giorno dopo. Ma poi la magia de Budapest ga fato andar le robe diversamente.
L’ultima tapa xe infernale. Le strade inizia a esser molto afolade. Machine, camion, asfalto. Sol. Gavemo ciapà sempre sol in sto viagio, semo stai molto fortunai. L’abronzadura del brazo destro testimonia el nostro continuo inceder verso est. Sul selin, anche col sol a pico, no gavemo mai patì tropo el caldo. I boschi, i fiumi e el vento ne ga sempre dà una man. Ma qua xe de sofigar. Sula strada te podessi frizerte un ovo. La temperatura ragiungi livei insoportabili e la testa esplodi.
Ancora una volta, un fiume vien in nostro socorso. La ciclabile sul Danubio giungi come una benedizion.

E noi marchemo el teritorio. E se bevemo l’ultima Radler on the road.
Arivemo a Budapest verso le 17 de pomerigio.
655 km. Meno che per andar a Roma, in realtà. Ma la distanza mentale xe abissale. Me ricordo che de muleto, co’ in stazion un mio amico me ga dito “stago andando a Budapest col treno”, mi go pensà che el me ciolessi in giro. A Budapest? In treno? Partindo de qua??? Me pareva che el stassi per andar a Pechino quasi. E invece poi te scopri che quel treno, senza tante pause e pausete, podessi rivar a Budapest anche in poche ore. Che no saria afato mal.
Grazie ala Lonely Planet de Cionn, trovemo un apartamento fantastico, el Garibaldi. 25 euri a testa, in pieno centro, con posto dove lassar le bici senza problemi giorno e note. Edificio fatiscente, aredo ‘bastanza vintage, ma per noi xe oro. E la siora parla anche italian. Andè via doman? Ma sé mone? Domani xe Santo Stefano, festa nazionale. Sarà tuta l’Ungheria che riva qua, e voi andè via. La ne ga messo la pulce int’ela recia.
E poi via, giusto el tempo de notar che qua i autobus va anche in acqua a far svise, e se fiondemo ale terme de Szecheny.
I nostri principali mezi de trasporto torna a esser i pie, coadiuvai ogni tanto dale metropolitane. A Budapest le funziona ala grande. La machina te pol dimenticartela. Provemo a farse el biglieto con una machineta. Eco, forsi sule machinete i devi ancora lavorarghe un poco su. Metemo la banconota. Struchemo un do botoni. Compari mile opzioni. Volemo 4 biglieti giornalieri, dei. Va ben, ma te devi rifar el stesso giro de botoni 4 volte.
A pochi click dala fine, la machineta se stufa e ne disi che nosepol. Quindi ve torno i soldi e moleme. Però ve li torno in monedine. Una cascada de monede che gnanca el jackpot al casinò. Ala fine risolvemo col caro vecio biglietaio in formato umano.
Le terme de Szecheny xe fantastiche. Entremo che stà quasi per vegnir scuro. Xe enormi. Tuto un edificio, quel dove te entri, servi solo come spogliatoio e poi per robe tipo massagi che noi no gavemo fato. Poi xe tuto el cortil al’aperto, con do vasconi uno a 38° e uno un poco più fredo, dove te se senti in paradiso. Xe anche i famosi veci che gioga a scachi, chissà se li ga messi là l’ente turismo o se i va zogar per bon. Nel vascon più fredo ghe xe una corsia circolare dove se forma un poca de corente che te fa girar intorno come un criceto. Una grande ocasion de socializazion, tra sburtoni e spalade. Xe un grupo de spagnoli che se diverti ssai a far casin.
Nel’altro edificio interno xe ancora più vasche, più pice ma più varie e spuzolenti, ogniduna con una caratteristica diversa. Xe quela al zolfo, quela al qualcoss’altro e infine quela, verdastra, in cui xe scrito “se entrè sé voi responsabili, ocio de soto” e che spuza de fogna. Responsabilmente semo entrai, ma iera freda e semo scampai. Poi do vasche, una a 20° e una a 40°, una di fronte al’altra. Il tuto rigorosamente no clanfing zone. De perderse. Deludente invece la zona saune, ma ne par che qua no le ghe interessi ssai, i preferissi star a smoio intel’acqua.
Uscimo che xe ormai le 22. Semo afamai. Incontremo finalmente Ivan Curzolo, esperto Boralaiano de Budapest e del’altra testa dela galina (definizion de cui el detien el copyright), assieme al suo amico Sebi. I ne disi che xe tardin per magnar ungherese. Dunque, as usual, magneremo qualcosa de diverso dal gulash. Sto giro magnemo serbo, se sparemo una pljeskavica e un formaio grigliado memorabili. Riasumendo: al quarto giorno in Ungheria gavemo totalizà una cena belga, una italiana, una serba e una ungherese.

Guadagno la stima del mulo al banco quando ghe digo che voio la bira ungherese e no quela ceca. Tra una ciacola e l’altra, le bire scori ssai veloci. Ivan ne conferma che in Ungheria la maggioranza dela popolazion xe feminile. O forse i omini vivi nascosti de qualche parte. Anche stasera intorno de noi la magioranza xe hungaronacici. Ordinemo l’ultima bira, quela “da viagio”, da sorsegiar mentre te se sposti da un’altra parte. Brindemo e batemo i biceri sul tavolo. Sebi ne spiega perché qua se fa cussì. Nel 1849 o ciapilo, dopo i moti rivoluzionari, i austriaci gaveva condanà a morte 13 generali ungheresi, festegiando poi l’esecuzion bevendo e batendo el bocal. I ungheresi, che no la gaveva ciapada tanto ben, gaveva alora fato el voto che per 150 ani no i gaveria più brindà batendo el bicer, ma solo sbatendoli sul tavolo in segno de protesta. Voto che efetivamente xe stà rispetà. I triestini invece ga fato missiot, bati biceri, bati sul tavolo e viva l’A e po’ bon.
Arivemo a Godor Klub, logo de ritrovo dela muleria costruì sule fondazioni de un Teatro mai finì. Presto ne xe bastanza ciaro che stasera l’imbalinada xe ormai ireversibile. Bon, tanto semo a pie. Concludemo la serata con una storica Dreher + palinka traditrice finale, poi se incaminemo nel tentativo de trovar la strada del ritorno.
Se sentimo in totale armonia con Budapest, e se lassemo avolger dala sua atmosfera magica senza opor resistenza. Forsi a farne sentir cussì xe l’efeto dela Dreher, elemento de union tra Trieste e la capitale ungherese ai tempi dela defonta.
Trovemo un zogatolo: un muro de cubi colorati, con cui chi vol pol compor quel che ghe gira.

Lassemo el segno del nostro passagio. Ne vien anca mediamente decente, incredibilmente.

Orgogliosi dela nostra opera, sentimo el bisogno de condivider ancora de più la nostra triestinità imperiale: comossa, parti una marinaresca. Chissà se magari qualche vecio la ga mai sentida. Ma a noi in fondo ne basta che sia la cità stessa a sentirne e a emozionarse. Ormai xe ciaro che doman no partiremo, ma resteremo con ela ancora un giorno.

I mononici ciclisti riva finalmente a Budapest. Struca per veder più in grando dei. Pupol by Michele Zazzara

No riva seciade per fortuna, ma qualchidun ridendo ne disi de cantar un poco più pian.
Salimo a casa. Xe chi zerca de teletrasportarse in busta

e chi che se zerca e basta.

Cionn, che evidentemente gaveva qualche marchingegno tecnologico per no imbriagarse, ne prepara un tè per tuti. E questa xe una piacevole scoperta. Perché se co’ te seri i oci la stanza gira, vol dir che xe longhi e te se pol arender liberamente al tuo destin: game over e domani hangover. Poi chissà se la ghe gira a tuti uguale. Saria de far un studio su sta roba. Senso orario o antiorario? Magari se te se imbalini dal’altra parte del’equatore cambia giro. Quindi forsi se te stà esatamente nel’equatore te son a posto. Comunque, el tè ne salva. La stanza de colpo ritrova el suo baricentro, e el giorno dopo saremo (quasi) come novi, pronti per la festa de Santo Stefano. Lunga vita al tè salvifico e ala meravigliosa Budapest.

Distanza 78.7 km
Media 18.4 km/h
Tempo pedalata 4 h 16 min

Tappamappaltimetria by Eric Medvet