9 Gennaio 2011

I mille piacioni del Quel dela Quela

A un ano e ciapilo dala prima puntata del Quel dela Quela, xe rivado el momento de far el punto. Cussì giusto per far come i veri che fa tipo le trasmissioni “behind the scene” con la musicheta epico/malinconica. L’ocasion ariva dal ragiungimento dei 1000 piacioni (quei che ga strucà su “mi piace”) sula pagina facebuk del Quel dela Quela. Tra l’altro semo tardi, ormai xe za a 1050 🙂
Bon insoma questa puntata autoreferenziale servi a ringraziar un poco tuti quei che in sti mesi ga fato qualcossa per la rubrica: quindi tuti i colaboratori volenti o nolenti e tuti i letori, quei che se diverti ma anca quei che no se diverti. E bon dei, anca chi che no ne ga pel popi ringraziemo, cussì femo l’anplein!
El Quel dela Quela xe nato per la volontà de caraterizar Bora.La con un’apendice comico/satirica circumcirca quotidiana. Co’ Enrico me ga chiesto de crear la rubrica, me son dito “orca, ma come fazo, go capì scriver monade, ma una al giorno me par tropo! E po’ dopo un poco a furia de leger monade la gente se stuferà no?”…
Bon, però me son messo a far con entusiasmo. La mia idea iera quela de ricrear (ocio, stago per dirla), de far rinasser in qualche modo (ocio che la riva…), insoma, de far qualcossa de simile (tapeve le rece…) a quel che iera La citadela del lunedì (Bum, la go dita), alternando satira e viz su temi atuali a umorismo più generico, sfrutando le potenzialità del web rispeto ala carta stampata. Insoma un racoglitor de morbin in varie forme. Quindi xe partida la ricerca de colaboratori “monadori”, perché da solo iera impossibile. E là se ga verto un mondo che no pensavo cussì rico. Chi che xe specializà in dopiagi, chi in canzoni, chi in pupoli, chi in vignete, chi in fumeti, chi in “fotomonaggi”, chi in videi, chi in storiele…insoma el mondo del morbin se ga rivelà vario e praticamente inesauribile.
E bon, no sarò mi a poder dir se stemo ragiungendo l’obietivo “qualcossa de simile a quel che iera la Citadela” (anche perchè iero picio, mi dela Citadela me ricordo solo che me piaseva i pupoli), comunque credo che qualcossa de bel e divertente lo stemo fazendo e i mile “piacioni” fa sicuramente piazer.
Nel tempo xe nate via via una marea de rubriche periodiche a uscita sporadica, come Miss Topolona, el corso de clanfe Sunshine, Le invasioni furlaniche, La muleria de Trieste, El canton Bottanico, Le canzoni del Guf, Le cover rock triestine dei ULTRABULLoTS, Sanremo story, El cantier de Ucio e Pino, I misteri di Trieste, Scheletri nell’armadio, Ucio Bitta, probabilmente la rubrica più longeva e regolare del Quel dela Quela, le aventure de Iaia&Mass, Via Roma 11, la rubrica in bisiaco, i ricorsi del’Academia del Kruscovac…
Memorabili anche i periodi delo “scandalo clanfopoli” e del mistero del castel de Bora Nera (de entrambi publicheremo a breve un agiornamento importante).
E bon. Tuto questo xe destinà a continuar e ad arichirse. El Quel dela Quela xe un mondo aperto, chiunque gabi qualcosa de divertente de dir o de far pol contatarme (manna@bora.la) e sarà tempestivamente publicato.
Bon, ma chi xe tuti questi mastri monadori (in senso bon) grazie ai quali el Quel dela Quela ga sempre material de publicar? Eco qua la lista completa dei nomi de chi ga in qualche maniera contribuì, in ordine totalmente sparso:
Massimiliano Cernecca, Claudia Sfetez, Marco Englaro, i Sardoni Barcolani Vivi, Erika Ronchin, Michele Zazzara, Andrea Pecile, Mauro Vascotto, Andrea Rodriguez, i Robe Fatte Cacao, l’Assoziazion Iazadi, Euro Baret, Guendal Cecovini Amigoni, Paola Ramella, Vile & Vampi, Paolo Tanze, Renè, Sandi Stark, Riki Malva, i Scoverciai, Ivan Lovullo, Alessandro Di Pauli, Tommaso Pecile, la mitica Franca C. Porfirio, Lancia Libera, i ULTRABULLoTS, Massimo “Tuttotrieste” Barbo, DaveTheWave, Marta Bolgan, Cayo del Forum Trieste, Raffaele Prestinenzi e la Liberty Production, Lokito, Massimo Sangermano, Michele Colucci, Cristina Marsi, Ingrid Kuris, Adriano Bellini, Danilo Ulcigrai, Dorian Lorenzutti, i THC, el Guf, Federico Manna, Quella sporca mezza dozzina, i Laidos, Rodolfo Toè, David Way, Federico Gon, i Coroneo Salvation Army, Gli I The betolers, Gabriele Secoli e Mr Yoz.
E bon. Speremo che el grupo se alarghi e de continuar a regalar ai letori un soriso quotidiano!
Bon Quel dela Quela a tuti, dei! E se no sè ancora piacioni, struchè qua de soto su mi piace 🙂

Quel dela Quela on Facebook
Tag: , .

Un commento a I mille piacioni del Quel dela Quela

  1. Antonietta ha detto:

    Tra i piacioni ci sono anche molti friulani! Grazie ai triestini del Quel dela Quela, i lanfur ringraziano!

Lascia un commento

Il tuo indirizzo email non sarà pubblicato. I campi obbligatori sono contrassegnati *