23 Agosto 2011

In bici da Trieste a Budapest: diario di una rumizada estiva

Via. Una setimana via. Serar baraca e buratini, o meio, lassarli che i se zoghi ‘vanti da soli int’ela baraca e che magari i te prepari una sorpresa per el tuo ritorno, cior in man la bici dopo 2 ani che la iera imbusada in cantina a ciapar polvere e partir, savendo che per sete giorni la sarà in totale simbiosi con ti, e i tui pensieri poderà corer liberi senza nissun scoio in mezo, esatamente come le sue riode scivolerà veloci sula strada.
Ma andemo con calma.
Diversi ani fa, che poderia esser dieci come cinque, mi e Eric Medvet se ierimo fati una promessa: ispirai dala rumizada ciclistica de Rumiz, se semo diti che entro i 30 ani dovevimo far assolutamente qualcosa de simile, con le dovute proporzioni, oviamente. Per el giusto rispeto, se Rumiz a 50 ani iera rivà fin Istambul, noi a 30 dovevimo far qualcossa tipo 3/5, no de più. E visto che el nostro rispeto per el mulo Rumiz iera ssai ma ssai elevato, gavemo fato ancora meno de 3/5. Ma solo per rispeto eh, credeme 😉
Insoma entro i 30 ani se disevimo, perché co se xe muleti se pensa che a 30 nassi qualcossa che te fa entrar nel mondo dei veci, dele responsabilità, dei xe longhi e dei nosepol. In realtà, poi co te bagoli intorno ai 30 te se acorzi che te son più giovane de prima, perché da “vecio adolescente” te passi a “giovane adulto”, che volendo xe anca meo, perché te ragiungi la consapevoleza de gaver tute le carte in regola e la piena potenzialità de far qualcossa de bel per ti, per i altri e per la tua cità, a meno che no te gabi voia de lassarte andar nel nosepolismo cosmico. Poi te ga de zontar anca che fra disocupazion, precariato e lavoreti post-laurea o pre-work-experience o know-how-ciaping o young-with-great-experience-cumuling, tanti dela mia generazion una setimana libera no fa ssai fadiga a trovarla. Poi, se te lavori, te scopri che esisti anca le ferie, per cui in fondo in fondo l’unica roba da valutar xe se ti dopo i 30 te se senti ancora muleto, con la voia de sligarte un poco dale certeze che te ga intorno e veder cossa nassi in giro.
E cussì, a 32 ani, son ormai ala terza rumizada, dopo Berlino e Monaco passando per el Grossglockner (sempre rispetando la regola rispetosa dei 3/5, podessimo ciamarle subrumizade o rumizadine), Eric ala quarta.
Qua però me par che stemo andando longhi. Alora femo che sarà un diario a tape, se no ve vien l’indigestion e ve stufè de leger.
El bel dela bici xe che la te vol sempre ben, anca se te se la lassi in cantina per do ani. No la ga la cognizion del tempo, per ela co te torni se riprenderà dal’esato punto in cui te la ga lassada là e, fata la dovuda manutenzion, la sarà pronta ed entusiasta de partir, come sempre.
Prima go parlà de simbiosi con la bici, però fondamentali xe anca i compagni de viagio, coi quali te starà in contato 24 ore al giorno. Sto giro semo partidi in cinque, un grupo notevolmente eterogeneo.

Iera el za nominà Eric, Erich pei amici, ricercator che sbisiga con computeri e internet al’università, cultor de qualsiasi roba che gabi botoni o inizi per “Google”, sprinter de orgoglio e otimo imitador dela parlata furlana e napoletana, utile co te ga de usar i luoghi comuni sui italiani a tuo favor. Gran cultore dela civiltà austriaca ala facia de quela ‘taliana, co el iera nela civilissima Viena ani fa i ghe ga ciulà la vecia bici e cussì ga dovù comprarse una nova. Ma xe stà sicuramente un napoletan otimo imitador dela parlata austriaca.
Riccardo Ferrari detto Cionn, altro ingegner, anche lui in piena con machinete, botoni e qualsiasi roba tecnologica. Cionn xe el nostro Data dei Goonies (ve ricordè?). El panelin fotovoltaico no serviva per pedalar più veloce, come poderè magari pensar, né per tegnir in fresco le bire, come che ne ga chiesto un mato per strada, ma servi per carigar le baterie che poi servirà per far funzionar el gps o el celular o qualche altro aparechio che forsi el ga tegnù in sconton, tipo el pugno che vien fora dala panza che anca Data gaveva. Poi in vista tacà sula borsa ghe xe el scotch da competizion, che xe stà fondamentale per copar la dinamo ribele che voleva a tuti i costi star acesa. Cionn tegniva agiornada la sua pagina twitter, face book e un blog lungo el percorso, per cui tanti ga podù seguir el nostro viagio in direta. E mi go dovù cior meno apunti perché tanto scriveva lui 😛
Lori due iera el nucleo originale che ga pensado a sta rumizada, ga studià le tape, el percorso, el profilo altimetrico. Insoma le menti.
Poi, a due giorni dala partenza, perché le robe va ben ponderade e xe de prepararse per tempo, se semo agregai anca noi altri (la muleria che fa sempre tuto al’ultimo momento perché no i ga un poco de quel che se ciama):
Stephane Pasticier, Pasta, un dei primi e dei ultimi scienziati interculturali sula facia dela tera, quindi l’ambassador studioso dei popoli e dei saperi incontrai, gran cultor de tuto quel che xe televisivamente trash e dei personagioni che se pol becar per strada, sui quali assieme al’etologo del grupo el ricostruissi tuto el background passato e futuro de quel che el mato fa nela sua vita.
Mi, el scienziato biologico, quindi naturalmente sano come tute le robe bio, a parte qualche porcheria dovuda ai fumi dela feriera. El mio ruolo quindi saria quel che comunica al grupo: “Ou, vardè là che figada: Anas platyrhynchos ciò!”. Ma ultimamente me son specializà in monade, per cui go preferì terorizar el scienziato interculturale con le storie dele pericolose punture de inseto endemico dela slovenia che te meti i ovi dentro la pele e dopo i vien fora co i senti aria de mar, quindi a Trieste co torneremo, ma no prima de gaver rilascià una tossina che causa difunzion eretile, o con la storia dele spore del verme solitario che vien fora anche co’ un scoreza e che quindi xe de star atenti co’ se se meti in fila in bici, perché se te nusi la spuza automaticamente dentro podessi eserghe anca una spora, che poi dai polmoni passa con l’enzima trapanasi al’intestin, e là xe longhi bruti.
Ultimo, ma solo perché lui se ga agregà adiritura un giorno prima, Michele Zazzara, el bassista dei Trabant, pupolator fra le altre robe dei Mononi Behaviori. Quindi el nostro Altan. Ore 18.30 del giorno prima de partir. Me sona el telefono: “Cachio, go butà un ocio ala bici, go la rioda sbusada!!!! Ciò, xe tuto serà, xe tuti in ferie, semo cagai!”. Ghe go portà la camera d’aria per le 19 e ciapilo. Poi el xe andà a sonar al concerto a Staranzan. La rioda la gaverà montada mentre el sonava el basso al concerto. Poi, dopo 4 ore de sonno, el xe partì con noi. Con una dele sache da bici più bele che se pol trovar sul mercato.
Bon. Prima puntata del diario, e no semo gnanca partidi. Me par ben. Ala prossima!
Eco almeno el video de come passemo el confine fra l’entusiasmo dela fola. Video de Federico Manna. El voleva zontar le ridade al posto dei aplausi, ma no el gaveva el file 😛

Tag: , , .

71 commenti a In bici da Trieste a Budapest: diario di una rumizada estiva

  1. Giorgio Davanzo ha detto:

    Non so perché, ma mi è venuto in mente questo:
    http://www.youtube.com/watch?v=che3_xqCNrg

  2. dimaco ha detto:

    eco chi iera quei cocai che go quasi stirà in moto. 🙂

  3. aldo ha detto:

    Foto e video di propaganda per il popolo…

    sembra che la CIA abbia le prove di un viaggio fatto con tutt’altro mezzo e non proprio da soli:

    http://budapestfun.hu/festa_di_addio_al_celibato_e_al_nubilato_a_budapest/noleggio_limousine/fotos/?c2_4_gogallery=5217

  4. ul laghee ha detto:

    ciò, ma è il bassista dei TRABANT che ha la maglia della nazionale sponsorizzata SKODA?
    e Capitan Harlock lo avete lasciato ad annusare i fumi della ferriera?

  5. Diego Manna ha detto:

    aldo, no semo andai in quele limo (ma sta per limousine o per limonada?) perchè nei sedili in pele ghe xe squasi sicuro i ovi de un vermo endemico ungherese che se ativa col caldo (e là, se te va, dopo un poco fa caldonononon) e te entra atraverso el bunigolo ragiungendo presto i muscoli dele gambe, de cui el se ciba, e dopo no te pol più pedalar.
    la natura xe ssai cativa se la vol.

  6. ul laghee ha detto:

    ps x fiora:ta see sempar la migliuur….anca dopu i ferj!!speremm però che i quatar moschettieri nagan innanz amò un quai ann a faa indianad stile amici miei!

  7. Diego Manna ha detto:

    @5: no, xe erich quel. el bevi ssai lasko e lasko dà la skoda 😉
    el Felis domesticus melanico ga dito che el saria vegnù volentieri, ma el xe ancora drio studiar se pedalar con le zate de drio o con quele davanti.

  8. ul laghee ha detto:

    mi pareva un controsenso….con la lasko pivo invece la skoda và a nozze!!se il melanico è indeciso su quali arti usare, consiglialo di fare come Cancellara!!

  9. Fiora ha detto:

    @7 tropo bon ul laghee!…e co te ghe da del tuo slang autoctono te me scadeni el morbin 😀

  10. Max TuttoTs ha detto:

    Diego, no te gavevi paura che de note con la luna piena ve ciapi el famoso “lupo magiaro”?
    Se no sbalio xe quel baterio endemico che colpissi solo i ungheresi e li trasforma in lupi le noti de luna piena

  11. Fiora ha detto:

    ah!E mi che rido sempre de tuto ,se vedi che stago diventando de puina, ma pensando al spirito del’iniziativa, ala fadiga, ala sola ricompensa per l’impegno, cossa volè che ve digo
    me beca comozion , sindrome del atimo fugente e al 1 ghe posto “FANDANGO”.

  12. dimaco il discolo ha detto:

    mi penso che i sperava de farse ciapar da qualche lupachiotta magiare. magari anche più de una

  13. dimaco il discolo ha detto:

    ma penso che ghe stava ben anche una maialina 🙂

  14. Katja ha detto:

    Bela(bartok) muli!

  15. Eric ha detto:

    Che bobe che semo!

  16. Michele ha detto:

    Me son quasi` pissa` in dosso dele ridade co go visto la foto de Zazzara col zaino invicta taca drio la bici. Bravi muli.

  17. Fiora ha detto:

    @13/14 SSST! che no legi qualche morosa 😉 ….e volè che no lo paro in colegio a quel impunì de Dimaco? 😀

  18. dimaco il discolo ha detto:

    oviamente parlavo de visite a qualche zoo riguardo ale lupachiote e de grigliata per le maialine. i disi che in ungheria xe bone 🙂

  19. ul_laghee ha detto:

    @12 bhe in effetti la prima puntata della saga è così commovente che il brano di FANDANGO è perfetto!vediamo se alle prossime puntate avrai più ragione tu o il dr. davanzo con FANTOZZI!!eheheheh!!!!

  20. Luigi (veneziano) ha detto:

    No go capìo ben l’ultima parte: se boni o no de taconar ‘na camera d’aria co tacon e mastice?

    Luigi (veneziano che va in bici da milanta ani e ghe piase tuti quei che va in bici, parché xe el modo più bel de moverse par el mondo, a parte i pìe)

  21. Fiora ha detto:

    @19 FANDOZZI , ul_laghee! Morbin oblige 😉

  22. dimaco ha detto:

    mi li detesto qui che gira in bici. no ga la bencheminima educazion e totale disinteresse nel codice della strada. certe volte gavesi voia de pasarghe sora con la moto almeno 3 volte.

  23. Fiora ha detto:

    @21 per i distrati. FAND-OZZI No xè un refuso ma l’inesto de Fandango con Fantozzi!
    e no xè cussì la vita?! 😉

  24. Fiora ha detto:

    @20 uè bentonado Siorìa! ti se riposi qua de noi o te se ga zà intortà ‘ntel seriousthread dei acorpamenti, che con un per de aporti dei tui, schizè a mille de balin, roba che “se vinzi Cosolini” diventa de diletanti?! 😉

  25. chinaski ha detto:

    @luigi#20

    ara che no servi piu’ el mastice. xe za ani anorum che i ga inventa’ i taconi adesivi. el lavoro vien piu’ pulito, e se se risparmia i porconi (che per un catolico come ti xe una roba importante)

  26. DaVeTheWaVe ha detto:

    @dimaco: sempre pronto a far de tutta l’erba un _fascio_…

  27. Luigi (veneziano) ha detto:

    @ chinaski

    Taconi adesivi? Roba da signorine, e se po’ te capita – come xe capità a mi – de teginrle nel sotosella par do ani, el momento che te se sbusa la roda e ti le tiri fora xe deventae un blocco de marmo…

    A proposito: doman vado a rifarme el giro dei quattro passi (Pordoi, Sella, Gardena, Campolongo): se qualche baldo cavalier triestin-furlanico vol agregarse, l’apuntamento xe ad Arabba a le 08:00…

    L.

  28. Luigi (veneziano) ha detto:

    A ogni modo, a scanso de problemi mi oramai me porto sempre drìo i taconi, el mastice e do camere d’aria nove de balin.

    L.

  29. chinaski ha detto:

    luigi, te ga mai prova’ a veder cossa diventa el mastice se te lo lassi un par de ani soto el sellin? scena tipica: sbuso, tiro fora i feri, smonto la rioda, cavo fora el budel, ciapo el tubeto del mastice e el xe duro come el hudič. parti rafica de porconi, e penosa atesa de un ciclista a cui mendicar un poco de mastice o un budel novo.

    taconi adesivi forever.

  30. Luigi (veneziano) ha detto:

    @ chinaski

    Go provà de tuto. Pensa che el primo giro “strong” che go fato xe sta nel 1984: gavevo 21 ani. Partenza da Venezia co tende al seguito, dopo vari “tour” rivemo al Tonale, smontemo da le bici, ciapemo el zaino che intanto gavevimo spedìo, femo ‘na settimana su e zo par el giazzer del Tonale, andemo zo, rispedimo i zaini, rimontemo in bici e tornemo a Venezia pasando par Stelvio, Gavia e ‘naltra scravasada de passi.

    Quel ano so cascà do volte, e ‘na volta el me amigo Alberto me ga rimesso a posto el serciòn – che gavevo piegà – co ‘na piera rancurada par tera e el tiraraggi.

    Diese giorni fa go rifato – dopo vinti ani – le Tre Cime dopo eser montà sul Tre Croci. De boto ghe lasavo le straze. Quando Diego scrive dei trent’ani, alora ghe digo che se ga la fortuna de mantegnirse i amici co lo spirito giusto, alora ti va avanti almanco fin ai 48 ani (la me età) nel stesso modo.

    Ai 50, volemo andar a cazzeggiar sui Pirenei. Fa ti…

    L.

  31. capitan alcol ha detto:

    Anche a me piace la bicicletta ma dio mi guardi dagli invasati in tutina aderente e caschetto che a manipoli infestano le strade ogni domenica mattina convinti di vivere una settimana in più per ogni chilometro lanciato sullo stradone della mainizza.

  32. Fiora ha detto:

    Ara ti! ‘verla savù prima ch’el Venesian el iera anca ciclista…umano come dir! 🙂

  33. ul_laghee ha detto:

    @fiora twentyfive. ok ok hai vinto! triestin troooopo patocco per il mio cervellino laghee;non gò capì un czz(o quasi) del tuo post.eheheheh.alura ta rispundi in lacustre(laghee)! goo già pusàà asee de vialter(tri setimann);adess sun turnaa in patria ma venerdì sunt ancamò a Opcine, Filtri e dintorni(I suppose)!

  34. Luigi (veneziano) ha detto:

    @ ul_laghee

    Credo che Fiora nel suo #25 si riferisse a me. “Siorìa” sarebbi io, if don’t sbaglio, e il suo messaggio significa: se tu (io) ti metti a polemizzare sui thread più seri di questo blog, allora si punta al record di commenti…

    L.

  35. dimaco ha detto:

    @32, non se mi stanno davanti mentre passo in moto. la loro prospettivadi vitasi accorcia drasticamente.+)

  36. Paolo Stanese ha detto:

    Veramente figoni! Ma presto ve conterò de fenomeni che fa una vacanza ancora più inconsueta… i xe rivai in francia A PIE da Milan rucando un careto della spesa… un dei 3 xe de Trieste!

  37. Katja ha detto:

    Quel sentà nel carel?;-)

  38. Fiora ha detto:

    E per i diriti de Rumiz sul termine “rumizada” come ve se acordai? mi penso che con tal signor basti un, do’,tre 😉 Mononi più un Libreto Rosso e ‘vanti a rumizar a biondo dio!

  39. Fiora ha detto:

    @35 confermo Siorìa ilustrissima, parola per parola.
    D’altronde, deve nascere chi ti becca in castagna a te!

  40. Fiora ha detto:

    @ul_laghee per completezza d’informazione ti comunico che il demenzial thread “Se vinzi Cosolini” punto di partenza della composita opera ” El libreto rosso de Cosolini” di Diego Manna&autori vari, tuttora nelle più alte posizioni settore saggistica, ha totalizzato 1095 (millenovantacinque !)post.

  41. dimaco ha detto:

    1095 post, che per inciso xe l’età stima per difeto de una certa signora de nostra conossenza che ga ontribui non poco a crea quel libreto. 😛 😛

    e vai altro colegio 🙂 🙂

  42. Fiora ha detto:

    @42 che colegio mai! de eser come l’araba fenice mi me garba! Milenaria sì ma 92/65/92 e questi no xè i numeri farlocchi del Pidiele, caro mio! 😉

  43. dimaco ha detto:

    cidenti fiora te son de magnar.

  44. DaVeTheWaVe ha detto:

    @43 Fiora: 92/65/92? perbòn? no te sta millantando, vero?
    fàne veder, senò no credemo!!

  45. dimaco ha detto:

    te podessi far la ministra e te mandi la foto a silvietto nostro.

  46. aldo ha detto:

    Fiora: Miss Motors e Miss Maglietta Bagnata

    http://www.savonanotizie.it/scheda.php?idart=10925

  47. Fiora ha detto:

    misure vitali garantide e qua xè chi pol confermar 😉 ma stato civile e anagrafe rema contro… e ‘ndemo vanti col morbin SUPER PARTES

  48. Fiora ha detto:

    ah…per no turbarve i sensi e lassarve lucidità per post inerenti el tema “RUMIZADA”, posso sempre dettagliar che le misure 92/65/92 corispondi a statura, circonferenza dela testa e numero de pie… 😀

  49. ul_laghee ha detto:

    @fiora 41 anzi 92/65/92.
    anche se ero in ferie e non ho partecipato, ho poi letto e gradito la tenzone letteraria del “se vinzi Cosolini”.mi girano le palle di non aver avuto il libretto rosso in regalo!!!ahahahah! sperèmo nel libretto sull’incorporazione ud-ts!!

  50. Fiora ha detto:

    @50 in regaloooo? e a che titolo superU? se ga lavorà come mussi per rivar a 1095, cos’ te credi?!
    E col morbin “lacustre ” che te se ritrovi te pol sempre recuperar ala grande e meterte in nota pel cadeau in caso de publicazion futura!
    😉

  51. Fiora ha detto:

    …el Libreto in regalo al foresto…ah, come che disemo sempre…a noi meloni i ne porta via tuto…MENO CH’EL LIBRETO, PERO’! 😉

  52. dimaco il discolo ha detto:

    anca mi son foresto e go il libreto roso de csolini. consgnado de persona e pobon. lo portero in colegio

  53. Paolo Stanese ha detto:

    Katja – facile che el mulon sia quel nel caro… Maja – BELLA storia! El mondo xe pien de robe de contar!!!

  54. Katja ha detto:

    🙂

  55. Fiora ha detto:

    @54 Ti te ga i tui meriti, per detignirlo, el Libreto. xè altre le tue intemperanse….
    Sta ‘tento in colegio coi preti lanfur. Scondilo soto el pajon, che prima roba i te lo requisirà!

  56. Fiora ha detto:

    Uè, “Ma dove vai ,bellezza in bicicletta?” ‘ndo te son? Ripeto la domanda, ma col grande Paolo Rumiz come ve sè messi d’acordo per l’uso del termine ” RUMIZADA” ?
    Cossa? a gratis?! Un Grande, pò!

  57. Diego Manna ha detto:

    @58:
    dopo attenta riunione aministrativa in quel di Budapest, gavemo deciso che si, che utilizeremo el termine “rumizada” senza chiederghe soldi per la publicità oculta
    😛

  58. Fiora ha detto:

    Te ga ragion Diego! in termini de popolarità ti te son come re Mida. Te trasformi in oro ,là che te tochi.
    Cussì per Cosolini che ala fine… ga vinto! ;-D
    Cussì per Paolo Rumiz, che grazie a sta tua “rumizada”, xé una volta de più ricordà anche per i sui meriti de…. ciclonauta!

  59. ufo ha detto:

    Ma povero Rumiz! Ma ve par bel? Savè cossa, demoghe almeno un contentin, un qualcossa…

    Femo cussì: visto che l’omo (santo ma no subito) el ga pena pubblicà su Repubblica un toco che parla de Trieste – e che noialtri no ne savemo niente, visto che el bugiardel (chi sa perchè) ga boicotado – me par un bel pensier e me sembra de farghe una roba cocola visando i triestini che l’ultima opera de Rumiz la se la trova qua.

    E bon, xe anca vero che no centra con le do riode – e vol dir che per espiar desso vado ciorme una pizza in bici invece de consumar benza… Pol bastar? No volessi finir in colegio, o farme zigar.

  60. dimaco ha detto:

    prosimo ano vado anca mi on i ciclisti patochi. ghe vado drio in moto. magari ghe fazo de sponsor con una scrita cussì:

    quwsti sono triestini. li vedete’ alora fermaatevi a gorizia che vi va meglio

    e soto il nome dela mia dita.

  61. dimaco ha detto:

    ufo in colegio vado solo mi. siora fiora (92-65-92 che no xe el numero de telefono) la me vol mandar in colegio dai lanfur.

  62. Diego Manna ha detto:

    @62: fata!
    se acontentemo che te ne paghi i bilieti dei treni per el ritorno.
    volemo vederli prima però, che se no za vedemo che te ne la conti e te ne lassi là 😀

  63. Fiora ha detto:

    @63 no,Dimaco mi iero squasi in parola cola Badessa Pobona dei nostri. mancava quel detaglio dei lavori de scova e te podevi preparar la valigeta, col Libreto, tuto pulito e in masimo ordine… no iero mi che te volevo mandar mi in colegio dei lanfur…. Va ben corezion, ma co’ xè tropo xè massa!….xè lori che oramai cola scusa dela provincia se missia ‘ntei afari nostri.
    Fin quel che se ciama i vol meterse a insegnarne!

  64. dimaco ha detto:

    @63 no problem, seriamente anche ma portè la bandiera de Goerz e no la panocia furlana travestida de alabarda triestina. se te vol contatarme chiedighe a analisa come far.

  65. Fiora ha detto:

    ciò Dimaco , dà pase con quei numeri, ah! una povera nana alta novantadò zentimetri con sesantacinque de pie e novantadò chili de peso, no se pol miga remenarla tropo, sa!? ;-D

  66. Diego Manna ha detto:

    @66
    mitico!
    el prossimo giro pensemo ala scandinavia…next year 😉 se faremo vivi! 🙂

  67. dimaco ha detto:

    ve scandinavio mi. 🙂 si sponsorizza gitarelle e rumizade solo all’interno dei confini dela defonta.
    scherzi a parte la cosa SE POL far.

  68. Siani ha detto:

    ciò, ma ghe gavè dà un cambio a eric o el ga tirà el grupo fin budapest?

  69. Riccardo Ferrari ha detto:

    Grande Diego, el paragon con data e i goonies me ga’ commosso 🙂

    Se vole’ gavemo un altro per de video su iutiub, partenza e arrivo:

    http://www.youtube.com/watch?v=8SYIrcvR4EQ

    http://www.youtube.com/watch?v=vs6Qh_DuK18

Lascia un commento

Il tuo indirizzo email non sarà pubblicato. I campi obbligatori sono contrassegnati *